ސިދާތުގެ ފިލްމަކުން ޕްރަބާސްގެ ފެނުމުގެ ފުރުސަތު ބޮޑު

"ބާހްބަލީ" ކުޅެގެން މަޝްހޫރުވި ތެލެގޫ އެކްޓަރު ޕްރަބާސް ހިންދީ ފިލްމަކަށް ގެންނަން ކިއު ހަދައިގެން ތިބި ޑައިރެކްޓަރުންނާއި ޕްރޮޑިއުސަރުން ގިނަ އެވެ. އެކަމަކު މިހާތަނަށް އަދިވެސް ރަސްމީކޮށް އޭނާ ހިންދީ ފިލްމަކަށް ސޮއެއް ނުކުރެ އެވެ.

"ބާހްބަލީ" ގެ ހިންދީ ވާޝަން ގެނެސްދިނުމުގެ ޒިންމާ ނެގި ކަރަން ޖޯހަރަކީ އޭނާގެ ކުންފުނި ދަރުމާ ޕްރޮޑަކްޝަންސްގެ ފިލްމަކަށް ޕްރަބާސް ގެންނަން ވަރަށް މަސައްކަތްކުރި މީހެކެވެ. އެކަމަކު އެކަން އޮތީ އަދި ކާމިޔާބު ނުވެ އެވެ.

ނަމަވެސް ފަހުގެ ޚަބަރުތައް ބުނާ ގޮތުން ޕްރަބާސް މިހާރު އޮތީ ހިންދީ ފިލްމަކަށް ފެހި ސިގްނަލް ދީފަ އެވެ. އެއީ މިހާރު ޝާހްރުކް ޚާނާ އެކު "ޕަތާން" ހަދަމުން އަންނަ ޑައިރެކްޓަރު ސިދާތު އާނަންދުގެ ފިލްމަކަށެވެ. ބޮލީވުޑް ހަންގާމާ އިން ބުނި ގޮތުގައި 2019ގެ އެންމެ ކާމިޔާބު ފިލްމު ކަމަށްވާ ރިތިކް ރޯޝަނާއި ޓައިގާ ޝްރޮފްގެ "ވޯ" ގެނެސްދިން ޑައިރެކްޓަރު ވަނީ ޕްރަބާސް އަށް ވަރަށް ވަރުގަދަ އެކްޝަން ތުރިލާއެއް ހުށަހަޅައިފަ އެވެ. އަދި ފިލްމާ ބެހޭ ގޮތުން ދެ މީހުން މިދިޔަ އަހަރުގެ ފަހުކޮޅު ހައިދަރުއާބާދުގައި ބައްދަލުކޮށް މަޝްވަރާ ވެސް ކޮށްފައިވެ އެވެ.

ހަންގާމާ އިން ބުނި ގޮތުގައި ސިދާތު ނެރޭޓްކޮށްދިން ކޮންސެޕްޓް ޕްރަބާސް އަށް ވަރަށް ކަމުދިއުމުން އޭނާ ވަނީ ފިލްމުގެ ސްކްރިޕްޓް އެއްކޮށް ނިންމާފައި ދިނުމުން އެ ކިޔާފައި ފިލްމަށް އެއްބަސްވާނެ ކަމަށް ކަމަށް ބުނެފަ އެވެ. އެހެންވެ ޕްރޮޖެކްޓަކީ ޕްރަބާސް ރަސްމީކޮށް ކުޅޭނެ ހިންދީ ފިލްމަށްވުމުގެ ފުރުސަތު ބޮޑު ކަމަށް އެ ނޫހުން ބުންޏެވެ.

ހަންގާމާ އިން ބުނީ މި އަހަރުގެ ނޮވެމްބަރު ހިސާބުގައި "ޕަތާން" ގެނެސްދިނުމަށް ފަހު، ސިދާތު އިއުލާންކޮށްފައިވާ ރިތިކާއި ދީޕިކާ ޕަދްކޯނާ އެކު ހަދާ "ފައިޓާ" އަންނަ އަހަރު ގެނެސްދިނުމަށް ފަހު، އަންނަ އަހަރުގެ ޑިސެމްބަރު ހިސާބުގައި ޕްރަބާސްގެ ފިލްމުގެ މަސައްކަތް ފަށާނެ އެވެ. "ފައިޓާ" އަކީ އަންނަ އަހަރުގެ ސެޕްޓެމްބަރު މަހުގެ 30 ގައި ސިނަމާތަކަށް ގެންނަން ތާވަލުކޮށްފައި އޮތް ފިލްމެކެވެ.

ދެހާސް ނަވާރައިގައި "ސާހޯ" އިން ފެނިގެން ދިޔަ ޕްރަބާސް މި ވަގުތު އަންނަނީ "ސަލާރް" ކިޔާ ތެލެގޫ ފިލްމެއްގެ މަސައްކަތްކުރަމުންނެވެ. އޭނާގެ ކުރިއަށް ހުރި ޕްރޮޖެކްޓްތަކުގެ ތެރޭގައި ޝޫޓިން ނިންމާލާފައި އޮތް "ރާދޭ ޝާމް" އާއި އަންނަ އަހަރުގެ އޮގަސްޓް 11 ގައި ރިލީޒްކުރާނެ "އަދިޕުރުޝް" ގެ އިތުރުން ދީޕިކާ އާއި އަމީތާބް ބައްޗަނާ އެކު ކުޅޭ އަދި ނަން އިއުލާން ނުކުރާ ފިލްމެއް ހިމެނެ އެވެ.

މި ހުރިހާ ފިލްމުތަކަކީ ރަސްމީކޮށް ތެލެގޫ ފިލްމުތަކަކަށް ވިޔަސް، ފިލްމުތައް އިންޑިއާގައި އާންމުކޮށް ވާހަކަ ދައްކައި އުޅޭ ހުރިހާ ބަހަކުން އަޑު އަޅައިގެން ސިނަމާތަކުގައި ރިލީޒްކުރާނެ އެވެ.