އިންޑިއާގެ މަޝްހޫރު ލަވަކިޔުންތެރިޔާ، އަދި މިއުޒިކީ ދާއިރާގެ ލެޖެންޑް ލަތާ މަންގޭޝްކަރު މިއަދު ހެނދުނު މަރުވެއްޖެ އެވެ.
އުމުރުން 92 އަހަރުގައި ލަތާ މަރުވީ ކޮވިޑާ އެކު، ނިއުމޯނިއާ ޖެހިގެން ވެންޓިލޭޓަރުގައި ފަރުވާދެމުން އަންނަނިކޮށެވެ. އޭނާ އައިސީޔޫގައި އެޑްމިޓްކުރީ މިދިޔަ މަހު ކުރީކޮޅެވެ.
ބޮލީވުޑްގެ އެތައް ޖީލަކަށް ލަވަތައް ކިޔައިދީފައިވާ ލަތާ އަކީ، މުޅި ދުނިޔެ ވެސް ދަންނަ މަޝްހޫރު ލަވަކިޔުންތެރިއެކެވެ. އޭނާ އަކީ، އިންޑިއާގައި އެންމެ އިހުތިރާމް ލިބިފައިވާ ލަވަކިޔުންތެރިޔާ ވެސް މެ އެވެ.
އިންޑިއާގެ "ރަންއަޑުގެ ވެރިޔާ" ގެ ނަމުން މަޝްހޫރު، އަދި އެ ފަންނާކަކަށްޓަކައި މުޅި އިންޑިއާ ފަހުރުވެރިވާ ލަތާ އަކީ އެތައް ހާސް ލަވައެއް ކިޔާފައިވާ އިންޑިއާގައި އުފެދުނު އެންމެ މޮޅު އެއް އަންހެން ލަވަކިޔުންތެރިޔާ އެވެ.
އޭނާ އަކީ މަޝްހޫރު ލަވަކިޔުންތެރިން ކަމަށްވާ އާޝާ ބޯސްލޭ، 88، އާއި އޫޝާ މަންގޭޝްކަރް، 86، ގެ ދައްތަ އެވެ. އޭނާގެ އެއްބަނޑު އެއްބަފާ ހަތަރު ބެއިން ތިބޭއިރު، އެންމެ ދޮށީ ލަތާ އެވެ.
ލަވަކިޔުމުގެ ދާއިރާ އަށް ލަތާ ނިކުތީ އޭނާގެ އުމުރުން އެންމެ ހަތަރު އަހަރުގައި އަދި އެންމެ ފުރަތަމަ ލަވައެއް ރިކޯޑްކުރީ 1942 ގަ އެވެ. ބައްޕަ ގާތުން ލަވަކިޔަން ދަސްކޮށް، އެންމެ ފުރަތަމަ އޭނާ ލަވަކިޔާ އުޅުނީ ވެސް ބައްޕަ ހަދާ މިއުޒިކަލް ޕްލޭތަކުގަ އެވެ.
ލަތާގެ މިއުޒިކީ ކެރިއަރަށް މިވީ 70 އަހަރުގެ ތެރޭގައި، އެކި ބަސްބަހުން 30،000 އަށް ވުރެ ގިނަ ލަވަ ރިކޯޑު ކޮށްފައިވެ އެވެ. އެންމެ މަޝްހޫރުވެފައި ވަނީ އޭނާގެ ހިންދީ ލަވަތަކެވެ.
އެންމެ ފުރަތަމަ މަޝްހޫރުވި އޭނާގެ ލަވަ އަކީ 1948 ގައި ނިކުތް ފިލްމު "މަޖްބޫރު" އަށް އޭނާ ކިޔާފައިވާ ލަވަ "ދިލް މެރާ ތޯޑާ، މުޖޭ ކަހީ ކާ ނަ ޗޯރާ" އެވެ.
