ބެޒޯސްއާ އެކު ޖައްވަށް ދާ ދުވަސްވީ މީހާ އަކީ ކާކު؟

މަހުޖަނު ޖެފް ބެޒޯސް މި މަހުގެ 20 ގައި ޖައްވީ ދަތުރަށް ފުރާ އިރު، އެ ދަތުރުގައި ބައިވެރިވާ އެކަކީ 82 އަހަރުގެ އަންހެނެކެވެ. ވެލީ ފަންކް އަށް އެ ފުރުސަތު ދިންކަން އިއުލާންކުރީ މިދިޔަ ހުކުރު ދުވަހު އެވެ. މިއާ އެކު އޭނާ އަށް ވަރަށް ގިނަ ބައެއްގެ ސަމާލުކަން ވަނީ ހުއްޓިފަ އެވެ. ސަބަބަކީ އެހާ ދުވަސްވީ މީހަކު ޖައްވީ ދަތުރަތަކަށް ދާތީ އެވެ.

ތާރީހުގައި އޭނާގެ ވާހަކަ ލިޔެވޭނީ ވެސް ޖައްވީީ ދަތުރަކަށް ދިޔަ އެންމެ ދުވަސްވީ މީހާގެ ގޮތުގަ އެވެ. މި ޝަރަފު ލިބޭތީ ވެލީ ހުރީ ވަރަށް އުފަލުންނެވެ. އެމެރިކާގެ ޓެކްސަސްގައި މިހާރު ދިރިއުޅެމުން އަންނަ މި މީހާ ބުނި ގޮތުގައި މިހާރު ހުރީ ދަތުރަށް ފުރަން ކެތްމަދުވެފަ އެވެ.

ބެޒޯސްގެ ދަތުރުން ވެލީ އަށް ފުރުސަތު ލިބުނު އިރު އޭނާ އަކީ ޖައްވީ ގިނަ ތަމްރީނުތަކެއް ހަދައި އޭވިއޭޝަން ދާއިރާގައި ވެސް ގިނަ މަސައްކަތްތަކެއްކޮށްފައިވާ ތަޖުރިބާކާރެކެވެ. އެހެންވެ ބެޒޯސްގެ ބްލޫ އޮރިޖިންގެ "ނިއު ޝެފާޑް" ގައި ވެލީ ދަތުރުކުރާނީ އެކަމުގެ ފުރަހަމަ ތަމްރީނާއި ތަޖުރިބާ އާއި ސިއްހީ ގޮތުން ވެސް ފުރިހަމަ ހާލާ އެކީގަ އެވެ. އޭގައި ކަންބޮޑުވާން ޖެހޭ އެއްވެސް ވަރުގެ ކަމެއް ނެތެވެ.

ވެލީ އެންމެ ފުރަތަމަ ޖައްވީ ޓްރެއިނިންތަކެއް ހެދީ 1960 ގެ އަހަރުތަކުގެ ތެރޭގަ އެވެ. އެ ދުވަސްވަރު "މާކިއުރީ 13" ގެ ދަށުން 1961 ގައި ބޭއްވި ވިމެން އިން ސްޕޭސް ޕްރޮގްރާމްގައި ބައިވެރިވެގެން ކޯހުގެ އެއް ވަނަ ވެސް ހޯދާފައިވެ އެވެ. އެކަމަކު ޖައްވީ ދަތުރަކަށް ނުކުންނާނެ ފުރުސަތެއް ނުލިބި "މާކިއުރީ 13" ވަކި ހިސާބަކުން ހުއްޓައިލުމުން، ޖައްވަށް ދާން ވެލީ ދުށް ހުވަފެން މިހާތަނަށް އޮތީ ހަގީގަތަކަށް ނުވެ އެވެ. އެކަމަކު ދުނިޔޭގެ ދެވަނަ އަށް އެންމެ މުއްސަނދި މީހާ އެމެޒޯން ކުންފުނީގެ ވެރިޔާ ވެލީ އަށް ދިނީ އާދައިގެ ހަދިޔާއެއް ނޫނެވެ.

ނިއު މެކްސިކޯ އަށް އުފަން ވެލީ މިހާތަނަށް އޭވިއޭޝަން ދާއިރާގައި ކޮށްފައިވާ ތަޖުރިބާތަކަށް ބަލާ އިރު ކެރިއަރުގައި މިހާތަނަށް 19،600 ގަޑިއިރުގެ ފްލައިޓް ފުރިހަމަކޮށްފައިވެ އެވެ. އަދި އުދުހުމުގެ ދާއިރާ އިން 3،000 އަށް ވުރެ ގިނަ މީހުން ތަމްރީނުކޮށްފައިވެ އެވެ. މިހާރު ވެސް އޭނާ އަކީ އިންސްޓްރަކްޓަރެކެވެ.

ވެލީ އަކީ ނެޝަނަލް ޓްރާންސްޕޯޓް ސޭފްޓީ ބޯޑް (އެންޓީބީއެސް) ގެ ފުރަތަމަ އަންހެން އެއާ ސޭފްޓީ އިންވެސްޓިގޭޓަރެވެ. އަދި އެމެރިކާގެ އޭވިއޭޝަން ދާއިރާގެ މައި އިދާރާ ފެޑެރަލް އޭވިއޭޝަން އެޑްމިނިސްޓްރޭޝަން (އެފްއޭއޭ) ގެ ފުރަތަމަ އަންހެން އިންސްޕެކްޓަރަކީ ވެސް ވެލީ އެވެ.

ބެޒޯސްއާ އެކު ހިލޭ ޖައްވީ ދަތުރަށް ނުކުންނަން ފުރުސަތު ލިބުނު އިރު ފާހަގަކޮށްލެވޭ ކަމަކީ މި ދަތުރުގެ ކުރިން މިހާރު ދަތުރަށް ފުރަން ނިންމިކަން އިއުލާންކުރި އިނގިރޭސި މަހުޖަނު ރިޗަޑް ބްރޭންސަންގެ ކުންފުނި ވާޖިން ގެލެކްޓިކުން ޓޫރިސްޓުންގެ ގޮތުގައި މީހުން އުފުލަން އިއުލާންކުރި ޕްރޮގްރާމްގައި ވެލީ ޓިކެޓެއް ގަަނެފައި އޮތް ކަމެވެ. އެއީ 2010 ގަ އެވެ. އެކަމަށް އޭނާ 200،000 ޑޮލަރު ހޭދަކުރި އެވެ.

ބްރޭންސަންގެ ދަތުރު އޮތީ މި މަހުގެ 11 ގަ އެވެ. އޭނާ ވިދާޅުވި ގޮތުގައި އެ ދަތުރުން އެނބުރި ވަޑައިގެން ޖައްވަށް ޓޫރިސްޓުން އުފުލުމާ ބެހޭ ގޮތުން އުފާވެރި ޚަބަރުތަކެއް ދެއްވާނެ އެވެ.