އަލިޒޭގެ ފުރަތަމަ ފެނިލުން ބޮޑުބޭބެ ސަލްމާނަށް ވަރަށް ކަމުގޮސްފި

ސަލްމާން ޚާނަށް ބޮޑުބޭބެ ކިޔާ އަލިޒޭ އަގްނިހޯތުރީ ބޮލީވުޑަށް ނުކުންނަން އުޅޭ ވާހަކަ 2018 އިން ފެށިގެން ދައްކަމުން އައިސް އޭނާގެ ފުރަތަމަ ފެނިލުމާ އެކު ސަލްމާން ތައުރީފުކޮށްފި އެވެ.

މިއީ އިންޑިއާގެ ގަހަނާ ބްރޭންޑެއް ކަމަށްވާ ޒާވޯރްގެ އިޝްތިހާރެކެވެ. އޭގައި ފެންނަނީ ފެހި ކުލައިގެ ކުރު ޓޮޕަކާއި ހުދު ކުލައިގެ ޖީންސްލައިގެން ހުރި އަލިޒޭ އަޅައިގެން ހުންނަ ގަހަނާތަކާ އެކު ފަރިވާ ތަނެވެ. މި އިޝްތިހާރު ސަލްމާންގެ އިންސްޓަގްރާމްގައި ޕޯސްޓްކޮށް ބުނީ އޭގައި "ދަރިފުޅު ފެންނަލެއް ވަރަށް ވެސް ރީތި" ކަމަށެވެ. އަދި ހެޔޮދުއާތައް ފޮނުވާފައިވެ އެވެ.

އަންނަ އަންގާރަ ދުވަހު 21 އަހަރު ފުރޭ އަލިޒޭ އަކީ ސަލްމާންގެ އަންހެން ކޮއްކޮ އަލްވިރާ ޚާނާއި ޕްރޮޑިއުސަރު އަދި ކުރީގެ އެކްޓަރު އަތުލް އަގްނިހޯތުރީގެ ދޮށީ ދަރިފުޅެވެ. އަލިޒޭގެ އިޝްތިހާރު އެ ދެ މީހުންގެ އިންސްޓަގްރާމްގައި ވެސް ޕޯސްޓްކޮށްފައިވެ އެވެ.

އަލިޒޭ ބޮލީވުޑަށް ނުކުންނަން އުޅޭ ވާހަކަ ދެކެވެމުން އަންނަ އިރު، އޭނާ ވާނީ ސަލްމާންގެ އާއިލާ އިން ފިލްމު ކުޅެން ނުކުންނަ ފުރަތަމަ އަންހެން ފަންނާނަށެވެ. ބައެއް މީޑިއާތަކުން ކުރިން ބުނެފައިވާ ގޮތުގައި އަލިޒޭ ލޯންޗްކުރާނީ އާއިލާ އިން އުފައްދާ ފިލްމަކުންނެވެ.

އެކަމަކު މި އަހަރުގެ ކުރީކޮޅު އަޑު އަރާފައިވާ ގޮތުން ސަލްމާން ތަރިއަކަށް ބަދަލުކޮށް ދިން ޑައިރެކްޓަރު ސޫރަޖް ބަރަޖްތިއާގެ ދަރިފުޅު އަވްނިޝް ބަރްޖަތިއާގެ އަލަތު ފިލްމުގެ ބަތަލާ އަކީ އަލިޒޭ އެވެ. މި އަހަރުގެ މާޗް މަހު އެ ފިލްމު އިއުލާންކުރީ ސަނީ ޑިއޯލްގެ ހަގު ފިރިހެން ދަރިފުޅު ރަޖްވީރު ޑިއޯލް ބޮލީވުޑަށް ނެރޭ ފިލްމުގެ ގޮތުގަ އެވެ. އޭގެ ފަހުން އެއާ ބެހޭ އިތުރު ވެސް އެއްވެސް ވާހަކައެއް ސޫރަޖްގެ އާއިލީ ފިލްމު ކުންފުނި ރާޖްޝްރީ ޕްރޮޑަކްޝަނުން ހާމައެއްނުކުރެ އެވެ.

ސޫރަޖަކީ ސަލްމާންގެ "މޭނޭ ޕިޔާރު ކިޔާ" އާއި "ހަމް އާޕް ކޭ ހޭ ކޯން" އާއި "ހަމް ސާތު ސާތު ހޭ" އަދި "ޕްރޭމް ރަތަން ދަން ޕާޔޯ" ގެ ޑައިރެކްޓަރެވެ.