ބިގް ބޮސް 14: އެންމެ ވަރުގަދައަށް ހިފެހެއްޓި އަބިނާވް ކަޓައިފި

ރިއަލިޓީ ޝޯ "ބިގް ބޮސް 14" ފެށި އިރު ވަރަށް ފޫހި ބައިވެރިއެއްގެ ގޮތުގައި އެ ޝޯގެ ވަރަށް ގިނަ ބައިވެރިން ވެސް ލޭބަލްކުރި އެކަމަކު ޝޯ ފެށީއްސުރެ ދެގޮތެއް ނުވެ އެންމެ ވަރުގަދަ އަށް ހިފަހައްޓަމުން ދިޔަ ބައިވެރިންގެ ތެރޭގައި ހިމެނުނު އަބިނާވް ޝުކްލާ އަންގާރަ ދުވަހުގެ ރޭ ޝޯ އިން ކަޓައިފި އެވެ.

އެހެން ބައިވެރިންނަށް ވުރެ ތަންކޮޅެއް ބަސްމަދު "ޑިިސިލިޕްލިންކޮށް" ފެނުނު އަބިނާވަށް ޝޯ އިން ވަކިވާން ޖެހުނީ އާންމު އުސޫލުތަކާ ހިލާފަށް ކުއްލި ގޮތަކަށް ބޭއްވި އެލިމިނޭޝަން ޕްރޮސެސްގަ އެވެ. އާންމުކޮށް ބިގް ބޮސްގެ އެލިމިނޭޝަން ކުރިއަށް ގެންދަނީ، ޝޯގެ ހޯސްޓް ސަލްމާން ޚާނާ އެކު ހޮނިހިރާއި އާދީއްތަ ދުވަހުގެ ރޭ ގެނެސްދޭ "ވީކެންޑް ކާ ވާރު" ގެ އެޕިސޯޑްތަކުގަ އެވެ.

އަބިނާވްގެ ބިގް ބޮސް ދަތުރު ނިންމައިލަން ޖެހުނީ ޝޯގައި ވާދަކުރާ ބައިވެރިންގެ "ކަނެކްޝަން" ގެ ގޮތުގައި މި ހަފުތާގައި ގެއަށް ވެއްދި ބައިވެރިންގެ ވޯޓާ އެކީގަ އެވެ. އެގޮތުން އެ މީހުންގެ ހިޔާލު ހޯދުމުން ގިނަ މީހުން ބުނީ ޝޯ އިން ވަކިވާން ޖެހެނީ އަބިނާވް ކަމަށެވެ.

"ކަނެކްޝަން" ގެ ގޮތުގައި ގެއަށް ވައްދާފައި ވަނީ "ބިގް ބޮސް 14" ގެ އޮރިޖިނަލް ބައިވެރިންގެ ތެރެއިން ކަޓައިގެން ދިޔަ ޖޭސްމީން ބާސީނާއި ޖާން ކުމާރު ސާނޫ އާއި "ޗެލެންޖާޒް" ގެ ގޮތުގައި ފުރުސަތު ލިބި ކަޓައިގެން ދިޔަ ރާހުލް މަހާޖަނާއި ޝޯގައި ވާދަކުރާ އަނިބާވްގެ އަންހެނުން ރުބީނާ ދިލައިކްގެ ކޮއްކޮ ޖޯތިކާ ދިލައިކާއި ވިންދޫ ދާރާ ސިންގް އާއި ލަވަކިޔުންތެރިޔާ ތޯޝީ ސަބްރީގެ އިތުރުން "ބިގް ބޮސް 13" ގައި ވާދަކުރި ޕާރަސް ޗާބްޅާ އެވެ.

އަބިނާވް ޝޯއިން ކެޓި އިރު ފާހަގަކުރެވެނީ އޭނާ އާއި އަންހެނުން ރުބީނާ އަކީ މި ފަހަރުގެ ސީޒަން ފެށީއްސުރެ އެއްވާނެއްގައި ހިފަހައްޓަމުން ދިޔަ ދެ ބައިވެރިންގެ ގޮތުގަ އެވެ. ޝޯގައި ދެން މުޅިން ވެސް ތިބީ ގެއަށް ވަންނަން އިތުރު ފުރުސަތު ލިބުނު ބައިވެރިންނާއި ވައިލް ކާޑްގެ ދަށުން ފުރުސަތު ލިބުނު ބައިވެރިންނެވެ.

މިހާރު ޝޯގައި ދެމިތިބި ހަ ބައިވެރިންނަކީ ރުބީނާ އާއި އޮރިޖަނަލް ބައިވެރިންގެ ތެރެއިން ދެވަނަ ފުރުސަތެއް ލިބުނު ރާހުލް ވައިދިއާ އާއި ނިކީ ތަމްބޯލީގެ އިތުރުން ވައިލްޑްކާޑްގެ ދަށުން ފުރުސަތު ލިބި ކަޓައިގެން ދިއުމުން ދެވަނަ ފުރުސަތެއް ލިބުނު އަލީ ގޯނީ އާއި "ޗެލެންޖާޒް" ގެ ގޮތުގައި ފުރުސަތު ލިބުނު ރާކީ ސާވަންތުގެ އިތުރުން ޝޯގައި ވާދަކުރަމުން ދިޔަ އިޖާޒް ޚާންގެ "ޕްރޮކްސީ" ގެ ގޮތުގައި ވާދަކުރާ ޑެވޮލީނާ ބަޓަޗަރްޖީ އެވެ.

