މީގެ ހަތަރު އަހަރު ކުރިން ކަނޑުމަތީގައި ކުޑަކުދިންގެ ހިޔާގެ ކުދިންތަކެއްގެ އަތުގައި ބިޑި އެޅުވި މައްސަލައިގައި 13 ފުލުހަކަށް ދައުވާ ކުރުމަކީ ކުޑަކުދިންގެ މައްސަލަތައް ތަހުގީގު ކުރުމުގައި ފުލުހުންނަށް ދަތިވާނެ ކަމެއް ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުއްޖެ އެވެ.
ވިލިމާލޭގައި ހުންނަ ކުޑަކުދިންގެ ހިޔާ މަރާމާތު ކުރަން އެތާނގެ ކުދިންތަކެއް ގޮވައިގެން ތުލުސްދު އަށް ކޭމްޕަކަށް ގެންދިޔުމުގެ ތެރޭގައި އެ ކުދިން ކޮންޓްރޯލު ކުރަން ކަނޑުމަތީގައި ފުލުހުންތަކެއް އެ ކުދިންގެ އަތުގައި ބިޑި އެޅުވި މައްސަލަ ހިއުމަން ރައިޓްސް ކޮމިޝަނުން ތަހުގީގުކޮށް ދައުވާ ކުރަން ފޮނުވުމުން 13 ފުލުހެއްގެ މައްޗަށް ޕީޖީ އޮފީހުން ވަނީ ދައުވާކޮށްފަ އެވެ.
މިއަދު ހަވީރު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމުގައި މި މައްސަލައާ ގުޅިގެން ކުރި ސުވާލަކަށް ޖަވާބު ދެއްވަމުން ސީޕީ ހަމީދު ފާހަގަކުރެއްވީ ކުޑަކުދިންގެ ރައްކާތެރިކަމާ ގުޅުންހުރި މައްސަލަތައް ބެލުމުގައި މިހާރު ވެސް ގޮންޖެހުންތައް އެބަހުރި ކަމެވެ.
އެފަދަ މައްސަލަތައް ތަހުގީގު ކުރުމުގައި ރާއްޖޭގައި ތިބި އެންމެ ތަޖުރިބާކާރު މީހުންނަށް މިހާރު ދައުވާ ކޮށްފައިވާކަން ފާހަަގަކުރައްވައި، އޭނާ ވިދާޅުވީ އެ މީހުންނަށް ދައުވާ ކުރުމަކީ ފުލުހުންގެ މަސައްކަތަށް ދަތިވާނެ ކަމެއް ކަމަށެވެ.
މި ފުލުހުންނަކީ ރާއްޖޭގައި ކުޑަކުދިންގެ ރައްކާތެރިކަމާ ގުޅުންހުރި މައްސަލަތައް ތަހުގީގު ކުރުމުގެ އެންމެ ތަޖުރިބާ ހުރި ފުލުހުން: ސީޕީ ހަމީދު
"ހާއްސަ ގޮތެއްގައި ފެމިލީ އެންޑް ޗައިލްޑް ޑިޕާޓްމެންޓުގެ ތެރޭގައި ތިބި ފުލުހުންތަކަކާއި ފުލުހުންގެ ތަމްރީނު ދިނުމުގެ ދާއިރާގެ ފުލުހުންތަކަކާ މި ފުލުހުންގެ މައްޗަށް ދައުވާ ކުރުމަށް، 13 ފުލުހެއްގެ މައްޗަށް ހުށަހެޅީމަ އަޅުގަނޑުމެން ކަންބޮޑުވި ސަބަބަކީ ފެމިލީ އެންޑް ޗައިލްޑް ޕްރޮޓެކްޝަންގެ ތެރޭގައި މި ތިބި ފުލުހުންނަކީ ރާއްޖޭގައި ކުޑަކުދިންގެ ރައްކާތެރިކަމާ ގުޅުންހުރި މައްސަލަތައް ތަހުގީގު ކުރުމުގެ އެންމެ ތަޖުރިބާ ހުރި ފުލުހުން،" ސީޕީ ވިދާޅުވި އެވެ.
ސީޕީ އިތުރަށް ވިދާޅުވީ، ފުލުހުން މި މައްސަލައިގައި ކަންބޮޑުވުން ފާޅުކޮށް ބަޔާން ނެރުނީ ގާނޫނާ ހިލާފުވާ ފުލުހުންތަކެއް ހިމާޔަތް ކުރުމުގެ ބޭނުމެއްގައި ނޫން ކަމަށެވެ.
މި ފުލުހުންނަކީ ދައުވާއަށް ހުށަހެޅިފައި ތިބި ބައެއް ކަމަށް ވަންޏާ އެއީ ވަރަށް ބޮޑު ގޮންޖެހުމެއް އަޅުގަނޑުމެންނަށް: ސީޕީ ހަމީދު
"މި ފުލުހުންނަކީ ދައުވާއަށް ހުށަހެޅިފައި ތިބި ބައެއް ކަމަށް ވަންޏާ އެއީ ވަރަށް ބޮޑު ގޮންޖެހުމެއް އަޅުގަނޑުމެންނަށް. މި ކަންބޮޑުވުން މުއައްސަސާގެ ނިސްބަތުން އަޅުގަނޑުމެން ހާމަކުރީ. ކޮންމެހެން ގާނޫނަކާ ހިލާފުވާ ފުލުހަކު ޕްރޮޓެކްޓް ކުރުން އެއީއެއް ނޫން އަޅުގަނޑުމެންގެ ވިސްނުމަކީ،" ސީޕީ ވިދާޅުވި އެވެ.
މި މައްސަލައަކީ އަދި ޝަރީއަތަށް ގޮސް ޝަރީއަތުގައި އެތައް ވާހަކަތަކެއް ދެކެވޭނެ މައްސަލައަކަށް ވާތީ އެކަމާ ބެހޭގޮތުން ތަފްސީލަށް ވަޑައިނުގަނެ ސީޕީ ވިދާޅުވީ، ފުލުހުންނަށް މި މައްސަލައާ ގުޅިގެން ލިބެން ހުރި މައުލޫމާތުތަކުގެ މައްޗަށް ބަލާފައި ފުލުހުންނަށް ދައުވާ ކުރުމުގައި އިޖުރާއީ މައްސަލަތަކެއް ހުރި ކަމަށް ގަބޫލު ކުރެވޭ ކަމަށެވެ.
ފުލުހުންނަަށް ދައުވާ ކުރުމާ ގުޅިގެން ނެރުނު ބަޔާނުގައި ފުލުހުން ބުނެފައި ވަނީ ހިޔާގެ ކުދިން ގެންދިޔަ އިރު ފުލުހުން އަމަލު ކުރީ ގާނޫނުތަކާ އެއްގޮތަށް ކަމަށް ގަބޫލު ކުރާ ކަމަށެވެ. އަދި ދައުވާ ކުރީތީ ކަންބޮޑުވުން ވެސް ފާޅުކުރި އެވެ. އެ ކޭމްޕުގައި ކުދިންގެ ހައްގުތަކާއި ކަރާމާތައް އުނިކަން އަންނާނެ ފަދަ އެއްވެސް ކަމެއް ކޮށްފައިވާ ކަމުގެ މައުލޫމާތު ފުލުހުންނަށް ދައުލަތުގެ އެއްވެސް އިދާރާއަކުން ހުށަހަޅާފައި ނުވާކަން ވެސް ފާހަގަކުރެއްވި އެވެ.
