މި މަހުގެ ތެރޭގައި ޝާހްރުކް ޚާން ޝޫޓިން ފަށާނެ ކަމަށް ބުނާ ޔާޝްރާޖް ފިލްމްސް (ވައިއާރްއެފް) ގެ "ޕަތާން" ގައި ސަލްމާން ޚާންގެ ހާއްސަ ފެނިލުމެއް ހިމެނޭނެ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި ޝާހްރުކް ވަރުގަދަ އެކްޝަން ރޯލަކުން ފެނިގެންދާ ފިލްމުގައި ސަލްމާން ފެނިގެން ދާނީ ވަރަށް ކުރު އެކަމަކު ވަރަށް ވެސް ހާއްސަ ރޯލަކުންނެވެ.
"ޕަތާން" އަކީ މިދިޔަ އަހަރު ރިތިކް ރޯޝަނާއި ޓައިގާ ޝްރޮފާ އެކު "ވޯ" ގެނެސްދިން ސިދާތު އާނަންދު ޑައިރެކްޓްކުރާ ފިލްމެކެވެ. މީގެ ކާސްޓްގައި ޖޯން އަބްރަހަމާއި ދީޕިކާ ޕަދްކޯން ވެސް ހިމެނެ އެވެ.
އެކީގައި ކުރިން ވެސް ފިލްމުތަކެއް ކުޅެފައިވާ ޝާހްރުކާއި ސަލްމާން ކުރިން ވެސް ދެ މީހުންގެ ފިލްމުތަކުގެ ކެމިއޯތަކުގައި ހިއްސާވެފައިވެ އެވެ. އެގޮތުން ޝާހްރުކް އެންމެ ފަހުން ކުޅުނު 2018 ގެ ފިލްމު "ޒީރޯ" ގެ ލަވައަކުން ދެ ތަރިން އެކީގައި ފެނިފައިވެ އެވެ. އަދި 2017 ގައި ސަލްމާން ކުޅުނު "ޓިއުބްލައިޓް" ގައި ޝާހްރުކްގެ ހާއްސަ ފެނިލުމެއް ހިމެނެ އެވެ. މީގެ އިތުރުން 2000 ވަނަ އަހަރު ރިލީޒްކުރި ސަލްމާންގެ "ހަރް ދިލް ޖޯ ޕިޔާރު ކަރޭގާ" ގައި ވެސް ޝާހްރުކްގެ ހާއްސަ ފެނިލުމެއް ހިމެނެ އެވެ.
ދެ ތަރިން އެކީގައި ބޮޑެތި ރޯލްތައް ކުޅުނު ފިލްމުތަކަކީ 1995 ގެ "ކަރަން އަރުޖުން" އާއި 1998 ގެ "ކުޗް ކުޗް ހޯތާ ހޭ" ގެ އިތުރުން 2002 ގެ "ހަމް ތުމާރޭ ހޭ ސަނަމް" އެވެ.
"ޕަތާން" ސިނަމާތަކަށް ގެންނާނެ ކަމަށް ބެލެވެނީ އަންނަ އަހަރުގެ ދިވާލީގަ އެވެ.
ސަލްމާންގެ ކުރިއަށް އޮތް ފިލްމަކީ "ރާދޭ: އިންޑިއާސް މޯސްޓް ވޯންޓެޑް ބާއީ" އެވެ. އަދި އޭނާ މިހާރު އަންނަނީ ޅިޔަނު އާޔޫޝް ޝަރުމާއާ އެކު ކުޅޭ "އަންތިމް" އަށް ތައްޔާރުވަމުންނެވެ. އެ ފިލްމުގައި ކުޅޭ ފުލުސް ކެރެކްޓާ އަށް ސަލްމާން މި ހަފުތާގެ ތެރޭގައި ދެ ލުކް ޓެސްޓް ވެސް ހަދާނެ އެވެ.