ކުދިން ކޮންޓްރޯލްކުރީ ގާނޫނީ އިމުގެ ތެރެއިން، ދައުވާ ކުރުމުން ކަންބޮޑުވޭ: ޕޮލިސް

ކ. ތުލުސްދުއަށް ކޭމްޕެއްގައި ގެންދިޔަ ކުޑަކުދިންގެ ހިޔާގެ 12 އަހަރުން މަތީގެ ކުދިންތަކެއް ހިންގި ހަމަނުޖެހުމެއް ކޮންޓްރޯލް ކުރުމުގައި އަމަލުކޮށްފައި ވާނީ ގާނޫނާއި ގަވާއިދުތަކުގެ ތެރެއިން ކަމަށާއި އެ ކުދިންގެ ރައްކާތެރިކަމަށްޓަކައި ފިޔަވަޅު އެޅި ފުލުހުންތަކެއްގެ މައްޗަށް ދައުވާ އުފުލުމުން ކަންބޮޑުވާ ކަމަށް ފުލުސް އޮފީހުން މިއަދު ބުނެފި އެވެ.

ހިއުމަން ރައިޓްސް ކޮމިޝަނުން ތަހުގީގުކޮށް ޕީޖީ އޮފީހުގައި ދައުވާކޮށްދޭން އެދުނު ކުޑަކުދިންގެ ހިޔާގެ ކުދިންތަކެއްގެ ބިޑިއަޅުވައި އަނިޔާކުރި ކަމަށް ތުހުމަތުކުރާ މައްސަލައިގައި 13 ފުލުހަކު ހިމެނެ އެވެ. މި އެންމެންގެ މައްޗަށް ދައުވާކުރަން ކްރިމިނަލް ކޯޓަށް ހުށަހެޅީ އެކަށީގެންވާ ހެއްކާއި ގަރީނާ ހުރުމުން ކަމަށް ޕީޖީ އޮފީހުން ވަނީ ބުނެފަ އެވެ.

މި މައްސަލައިގައި އެޗްއާރުސީއެމްގެ ތަހުގީގު ނިންމައި އެދުނީ އޭރުގެ ޖެންޑަ މިނިސްޓަރު ޒެނީޝާ ޝަހީދު ޒަކީ އާއި އެފްސީޕީޑީގެ ހެޑް، މުހައްމަދު ބަޝީރު ހިމެނޭ ގޮތުން 30 މީހަކަށް ދައުވާ ކޮށްދިނުމަށެވެ. އެކަމަކު ޒެނީޝާ އާއި ބަޝީރުގެ ހިމެނޭ ގޮތުން އެންމެންގެ މައްޗަށް ނުކުރީ އެކަށީގެންވާ ހެކި ނެތުމުން ކަމަށް ޕީޖީ އޮފީހުން ބުންޏެވެ.

Hiyaage kudhin thakeh bidi alhuvai torture ge amaleh hingi kamuge thuhumathah 13 fuluhunnah dhauvaa

The most trusted news source in the Maldives

Mihaaru

މި މައްސަލައިގައި ފުލުހުން މިރޭ ނެރުނު ބަޔާނެއްގައި ބުނީ ކުޑަކުދިންގެ ހިޔާގައި އޭރު ތިބި ކުދިންނަށް ތުލުސްދޫގައި ހިންގި އެ ކޭމްޕަކީ ފުލުހުންގެ ފަރާތުން ރާއްޖޭގެ އެކި ރަށްރަށުގައި އެކި އުމުރުފުރާގެ ކުދިންނަށް ހިންގަމުންދާ ރެޑީ ކޭމްޕާއި ބްލޫޒް ފޯ ޔޫތް ކޭމްޕްގައި ހިމެނޭ ހަރަކާތްތައް ހިމަނައިގެން، އެ ކުދިންނަށް ހާއްސަކޮށް ފަރުމާކޮށްގެން ކަމާބެހޭ މުއައްސަސާތަކުގެ މެދުގައި މަޝްވަރާކޮށް އެއްބަސްވެވުނު ގޮތަށް ހިންގާފައިވާ ކެމްޕެއް ކަމަށެވެ.