"ބިގް ބޮސް 14" ނިންމައިލަން ގާތްގަނޑަކަށް ދެ ހަފުތާއެއް ދުވަހަށް ގާތްވެފައި ވަނިކޮށް އަބިނާވް ކަޓައިގެން ދިޔަ އިރު އޭނާގެ މި ދަތުރު މާކަ ފަސޭހައެއް ވެސް ނޫނެވެ. ހާއްސަކޮށް ރާހުލް ވައިދިއާ އަކީ އަބިނާވާއި ރުބީނާއާ "ވަރަށް ޖައްސާލައިގެން އުޅުނު" ބައިވެރިއެކެވެ. މީގެ ސަބަބުން އެ އެ މީހުންނާއި ރާހުލްގެ ގުޅުން މާ ރަނގަޅެއް ނޫނެވެ. އަނެއްކޮޅުން ރުބީނާ އާއި އަބިނާވްގެ ވަރަށް ގާތް ރައްޓެއްސެއްގެ ގޮތުގައި ފާހަގަކުރެވުނު ޖޭސްމިންގެ ގުޅުމުގައި ވެސް ބޮޑެތި ކުނިތައް ޖެހުފައިވެ އެވެ. އަބިނާވް ޝޯއިން ބޭރުކޮށްލަން ވޯޓް ދިން މީހުންގެ ތެރޭގައި ވެސް ޖޭސްމިން ހިމެނެ އެވެ.

ބިގް ބޮސްގެ ތެރެއިން މި ފަހަރު ދެން އެންމެ ބޮޑަށް ފާހަގަކުރެވުނީ ރާކީ އަބިނާވަށް ހިތްކިޔައިގެން ޖެހި ސަކަރާތެވެ. އެގޮތުން ރާކީ އަބިނާވަށް އެކި ގޮތްގޮތުން "ގޯނާކޮށް" ގައިގައި އަބިނާވް ދެކެ ލޯބިވާ ވާހަކަ ވެސް ލިޔެގެން "ހުތުރު ސަކަރާތްތަކެއް" ޖެހި އެވެ. މި މައްސަލަ ވަރަށް ބޮޑަށް ހޫނުވެ، އެންމެ ފަހުން މައިތިރިވީ ސަލްމާންގެ އިންޒާރުތަކާ އެކީގަ އެވެ.

މީގެ އިތުރުން ޝޯ އަށް ދިއުމުގެ ކުރިން އަބިނާވާއި ރުބީނާ ވަރިފަށާ ހަމައަށް ދިޔަ ވާހަކަތަކަކީ މި ފަހަރުގެ ސީަޒަންގެ ކުރީކޮޅު ވަރަށް ހޫނުކޮށް ދެކެވުނު ވާހަކަތަކެކެވެ. ދެ މީހުންގެ ކައިވެނީގެ ގުޅުމުގައި މައްސަލަތަކެއް ހުރި ވާހަކަ އެ މީހުން އަމިއްލަ އަށް ވެސް ކިޔައި ދީފައިވެ އެވެ.

އަބިނާވް ނެތި ދެން ރުބީނާ އަށް ޝޯގައި ކުރިއަށްދާކަށް މާ ފަސޭހައެއް ވެސް ނުވާނެ އެވެ. ސަބަަބަކީ މިހާރު ތިބި ބައިވެރިންގެ ތެރޭގައި އޭނާއާ މާ ގާތް ގުޅުމެއް ވެސް އޮތް ބަޔަކު ނެތުމެވެ. ކިރިޔާ ވެސް ހުރި ހަމައެކަނި މީހަކީ މިހާރު ނިކީ އެވެ.

އަބިނާވް، 38، އަކީ ޓީވީ އެކްޓަރެއްގެ އިރުތުރުން ފިލްމުތަކެއް ކުޅެފައިވާ އެކްޓަރެކެވެ. އޭނާ ކުޅުނު ފިލްމުތަކުގެ ތެރޭގައި 2018 ގެ "އަކްސަރު 2" އާއި 2019 ގެ "ލުކާ ޗުއްޕީ" ހިމެނެ އެވެ. އަބިނާވްގެ ސިލްސިލާތަކުގެ ތެރޭގައި ރުބީނާ ލީޑް ރޯލް ކުޅުނު "ޗޯޓީ ބަހޫ" އާއި "އޭކް ހަޒާރޯ މޭ މޭރީ ބެހެނާ ހޭ" އާއި "ހިޓްލަރު ދީދީ" އަދި "ބަދަލްތޭ ރިޝްތޯން ކީ ދާސްތާން" ހިމެނެ އެވެ.