އަޖޭ ވައިއާރްއެފްގެ ސުޕަހީރޯ ފިލްމު ދޫކޮށްލައިފި

އެކްޓަރު އަޖޭ ދޭވްގަން ކުޅެން ރުހުން ދީފައި އޮތް ޔާޝްރާޖް ފިލްމްސް (ވައިއާރްއެފް) ގެ ސުޕަހީރޯ ފިލްމުން ވަކިވެއްޖެ އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނީ ބޮލީވުޑްގެ އެންމެ ބޮޑު ޕްރޮޑަކްޝަން ހައުސް އިން އަޖޭ އަށް ލިބުނު ފުރަތަމަ ފިލްމު ދޫކޮށްލަން މަޖުބޫރުވީ އޭނާގެ އަތުގައި މި ވަގުތު ވެސް ގިނަ ޕްރޮޖެކްޓްތަކެއް ހުރުމުން ވަގުތު ދޭން ދަތިވެގެން ކަމަށެވެ. އަނެއްކޮޅުން އެ ފިލްމު ދެން މާ ބޮޑަށް ލަސްކުރެވެން ވައިއާރްއެފަށް ވެސް ނެތުމާ އެކު، މި ދަނޑިވަޅުގައި އަޖޭ އަށް ވަގުތު ދެވެން ނެތުމުން ފިލްމު ދޫކޮށްލުން ނޫން ގޮތެއް ނެތުމުން އޭނާ ފިލްމު ދޫކޮށްލީ އެވެ.

ވައިއާރްއެފުން ރަސްމީކޮށް އަދި އެއްވެސް މައުލޫމާތެއް ހިއްސާނުކުރާ މި ފިލްމުގައި އަޖޭ ކުޅެން އޮތީ ފިލްމުގެ ވިލަންގެ ރޯލެވެ. ފިލްމުގެ ލީޑް އެކްޓަރަކީ އަލަށް ތައާރަފުކުރަން ހަމަޖެހިފައިވާ އަހާން ޕާންޑޭ އެވެ. އޭނާއާ، އަރަމުން އަންނަ ޒުވާން ބަތަލާ އަނަންޔާ ޕާންޑޭގެ ދެބެއިންގެ ދެ ދަރި އެވެ.

މީޑިއާތަކުން ބުނީ 180 ކްރޯޑް ރުޕީސް ބަޖެޓަކުން ހަދަން ނިންމާފައިވާ ފިލްމު އަޖޭ ދޫކޮށްލާފައިވާތީ އޭނާގެ ބަދަލުގައި ފިލްމުގެ ވިލަންގެ ރޯލަށް އެހެން އެކްޓަރަކު ގެންނަން ޕްރޮޑިއުސަރު އަދިތިޔާ ޗޯޕްޅާ މިހާރު މަސައްކަތްކުރަމުން އަންނަ ކަމަށެވެ.

ބޮލީވުޑް ހަންގާމާ އިން ބުނީ އަދިތިޔާ ބޭނުން ވަނީ މިހާރު އިންޑިއާގައި އޮތް ކޮވިޑް-19 ގެ ހާލަތަށް ލުއި ލިބުނުހާ އަވަހަކަށް ފިލްމުގެ ޝޫޓިން ފަށަން ކަމަށެވެ. މީގެ ޑައިރެކްޓަރަކީ ކުރިން ވައިއާރްއެފްގެ ބައެއް ފިލްމުތަކުގައި އެސިސްޓަން ޑައިރެކްޓަރެއްގެ ގޮތުގައި މަސައްކަތްކޮށްފައިވާ ޝިވް ރަވައިލް އެވެ. އޭނާ އަކީ "ލަވް ސްޓޯރީ" އާއި "ބޭތާބު" އާއި "ސަމަންދަރު" އަދި އަޖޭގެ އަންހެނުން ކާޖޮލްގެ އަލަތު ފިލްމު "ބޭޚުދީ" ގެނެސްދިން ޑައިރެކްޓަރު ރާހިލް ރަވައިލްގެ ދަރިފުޅެވެ.

އަޖޭ މި ފިލްމު ދޫކޮށްލި އިރު އޭނާ ސޮއިކޮށްފައި މަސައްކަތް ފަށަން ހުރި ޕްރޮޖެކްޓްތަކުގެ ތެރޭގައި ޑައިރެކްޓްކޮށް، ކުޅޭ "މޭޑޭ" އާއި "ޗަނަކިއާ" އާއި "ތޭންކް ގޯޑް" އާއި ތަމަޅަ ފިލްމު "ކައިތީ" ގެ ރިމޭކާއި ވެބް ސީރީޒް "ރުދުރާ: ދި އެޖް އޮފް ޑާކްނެސް" ހިމެނެ އެވެ.

ރިލީޒްވާން ހުރި އަޖޭ ފިލްމުތަކުގެ ތެރޭގައި "ގަންގޫބާއީ ކަތިއަވާޅީ" އާއި "އާރްއާރްއާރް" އާއި "މައިދާން" އާއި "ބޫޖް: ދަ ޕްރައިޑް އޮފް އިންޑިއާ" ހިމެނެ އެވެ.