އަންނަ ނޮވެމްބަރުގައި ވޯޓެއް ނަގައި ނިޒާމް ބަދަލުކުރަން ޕާޓީތަކުން އެއްބަސް: ނަޝީދު

ރާއްޖޭގެ ވެރިކަން ބަރުލަމާނީ ނިޒާމަކަށް ފުރޮޅާލުމާ މެދު ރައްޔިތުންގެ ހިޔާލު ހޯދުމުގެ ވޯޓެއް އަންނަ ނޮވެމްބަރު މަހުގެ ތެރޭގައި ނަގަން ސިޔާސީ ޕާޓީތަކަށް އެއްބަސްވެވޭ ކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.

ސިޔާސީ ގޮތުން ދެން ކުރައްވާނެ ހުރިހާ ކަމެއްގެ އަމާޒަކީ ބަރުލަމާނީ ނިޒާމް ގެންނެވުން ކަމަށް މި ފަހުން ނަޝީދު ވަނީ ވިދާޅުވެފަ އެވެ. މި ވާހަކައަށް ބާރު ދެއްވައި ވާހަކަ ދައްކަވަމުން ގެންދެވުމަށް ފަހު، އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ފޮނުއްވި މެސެޖެއްގައި އެކަމަށް ހުރަހެއް ނެތް ކަމަށް ދޭހަވާ ގޮތަށް ވަނީ ވާހަކަ ދައްކަވައިފަ އެވެ.

ނަޝީދު އެ މެސެޖުގައި ވިދާޅުވީ ބަރުލަމާނީ ނިޒާމެއް ގެނައުމާ މެދު ފެންނަ ނުފެންނަ ވޯޓެއް ނަގާނީ އަންނަ އަހަރުގެ ނޮވެމްބަރުގައި ކަމަށެވެ. އެކަމަކު ނިޒާމަށް ވެރިކަން ބަދަލުކުރާނީ ރިޔާސީ އިންތިހާބު އޮންނަ 2023 ވަނަ އަހަރުގައި ކަމަށް އެ މެސެޖުގައި ވިދާޅުވި އެވެ.

މިއީ ޕާޓީތަކުން އެއްބަސްވާ ވިސްނުމެއް ކަމަށް ނަޝީދު ވިދާޅުވިޔަސް ވެރިކަން ކުރާ ކޯލިޝަންގައި ހިމެނޭ އަދި ބަރުލަމާނީ ނިޒާމު ގެނައުމާ ގުޅޭ ގޮތުން ބައްދަލުކުރެއްވި އެއްވެސް ޕާޓީއަކުން މިހާ ތަފްސީލްކޮށް ވާހަކަ ދެކެވުނު ކަމަކަށް އާއްމުކޮށްފައެއް ނުވެ އެވެ.

ނަޝީދު ވިދާޅުވީ 2023 ގައި ބަރުލަމާނީ ނިޒާމުގެ މަސައްކަތް ފަށަން ބޭނުންފުޅުވާ އެއް ސަބަބަކީ ރިޔާސީ އިންތިހާބުގައި ރައީސް އިބްރާހިމް މުހައްމަދު ސޯލިހްއާ ވާދަކުރައްވަން ބޭނުން ނުވުމެވެ.

"ބޭފުޅުން ވިސްނަވާ. ރައީސުލްޖުމްހޫރިއްޔާ އާއި އަޅުގަނޑާ ވާދަކުރާ ޕްރައިމަރީއެއް ނުވަތަ އިންތިހާބަކަށް ވުރެން މި ގޮތް ރަނގަޅުވާނެ ކަމަށް ފެންނަނީ." ނަޝީދު ވިދާޅުވި އެވެ.

"މިކަމުގައި ގައުމީ މަޖިލީސް ބައިބައި ނުވުން ވަރަށް އެދެން. ފުންކޮށް ވިސްނާލީމަ މިއީ ޕާޓީއަށާއި ރާއްޖެއަށް އެންމެ ރަނގަޅު ގޮތް ކަމަށް ފެނޭ."

