ތައިސޭކޮށި ކައިރިން ހުސްބިމެއް ސަރުކާރަށް ނަގަނީ

މާލެ ސިޓީ ކައުންސިލްގެ ބެލުމުގެ ދަށުގައި އޮންނަ "ތައިސޭ ކޮށި" ހިމެނޭ ސަރަހައްދުގައި އޮންނަ ހުސްބިމެއް ދައުލަތަށް ނަގަން ސަރުކާރުން ނިންމައިފި އެވެ.

ތައިސޭ ކޮށްޓަކީ ބޮޑުތަކުރުފާނުމަގާ ގުޅޭގޮތުން، މާލޭގެ އިރުދެކުނު ފަރާތުގައި ކުރީގެ މާލެ ޖަލާއި ކައުންސިލްގެ ފުޓުބޯޅަ ދަނޑު ކައިރީ އޮންނަ ކައުންސިލްގެ އާންމު ހިދުމަތްތަކާ ބެހޭ ބައެވެ.

ސަރުކާރުގެ އިސް އޮފިޝަލަކު ވިދާޅުވީ، ދައުލަތަށް ނަގަން ނިންމީ ތައިސޭކޮށި ކައިރީގައި އޮންނަ ހުސްބިމެއް ކަމަށެވެ. އަދި އެއީ ސިޓީ ކައުންސިލާ ބެހޭ ތަނެއް ނޫން ކަމަށް ވިދާޅުވި އެވެ.

ހައުސިން މިނިސްޓްރީން މިއަދު ވަނީ ކައުންސިލްގެ 14 ބިމެއް ދައުލަތަށް ނަގަން ނިންމައިފަ އެވެ. 

ކައުންސިލުން މިދިޔަ އަހަރު ވަނީ ތައިސޭ ކޮށީގެ ބިން އެއްކޮށް ސާފުކޮށް، ތަނުގެ ގޮނޑުކަން ފިލުވައިފަ އެވެ. އެހެންވެ އެ ތަނުން ރަނގަޅު ބިމެއް ހެދިފައިވާތީ އެ ބިމުން އާމްދަނީ ލިބޭނެ ގޮތެއް ހެދުމަށް އަގަށް ބަލައި، ހުނަރުވެރި ޒުވާނުންނަށް ކުއްޔަށް ދޫކުރަން ވެސް ކައުންސިލުން މިދިޔަ އަހަރު ވަނީ ފަށައިފަ އެވެ.

ހައުސިން މިނިސްޓްރީން އެ ބިންތައް ނަގަން ނިންމުމަށްފަހު ބުނީ އެއީ މާލެއާއި ވިލިމާލޭގެ އާބާދީއަށް ބޭނުންވާ ތަރައްގީގެ މަސައްކަތްކުރުމަށާއި އިންފްރާސްޓްރަކްޗާގެ ހިދުމަތް ދިނުމަށްޓަކައި ނިންމި ނިންމުމެއް ކަމަށެވެ.

އެކަމާ ގުޅޭ އެއްވެސް ޝަކުވާއެއް ނުވަތަ ހިޔާލެއް އޮތް ނަމަ މިއަދުން ފެށިގެން 14 ދުވަހުގެތެރޭގައި ހައުސިން މިނިސްޓްރީއަށް ހުށަހަޅަން ވެސް މިނިސްޓްރީން ވަނީ އެދިފަ އެވެ.

ތަރައްގީގެ މަޝްރޫއުތަކުގެ ބޭނުމަށް ކެބިނެޓުން ކަނޑައަޅައިފި ހިނދެއްގައި ރަށްރަށުގެ ބިންތައް ސަރުކާރަށް ނެގޭ ގޮތަށް ލާމަރުކަޒީ ގާނޫނަށް އިސްލާހު ގެނައީ މިދިޔަ މަހު އެވެ.

ބިލުގައި ވާ ގޮތުން، ކައުންސިލެއްގެ ބިމެއް ސަރުކާރަށް ނަގަން ކެބިނެޓުން ނިންމިޔަސް، އެކަމުގައި ކައުންސިލާ މަޝްވަރާކުރަން ޖެހެ އެވެ. ގާނޫނަށް ގެނައި އެ ބަދަލުގައިވާ ގޮތުން ކައުންސިލެއްގެ ބިމެއް ނަގަން ކެބިނެޓުން ނިންމާ އިރު ގިނަ ކަންތައްތަކެއް ފުރިހަމަކުރަން ޖެހެ އެވެ.

ވަކިކުރާ ބިމުގައި ކައުންސިލުން ނުވަތަ އެހެން ފަރާތަކުން އިންވެސްޓްމެންޓެއް ކޮށްފައިވާ ނަމަ ފިނޭންސް މިނިސްޓްރީ އަށް ހުށަހަޅައި އެކަށީގެންވާ ބަދަލު ލިބެން ޖެހޭ ގޮތް ގާނޫނަށް ގެނައި އާ އިސްލާހުން ފަހިކޮށްފައިވެ އެވެ.