"މިނިވަންކަމުގެ ދިފާއުގައި އިދިކޮޅު ދެ ޕާޓީ، ޕީޕީއެމް/ޕީއެންސީން މާލޭގައި ބޮޑު ހިނގާލުމެއް މިއަދު ބާއްވައިފި އެވެ.
މިއަދު ހަވީރު 4:00 ގައި މި ހިނގާލުން ފެށީ އިދިކޮޅު ކޯލިޝަންގެ އޮފީހުގެ ދޮރުމަތިންނެވެ. އެ ހިނގާލުމުގައި ބައިވެރިވުމަށް ރަތް ކުލައިގެ ޓީޝާޓާއި ގައުމީ ދިދަތައް ހިފައިގެން ގިނަ އަދަދެއްގެ އިދިކޮޅު ސަޕޯޓަރުން ބައިވެރިވި އެވެ.
އެ ހިނގަލުމުގައި އިދިކޮޅު ފަރާތްތަކުން ގޮވާލީ ރާއްޖޭގައި ތިބި އިންޑިޔާ ސިފައިން ބޭލުވުމަށެވެ. އަދި އައްޑޫގައި ހަދާ ޕޮލިސް އެކެޑެމީގެ މައްޗަށް އިންޑިޔާގެ ނުފޫޒު އޮތް ކަމަށާއި ދެ ހެލިކޮޕްޓަރު ދުއްވުން ވެސް ދިވެހި ސިފައިންނާ ހަވާލު ކުރުމަށް އެ ހިނގާލުމުގައި ވަނީ ގޮވާލައިފަ އެވެ.
އިންޑިޔާ ސިފައިންނާ ދެކޮޅަށް އެ ހަރަކާތް ކުރިޔަށް ގެންދިޔައީ މާލޭ ސިޓީ ކައުންސިލުން ހުއްދަ ދީފައިވާ މަގުތަކުގަ އެވެ. އެހެންވެ ފުލުހުން އެ ހިނގާލުމަށް ހުރަހެއް ނާޅަ އެވެ. ފުލުހުން ވަނީ ހިނގާލުމުގެ ބައިވެރިންނަށް ޖާގަ ދީ ޓްރެފިކް ބަލަހައްޓައިފަ އެވެ.
އިރުއޮއްސި 6:00 ޖަހާއިރު ނިންމާލި އެ ހަރަކާތަކީ ސިޔާސީ މަސައްކަތެއް ނޫން ކަމަށް އިދިކޮޅު ކޯލިޝަންގެ އިސް ބޭފުޅުން ބުނެ އެވެ. އެ ހަރަކާތުގައި ބައިވެރިވުމަށް ސަރުކާރު ކޯލިޝަންގައި ހިމެނޭ ޕާޓީތަކަށް ވެސް ވަނީ ދައުވަތު ދީފަ އެވެ. ނަމަވެސް އެއްވެސް ޕާޓީއަކުން އެ ދައުވަތެއް ގަބޫލެއް ނުކުރެ އެވެ.
އިދިކޮޅު ފަރާތްތަކުން އަންނަނީ އެކި ހަފްލާތަކުގައި އިންޑިޔާ ސިފައިން ތިބުމާ ދެކޮޅަށް އަޑު އުފުލަމުންނެވެ.