ނަޝީދު ބޭނުންފުޅު ވަނީ ބަރުލަމާނީ ނިޒާމަކަށް ވެރިކަން ބަދަލުކޮށް ބޮޑުވަޒީރަކަށް ވެވަޑައިގަތުމަށެވެ. މި ފުރުސަތު އެމަނިކުފާނަށް ދެއްވަން ރައީސް ސޯލިހް ގާތު އެދިވަޑައިގަތެވެ. އެކަމަކު އެމަނިކުފާނު ކުރިން ވިދާޅުވަމުން ގެންދެވީ ނިޒާމް ބަދަލުކުރުމުގައި ގޮތް ނިންމާނީ ރައްޔިތުން ކަމަށާއި އެމަނިކުފާނު އިސްކަން ދެއްވާނީ ވައުދުތައް ފުއްދަވަން ކަމަށެވެ.

މި ޖަވާބުގައި ރައީސް ހިފެހެއްޓެވެމުން ދެ ބޭފުޅުންގެ މެދުގައި ހިޔާލުތަފާތުވުން ބޮޑުވެ ސިޔާސީ ގޮތުން އެކުގައި މަސައްކަތް ނުކުރެއްވޭނެ ކަން ވެސް ނަޝީދު އިއުލާންކުރެއްވި އެވެ. އެކަމަކު އަވަހާރަކޮށްލަން ދިން ބޮމުގެ ހަމަލާއަށް ފަހު ބޭސްފަރުވާ އަށް ފަސް މަސް ދުވަހު ބޭރުގައި އުޅުއްވުމަށް ފަހު ރާއްޖެ ވަޑައިގެން ރައީސްއާ ބައްދަލުކުރައްވައި ބަރުލަމާނީ ނިޒާމު ގެންނެވުމުގެ މަޝްވަރާތައް ކުރެއްވި އެވެ.

އެ ބައްދަލުވުމަށް ފަހު ނަޝީދު ވިދާޅުވެފައި ވަނީ ރާއްޖޭގެ ވެރިކަމުގެ ނިޒާމު ބަދަލުކުރުމާ ގުޅޭ ގޮތުން އުފެދިފައިވާ ބަހުސަށް ހައްްލެއް ހޯދުމަށާއި ގާނޫނުއަސާސީއަށް ބަަދަލުތަކެއް ގެނައުމުގެ މަޝްވަރާތައް ކުރިއަށް ގެންދަން، ރައީސް އިބްރާހީމް މުހައްމަދު ސޯލިހު ލަފާ ދެއްވި ކަމަށެވެ.

ސިޔާސީ ހުރިހާ ޕާޓީއަކާ އަދި ބައްދަލެއް ނުކުރައްވާ

ބަރުލަމާނީ ގެނައުމަށް ސިޔާސީ ހުރިހާ ޕާޓީއަކުން އެއްބަސްވާ ކަމަށް ނަޝީދު ވިދާޅުވިއަސް މިކަމުގައި އެމަނިކުފާނުގެ ބައްދަލުވުން ސިޔާސީ ހުރިހާ ޕާޓީއަކާ އެކު ކުރިއަކަށް ނުގެންދަވަ އެވެ.

ރައީސްއާ އެކު ކުރެއްވި މަޝްވަރާތަކަށް ފަހު ބަރުލަމާނީ ނިޒާމު ގެނައުމާ ގުޅޭ ގޮތުން ނަޝީދު ވަނީ ސިޔާސީ ބައެއް ޕާޓީތަކާ ބައްދަލުކުރައްވައިފަ އެވެ. ފުރަތަމަ މަޝްވަރާ ބައްދަލުވުން އިދިކޮޅު ޕީޕީއެމާއި ޕީއެންސީ ބޭފުޅުންނާ އެކު ބޭއްވިޔަސް ކުރީގެ ރައީސް އަބްދުالله ޔާމީން ޖަލަށް ލުން ބޭއިންސާފު ކަމަށް ވިދާޅުވެ ސިޔާސީ ވާހަކަ ދައްކަވަން ދެކޮޅު ހެއްދެވީ އެވެ.

