ސުޕަހީރޯ ފިލްމުގައި އަޖޭ ދޭވްގަން ކުޅޭނީ ވިލަންއެއްގެ ރޯލް

މި މަހުގެ ފަހުކޮޅު ޔާޝްރާޖް ފިލްމްސް (ވައިއާރްއެފް) އިން އަޖޭ ދޭވްގަންއާ އެކު އިއުލާންކުރާނެ ކަމަށް ބެލެވޭ ބޮޑު ބަޖެޓް ސުޕަހީރޯ ފިލްމުގައި އޭނާ ކުޅޭނީ ވިލަންއެއްގެ ރޯލް ކަމަށް ރިޕޯޓްތައް ބުނެފި އެވެ.

މުމްބާއީ މިރާ އިން ބުނި ގޮތުގައި އަޖޭގެ ސުޕަހީރޯ ފިލްމު ވާނީ ހުނަރުވެރި އެކްޓަރު މިހާތަނަށް އަދި ފިލްމަކުން ފެނިފައި ނުވާހާ ވަރުގަދަ އަދި ތަފާތު ކެރެކްޓާއަކުން ފެންނާނެ ފިލްމަކަށެވެ. އަދި އަޖޭގެ ކެރެކްޓާ އަކީ ވަރަށް ސްޓައިލިޝް ޒަމާނީ ވިލަންއެއްގެ ރޯލް ކަމަށާއި އޭނާ އެ ފިލްމަށް އެއްބަސްވީ ވެސް، ކުޅެން ލިބުނު ކެރެކްޓާ ވަރުގަދަވުމުން ކަމަށް ބުންޏެވެ.

ނަމަވެސް މި ފިލްމާ ބެހޭ އެއްވެސް ވާހަކައެއް އަދި ކަށަވަރެއް ނުވެ އެވެ. އިންތިޒާކުރަން ޖެހެނީ މަހުގެ 27 އަށެވެ. އެ ދުވަހަކީ ވައިއާރްއެފްގެ ބާނީ ޔާޝް ޗޯޕްޅާގެ 88 ވަނަ އުފަން ދުވަސް އަދި އެ ސްޓޫޑިއޯ އިން ފިލްމު ހަދާތާ މި އަހަރަށް ބައި ގަރުނުވާ ދުވަހެވެ. ބޮޑެތި ޕްރޮޖެކްޓްތަކެއް އެ ދުވަހު އިއުލާންކުރަން ތައްޔާރުވަމުން އަންނަ އިރު، އަޖޭގެ ފިލްމަކީ ވެސް އޭގެ ތެރެއިން އެއް ފިލްމު ކަމަށް މީޑިއާތަކުން ބުންޏެވެ. މިއީ ތެދަކަށްވެއްޖެ ނަމަ އެ ފިލްމަކީ ވައިއާރްއެފްގެ ފިލްމެއް އަޖޭ ކުޅޭ ފުރަތަމަ ފަހަރެވެ.

ބައެއް ނޫސްތަކުން ބުނެފައިވާ ގޮތުގައި އަޖޭގެ ފިލްމު ޑައިރެކްޓްކުރާނީ ކުރިން އެ ސްޓޫޑިއޯގެ ފިލްމުތަކެއްގެ އެސިސްޓެންޓް ޑައިރެކްޓަރެއްގެ ގޮތުގައި މަސައްކަތްކުރި ޝިވް ރަވައިލް އެވެ. އޭނާ އަކީ އަޖޭގެ އަންހެނުން ކާޖޮލްގެ އަލަތު ފިލްމު ބޭޚުދީ (1992) ޑައިރެކްޓްކުރި ރާހުލް ރަވައިލްގެ ދަރިއެކެވެ.

މީޑިއާތަކުން ބުނާ ގޮތުން އެކްޓަރު ޗަންކީ ޕާންޑޭ އަށް ބޮޑުބޭބެ ކިޔާ އަހާން ޕާންޑޭ ބޮލީވުޑަށް ތައާރަކުރަން ވައިއާރްއެފުން ނިންމާފައިވާ އިރު، އެ ފިލްމަކީ އަޖޭގެ ސުޕަހީރޯ ފިލްމެވެ. ފިލްމުގެ ޕްރޮޓެގޮނިސްޓް ރޯލް ކުޅޭނެ ކަމަށް ބެލެވެނީ އަހާން ކަމަށްވެ އެވެ. އަދި މިއީ ފްރެންޗައިޒަކަށް ހަދާނެ ކަމަށް ނޫސްތަކުން ބުނެ އެވެ.