ކަންޔޭގެ ޑޮކިއުމަންޓަރީއެއް އަންނަ މަހު

ޑޮކިއުމަންޓަރީ ނެޓްފްލިކްސް ސްޓްރީމްކުރުމުގެ ކުރިން އަންނަ މަހުގެ 10 ގައި ސިނަމާތަކަށް ގެންނާނެ

ކަންޔޭ.

އަހުމަދު އަދްޝަން، މިހާރު

13 ޖެނުއަރީ 2022 - 06:24

އެމެރިކާގެ މަޝްހޫރު ރެޕާ އަދި ބިލިއަނަރު ކަންޔޭ ވެސްޓާ ބެހޭ ގޮތުން ހަދާފައިވާ ޑޮކިއުމަންޓަރީއެއް އަންނަ މަހު ގެނެސްދޭން ނިންމައިފި އެވެ.

ތިން ބަޔަކަށް ގެނެސްދޭން ނިންމާފައިވާ އަދި ނަމަކަށް "ޖީން-ޔޫސް: އަ ކަންޔޭ ޓްރިލޮޖީ" ގެ ނަން ދީފައިވާ މި ޑޮކިއުމަންޓަރީގެ ފުރަތަމަ ބައި ނެޓްފްލިކްސް އަންނަ މަހުގެ 16 ގައި ސްޓްރީމްކުރުމުގެ ކުރިން އަންނަ މަހުގެ 10 ގައި ސިނަމާތަކުގައި އަޅުވަން ވެސް ނިންމާފައިވެ އެވެ.

އުފެއްދުމުގެ މަސައްކަތްކުރާތާ 20 އަހަރުވީ މި ޑޮކިއުމަންޓަރީގައި ކަންޔޭގެ ހަޔާތުގެ އުސްއަލިތައް ގެނެސްދޭނެ އެވެ.

ކްލަރެންސް (ކޫޑީ) ސައިމަންސް އާއި ޗައިކް އޮޒާ ޑައިރެކްޓްކޮށްފައިވާ "ޖީން-ޔޫސް: އަ ކަންޔޭ ޓްރިލޮޖީ" ގެ ޓްރެއިލާ އިން ވެސް ވަނީ މިހާރު އުމުރުން 44 އަހަރުގެ ކަންޔޭގެ ވަރަށް ޒުވާން އުމުރުގެ ދުވަސްތަކެއް ވެސް ދައްކާލައިފަ އެވެ.

Step inside the journey of Kanye West, over twenty years in the making.

jeen-Yuhs: A Kanye Trilogy — a once in a lifetime three-week global event — begins February 16 pic.twitter.com/3Ihp6mr7bs
— Netflix (@netflix) January 10, 2022

އެމެރިކާގައި އެންމެފަހުން ބޭއްވި ރިޔާސީ އިންތިހާބުގައި ވެސް ވާދަކުރި ކަންޔޭ އަކީ މިއުޒިކާއި އަމިއްލަ ވިޔަފާރިން ވެސް ވަރަށް ކާމިޔާބު ފަންނާނެކެވެ. އޭނާގެ ބްރޭންޑްތަކުގެ ތެރޭގައި ޔީޒީ އާއި ޑޮންޑާ ހިމެނެ އެވެ. ކަންޔާގެ މިލްކިއްޔާތު 1.8 ބިލިއަން ޑޮލަރަށް އަރަ އެވެ.

ޕްރޮފެޝަނަލް ކެރިއަރުގައި ކާމިޔާބަސް ކަންޔޭގެ ޒާތީ ދިރިއުޅުން އެހާ އޮމާނެއް ނޫނެވެ. އޭނާގެ ހަތަރު ދަރިންގެ މަންމަ ކިމް ކަޑޭޝިއަން އޮތީ މިދިިޔަ އަހަރު ކުރީކޮޅު ކަންޔޭ ގާތުން ވަރިވާން ކޯޓަށް ހުށަހަޅައިފަ އެވެ. ކަންޔޭ މިހާރު ރައްޓެހިވެގެން އުޅެނީ ބަތަލާ ޖޫލިއާ ފޮކްސް، 31، އާ އެވެ.