އިންޑިއާގެ ރާޒުވާ ލެޖެންޑްގެ ރޯލަށް ބޭނުމީ އާމިރު

މިދިޔަ ޑިސެމްބަރު މަހު އިއުލާންކުރި، އިންޑިއާގެ ރާޒުވާ ލެޖެންޑް ވިސްވަނާތަން އާނަންދުގެ ބައޮގްރަފިކަލް ޑްރާމާގައި އޭނާގެ ރޯލު ކުޅުމުގެ ފުރުސަތު ބޮޑީ މަޝްހޫރު އެކްޓަރު އާމިރު ޚާން ކަމަށް ރިޕޯޓްތައް ބުނެފި އެވެ.

އާމިރު ފިލްމަށް ގެންނަން އޭގެ ޓީމުން މަސައްކަތްކުރާ ވާހަކަ މީޑިއާތަކުގައި ގަދަވެފައި މި ވަނީ އެ ފިލްމު އިއުލާންކުރި ދުވަސްވަރު ވިސްވަނާތަންގެ ރޯލު ކުޅޭނީ ތަމަޅަ އެކްޓަރު ދަނޫޝް ކަމަށް އަޑުއަރާފައި ވަނިކޮށެވެ. ދަނޫޝް އަކީ މި ފިލްމުގެ އެއް ޕްރޮޑިއުސަރުގެ ގޮތުގައި ހިއްސާވާ އާނަންދު އެލް ރާއީގެ ވަަރަށް ބޮޑު ފެވަރިޓެކެވެ. އޭނާ 2013 ގައި ގެނެސްދިން "ރާންޖަނާ" ބަތަލަކީ އާނަންދުގެ ކުރިއަށް އޮތް ފިލްމު "އަތުރަންގީ ރޭ" ގެ ވެސް އެއް ބަތަލު ވެ މެ އެވެ. އެ ފިލްމުގެ ކާސްޓްގައި ދެން ހިމެނެނީ އަކްޝޭ ކުމާރާއި ސާރާ އަލީ ޚާނެވެ.

ވިސްވަނާތަންގެ ބައޮޕިކާ ބެހޭ ގޮތުން ފިލްމުގެ އަނެއް ޕްރޮޑިއުސަރު މަހާވީރު ޖެއިން ޕިންކްވިލާ އަށް ބުނީ މިއީ ވަރަށް އުންމީދު ބޮޑު ފިލްމެއް ކަމަށެވެ. އެހެންވެ ކާސްޓަށް ނަގަން ބޭނުން ވަނީ ވަރުގަދަ ތަރިއަކު ކަމަށް ބުންޏެވެ.

"އެގޮތުން އާމިރަކީ ވިސްވަނާތަންގެ ރޯލަށް ވަރަށް ފިޓް އެކްޓަރެއް. އެކަމަކު ފިލްމަށް އެކްޓަރަކު ނަގާނީ ވަރަށް ގިނަ ކަންކަން ކަމަށް ބެލުމަށް ފަހު. އެނގިފައިވާ ގޮތުގައި އާމިރުގެ އަތުގައި މި ވަގުތު ހަތަރު ޕްރޮޖެކްޓެއް އޮތުމާ އެކު އަހަރެމެން ބޭނުންވާ ގޮތަށް އޭނާ އަށް ފިލްމަށް ވަގުތު ދެވިދާނެތޯ އެއީ ވަރަށް ބޮޑަށް ބަލަން ޖެހޭ ކަމެއް." އޭނާ ބުންޏެވެ.

މަހާވީރު ބުނިގޮތުގައި ވިސްވަނާތަންގެ ފިލްމު އަދި އޮތީ ސްކްރިޕްޓިން މަރުހަލާ އެވެ. އަދި އޭގެ ފައިނަލް ޑްރާފްޓް ނިމުމާ އެކު، ކާސްޓާ ދޭތެރޭ ސީރިއަސް ވިސްނަން ފަށާނެ ކަމަށް ބުންޏެވެ.

ވިސްވަނާތަންގެ ބައޮޕިކް އިއުލާންކޮށްފައި އޮތަސް މީގެ ނަމާއި ޑައިރެކްޓްކުރާނެ މީހަކު ވެސް އަދި ނުނިންމަ އެވެ.

އާމިރުގެ ކުރިއަށް އޮތް ފިލްމަކީ ޑިސެމްބަރުގައި ރިލީޒްކުރާ "ލާލް ސިންގް ޗައްޑާ" އެވެ. އަދި އޭނާގެ އަތުގައި ހުރި އިތުރު ޕްރޮޖެކްޓްތަކުގެ ތެރޭގައި ޓީ ސީރީޒްގެ ވެރިޔާ ބުޝަން ކުމާރުގެ ބައޮގްރަފިކަލް ޑްރާމާ "މޯގުލް" އާއި ސްޕެއިންގެ ސްޕޯޓްސް ޑްރާމާއެއްގެ ރިމެކެއް ހިމެނެ އެވެ.

އާމިރުގެ ކެރިއަރުގައި އަދި މިހާތަނަށް ބައޮޕިކެއް ކުޅެފައި ނުވާ އިރު "މޯގުލް" އަކީ އޭނާ ފެންނާނެ ފުރަތަމަ ބައޮޕިކެވެ. މީގެ ކުރިން އާމިރަށް އިންޑިއާގެ ކުރީގެ އެސްޓްރޮނޯޓް ރާކޭޝް ޝަރުމާގެ ބައޮޕިކް ސެލިއުޓް (ސާރޭ ޖަހާ ސެ އައްޗާ) ވެސް ހުށަހެޅި އެވެ. އެކަމަކު އެ ފިލްމަށް ސޮއިކޮށްފައި ފަހުން އޭނާ ވަނީ އެ ފުރުސަތު ދޫކޮށްލައިފަ އެވެ.