އޭގެ ފަހުން ނަޝީދު ވަނީ މި ވެރިކަމުގައި ހިމެނޭ ކޯލިޝަން އެއް ލީޑަރު، ޖުމްހޫރީ ޕާޓީގެ ރައީސް ގާސިމް އިބްރާހިމްއާ ބައްދަލުކުރައްވައިފަ އެވެ. ބަރުލަމާނީ ނިޒާމާ ދެކޮޅަށް އަބަދުވެސް ވާހަކަ ދައްކަވާ ގާސިމްއާ އެކު ބޭއްވި ބައްދަލުވުމުގެ ތަފްސީލެއް އެ ޕާޓީއަކުން މިހާތަނަށް އާއްމެއް ނުކުރެ އެވެ.

ނަޝީދު ވަނީ މި ފަހުން އުފެދުނު މޯލްޑިވްސް ނެޝަނަލް ޕާޓީ (އެމްއެންޕީއާ) ވެސް ބަރުލަމާނީ ނިޒާމާ ގުޅޭ ގޮތުން ވާހަކަ ދައްކަވައިފަ އެވެ. އަދާލަތު ޕާޓީއާ އެކު މިހާތަނަށް ބައްދަލުވުމެއް ނުބޭއްވިޔަސް ބަރުލަމާނީ މަޝްވަރާއަށް އެ ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ ވަނީ ފެހި ސިގްނަލް ދެއްވައިފަ އެވެ. އެކަމަށް ނަޝީދު މިރޭ ވަނީ މަރުހަބާ ވެސް ވިދާޅުވެފަ އެވެ.

ސިޔާސީ ބައެއް ޕާޓީތަކުގެ ވެރިންނާ ބައްދަލުކުރެއްވުމަށް ފަހު ނަޝީދު ވިދާޅުވެފައި ވަނީ އެ މަސައްކަތް ކުރައްވަނީ ގާނޫނުއަސާސީއަށް ބަދަލުތައް ގެންނަން އެދި އެކި ފަރާތްތަކަކުން މަޖިލީހަށް ހުށަހަޅަމުން ގެންދާތީ ކަމަށެވެ.

ނަޝީދު ވިދާޅުވީ ގާނޫނުއަސާސީއަށް އިސްލާހެއް ގެނައުމަކީ ހުރިހާ ސިޔާސީ ޕާޓީތަކެއް އެކުވެގެން ކުރެވޭ މަސައްކަތަކަށް ވުމަކީ ރައްޔިތުންނަށް އޭގެ އެންމެ ހެޔޮ ނަތީޖާ ނުކުންނާނެ ގޮތް ކަމަށް ދެކެވަޑައިގަންނަވާ ކަމަށެވެ. މިހާރު އަމަލުކުރަމުން އަންނަ ގާނޫނުއަސާސީއަަށް އަމަލުކުރުމުގައި ހުރި ދަތިތައް އެންމެނަށް ވެސް މިހާރު ފެންނަމުންދާ ކަމަށް ވެސް އެ މަނިކުފާނު ވިދާޅުވެފައިވެ އެވެ. "ޕާޓީތަކާ ބައްދަލުކުރި އެންމެ ބޮޑު އެއް ސަބަބަކީ އެކިއެކި ފަރާތްތަކުން، ގާނޫނުއަސާސީއަށް އިސްލާހު ގެނައުމަށް އެދި މަޖިލީހުގެ އިދާރާއަށް އެބަ ހުށަހަޅާ އަދި މަޖިލީހުގެ އިދާރާގައި އެބަ އެދޭ. ޖުޑިޝަލް ސާވިސް ކޮމިޝަން އެކުލެވިގެންވާ ގޮތް ބަދަލުކުރުމަށް ހުށަހެޅުމެއް އެބަވޭ،" ނަޝީދު ވިދާޅުވި އެވެ.

ރާއްޖޭގެ ވެރިކަމުގެ ނިޒާމް ކަނޑައެޅުމަށް އޮގަސްޓް، 18، 2007 ގައި ނެގި ސިއްރު ވޯޓުގައި ރިޔާސީ ނިޒާމަށް 95،619 މީހުން ވޯޓު ދިނެވެ. ބަރުލަމާނީ ނިޒާމަކަށް ވޯޓު ދިނީ 58،504 މީހުންނެވެ.