ނިއުގެ ކޯޗަކަށް އަނެއްކާ ވެސް ކަވަޒޮވިޗް

ކަވަޒޮވިޗް މިދިޔަ ސީޒަނުގެ މެޗެއްގައި ކޯޗުކޮށްދެނީ. --ފޮޓޯ: ނިއު ރޭޑިއަންޓް

މުހައްމަދު ހަމްދޫން، މިހާރު

03 ސެޕްޓެމްބަރ 2016 - 14:18

ނިއު ރޭޑިއަންޓް ސްޕޯޓްސް ކްލަބުގެ ކޯޗަކަށް އެ ޓީމަށް މިދިޔަ ސީޒަނުގެ އުރީދޫ ދިވެހި ޕްރިމިއާ ލީގު ކާމިޔާބުކޮށްދިން ސާބިއާގެ ނިކޮލާ ކަވަޒޮވިޗް ހަމަޖައްސައިފި އެވެ.

ނިއު އިން ސީޒަނުގެ މެދުތެރެއިން ކޯޗެއް ހަމަޖެއްސީ، ނަތީޖާ ދަށްވުމާ ގުޅިގެން ބަލްގޭރިއާގެ ޔޮރްދާން ސްޓޮއިކޯފް އިވަނޯފް މިދިޔަ މަހު މަގާމުން ވަކިކުރުމަށް ފަހު އެވެ. އެންމެ ފަހުން ކުޅުނު ދެ މެޗުގައި ނިއު އަށް އިރުޝާދު ދިނީ އެސިސްޓަންޓް ކޯޗު އަދި ކުރީގެ ކެޕްޓަން އަޝްރަފް ލުތުފީ (ސަމްޕަތު) އެވެ. ލީގުގެ ފަހު ބުރުގެ ހަ މެޗު ބާކީ އޮތް އިރު ނިއު އޮތީ 16 ޕޮއިންޓާ އެކު ލީގުގެ ހަ ވަނައިގަ އެވެ. ސީޒަނުގައި ދެން އޮތީ އެފްއޭ ކަޕާއި ގައުމީ މުބާރާތެވެ.

ނިއުއާ ހަވާލުވާން ކަވަޒޮވިޗް މިއަދު ހެނދުނު ރާއްޖެ އައިސްފައިވާއިރު، އޭނާ ހުރީ އެފްއޭއެމުން ދީފައިވާ ސަސްޕެންޝަނެއްގަ އެވެ. މިދިޔަ ސީޒަނުގެ ލީގުގެ މެޗަކަށް ފަހު ރެފްރީންނާއި އެފްއޭއެމް އަށް ފާޑުކިޔުމާ ގުޅިގެން ކޮށްފައިވާ މި ސަސްޕެންޝަނުގެ އިތުރު ތަފްސީލެއް ލިބިފައެއް ނުވެ އެވެ. އެކަމާ ބެހޭގޮތުން ނިއު އިން ރަސްމީކޮށް އެއްޗެއް ނުބުނެ އެވެ.

ކަވަޒޮވިޗް މިދިޔަ ސީޒަނުގެ ލީގުގެ އައްޑަނަ އުފުލާލަނީ. --ފޮޓޯ: ނިއު ރޭޑިއަންޓް

ވިކްޓަރީން ވެސް ކޯޗުކަމުން މުހައްމަދު ނަޒީހު ވަކިކުރުމަށް ފަހު ކަވަޒޮވިޗް ގެންނަން ދާދި ފަހުން ނިންމި އެވެ. އެކަމަކު ސަސްޕެންޝަނެއްގައި ހުރުމުން އޭނާ ނުގެނެސް، ވިކްޓަރީން ގެނައީ ވެލެންސިއާގެ ކުރީގެ ކޯޗު ހަންގޭރީގެ ލާސްލޯ ކިސް އެވެ.

ނިއު އިން މިދިޔަ ސީޒަނުގައި ކަވަޒޮވިޗް ގެނައީ ގައުމީ މުބާރާތުގެ ފައިނަލުން މާޒިޔާ އަތުން ބަލިވުމުން ކޯޗުކަމުން ސޮބާހް މުހައްމަދު ވަކިކުރުމަށް ފަހު އެވެ. ލީގުގެ ފުރަތަމަ ބުރުގެ ފަހު މެޗާ ހަމައިން ނިއުއާ ހަވާލުވެ އޭނާ ވަނީ އެ ޓީމުގެ ކުޅުން ރަނގަޅުކޮށް ލީގު ކާމިޔާބުކޮށްދީފަ އެވެ.

"އޭނާ ގެންނަން ނިންމީ ދިވެހި ފުޓްބޯޅަ އާއި ކްލަބް ރަނގަޅަށް ދަންނަ މީހަކަށްވާތީ،" ނިއުގެ އޮފިޝަލަކު ބުންޏެވެ.

ކަވަޒޮވިޗް ވަނީ މީގެ ކުރިން ތަޖިކިސްތާނާއި ސްރީ ލަންކާގެ ގައުމީ ޓީމަށް ކޯޗުކޮށްދީފަ އެވެ. އަދި އޭނާ ވަނީ 2012 ވަނަ އަހަރުގެ އޭއެފްސީ ޕްރެޒިޑެންޓް ކަޕް ތަޖިކިސްތާނުގެ އިސްތިގޯލް ޑުޝާންބޭ އަށް ކާމިޔާބުކޮށްދީފަ އެވެ. އޭނާ ނިއު އިން ވަކިވުމަށް ފަހު މި އަހަރު ހަވާލުވީ ލާއޯސްގެ ލަނެގަންގް ޔުނައިޓެޑާ އެވެ. އެ ކްލަބާ އެކު ކާމިޔާބު ޕްރީ ސީޒަނެއް ހޭދަކުރި ނަމަވެސް އާއިލާ ސަބަކާ ހެދި އޭނާ ވަނީ ސީޒަން ފެށުމުގެ ކުރިން ކްލަބުން ވަކިވެފަ އެވެ.