އޭނާގެ އެންމެ މަޝްހޫރު ލަވަތަކުގެ ތެރޭގައި "ހޯޓޯ މެއި އެއިސީ ބާތު"، "ތުޖެ ދޭކާ ތޯ ޔެ ޖާނާ"، "އާޖް ފިރް ޖީނޭ ކާ ތަމަންނާ"، "ޕިޔާ ތޫސޭ"، "ކޯރާ ކާގަޒް ތަ ޔޭ މަން މޭރާ"، "އާޕް ކޭ ނަޒުރޯނެ ސަމްޖާ"، "މޭރާ ސާޔާ ސާތު ހޯންގާ"، "ހަމޭ އޯރް ޖީނޭކީ"، "ޖިޔާ ޖަލޭ" އަދި "ކަބީ ހުށީ ކަބީ ގަމް" ވެސް ހިމެނެ އެވެ. މީގެ އިތުރުން "ލަގް ޖާ ގަލޭ"، "އެކް ޕިޔާރް ކަ ނަގްމާ ހޭ"، އަދި "އަޖީބް ދާސްތާ ހެ ޔޭ" ކަހަލަ ލަވަތަކަކީ، މިހާރު ވެސް ބާވުމެއް ނެތް ކުރީގެ ލަވަތަކެވެ.
ގައުމީ އެވޯޑްތައް
އިންޑިއާގެ ސަރުކާރުން ދޭ ވަރަށް ބައިވަރު ގައުމީ އެވޯޑުތައް ވެސް ލަތާ އަށް ލިބިފައިވެ އެވެ؛
- އިންޑިއާ ސަރުކާރުން އާންމުންނަށް ދޭ ތިން ވަނަ އަށް އެންމެ ޝަރަފުވެރި އެވޯޑް، ޕަދުމާ ބުޝަން 1969 ގައި ލިބުނު.
- އިންޑިއާ ސަރުކާރުން އާންމުންނަށް ދޭ ދެ ވަނަ އަށް އެންމެ ޝަރަފުވެރި އެވޯޑް، ޕަދުމާ ވިބުޝަން 1999 ގައި ލިބުނު.
- އިންޑިއާގެ ސަރުކާރުން އާންމުނަށް ދޭ އެންމެ މަތީ ޝަރަފުގެ އެވޯޑް، ބާރަތު ރަތުނާ 2001 ގައި ލިބުނު
ފްރާންސްގެ ސަރުކާރުން ދޭ އެންމެ މަތީ ޝަރަފުގެ އެވޯޑް ކަމަށް، އޮފިސާ އޮފް ދި ލީޖަން އޮފް އޮނާގެ އެވޯޑް ވެސް 2009 ގައި ލަތާ އަށް ލިބުނެވެ.
މިއުޒިކީ ދާއިރާއިން ލިބުނު އެވޯޑްތައް
- އިންޑިއާގެ ނޭޝަނަލް ފިލްމު އެވޯޑުގައި ތިން އެވޯޑެއް ލިބުނު.
- ބެންގަލް ފިލްމް ޖާނަލިސްޓްސް އެސޯސިއޭޝަންގެ އެވޯޑުގައި 15 އެވޯޑެއް ލިބުނު.
- ފިލްމުފެއާގައި ހަތަރު ފަހަރެއްގެ އެންމެ މަތިން އެންމެ މޮޅު ލަވަކިޔުންތެރިޔާގެ އެވޯޑް ލިބުނު.
- ފިލްމުފެއާގެ ހާއްސަ އެވޯޑެއް ދެ ފަހަރެއްގެ މަތިން ލިބުނު އިރު، ލައިފްޓައިމް އެޗީވްމަންޓް އެވޯޑް ވެސް ލިބުނު.
އިނގިރޭސިވިލާތުގައި ލަންޑަންގައި ހުންނަ ވަރަށް މަޝްހޫރު ތިއޭޓަރެއް ކަމަށްވާ، ރޯޔަލް އެލްބާޓް ހޯލްގައި އެންމެ ފުރަތަމަ ފާފޯމްކުރި އިންޑިއާގެ ލަވަކިޔުންތެރިޔާގެ ޝަރަފު، 1974 ގައި އޭނާ އަށް ލިބުނެވެ.
ލަވަކިޔުމުގެ އިތުރުން ލަތާ ވަނީ މިއުޒިކް ކޮމްޕޯޒްކުރުމާއި ޑައިރެކްޓުކުރުމާއި އަދި ޕްރޮޑިއުސަރެއްގެ ގޮތުގައި ވެސް މަސައްކަތްކޮށްފަ އެވެ.