އެ ކޭމްޕްގައި ގެންދިޔަ ކުދިންގެ ހައްގަށާއި ކަރާމާތަށް އުނިކަން އަތުވެދާނެ ފަދަ އެއްވެސް ކަމެއް ހިނގާފައިވާކަމުގެ ރިޕޯޓެއް، ދައުލަތުގެ އެއްވެސް މުއައްސަސާއަކުން މީގެ ކުރިން ފުލުހުނަށް ހުށަހަޅާފައި ނުވާ ކަމަށް ބަޔާނުގައި ބުންޏެވެ.

ފުލުހުން ބުނިގޮތުގައި އެ ކޭމްޕަކީ ބޭނުންތެރި އޭގެ ފައިދާ އެ ކުދިންނަށް މިހާރު ވެސް ކުރާނެ ކޭމްޕެއް ކަަމށެވެ.

"އެ ދަތުރުގައި ބައިވެރިވި ބައެއް ކުދިން ނުކިޔަމަންތެރިކަން ދެއްކުމުން އެ ކުދިން ކޮންޓްރޯލްކުރުމަށާއި އެ ކުދިންނާއި އެހެނިހެން ފަރާތްތަކުގެ ސަލާމަތާއި ރައްކާތެރިކަމަށްޓަކައި ފުލުހުން އަމަލުކޮށްފައި ވަނީ ފުލުހުންގެ ގާނޫނާއި ގަވައިދުތަކުގެ ތެރެއިންކަން، މިހާތަނަށް ލިބިފައިވާ މައުލޫމާތުން ގަބޫލު ކުރެވެ އެވެ." ބަޔާނުގައި ވެ އެވެ.

މިގޮތަށް ފިޔަވަޅު އަޅާފައި ވަނިކޮށް އެޗްއާރުސީއެމުން އެ މައްސަލަ މާ ފަހުން ނަގައި ތަހުގީގު ހިންގި ގޮތާ މެދު ފުލުހުން ވަނީ ކަންބޮޑުވުންފާޅުކޮށްފަ އެވެ. މި މައްސަލައިގައި އެ ކޮމިޝަންގެ ތަހުގީގުން ހޯދިފައިވާ ހޯދުންތަކާއި، މައްސަލައާ ގުޅޭ އިތުރު މައުލޫމާތު ހިއްސާކޮށްދިނުމަށް އެދިފައިވާ ކަމަށް ފުލުހުންގެ ބުނެފައި ވެ އެވެ.

އެޗްއާރުސީއެމުން މި މައްސަލަ ތަހުގީގުކުރީ ކުދިންގެ މެދުގައި ހިނގި ހަމަނުޖެހުމެއް ކޮންޓްރޯލް ކުރުމުގައި އަނިޔާވެރި އަމަލުތަކެއް ހިންގި ކަމަށް ތުހުމަތުކޮށް ޗައިލްޑް ރައިޓްސް ކޮމިޝަނުން ހުށަހެޅުމުންނެވެ. މިކަން ހިނގީ 2017 ގައި ކުޑަކުދިންގެ ހިޔާގައި ހިނގި ހަމަނުޖެހުންތަކަކާ ހެދި އެތަން މަރާމާތުކުރަން 12 އަހަރުން މަތީގެ ކުދިންތަކެއް ކޭމްޕް ގެންދިއުމުގެ ތެރޭގަ އެވެ. އެ ކުދިން ކޭމްޕް ގެންދިޔައީ ފުލުހުންނާއި ޖެންޑާ މިނިސްޓްރީގެ މުވައްޒަފުންނެވެ. އެނގިފައިވާ ގޮތުގައި އޭގެތެރެއިން ބައެއް ކުދިން ކޭމްޕްގައި ތުލުސްދުއަށް ދާން ބޭނުން ނުވީ އެވެ. އެހެންވެ ކަނޑުމަތީގައި ހިތްހަމަނުޖެހުން ފާޅުކޮށް ދޯނިން ފުންމާލަން އުޅުމުން ކޮންޓްރޯލްކުރަން އެ ކުދިން ބިޑި އެޅުވީ އެވެ. މި ކަމުގައި ހިމެނުނު ބައެއް ފުލުހުން ބުނާ ގޮތުގައި އެ ވަގުތު ބިޑިއެޅުވީ އެ ކުދިންގެ ފުރާނަ ސަލާމަތްކުރުމުގެ ގޮތުންނެވެ.

އެކަމަކު ކަނޑުމަތިން ބިޑި އެޅުވުމަށް ފަހު، ތުލުސްދު އަށް ގެންގޮސްގެން ވެސް އެ ކުދިންނަށް އަނިޔާކުރި ކަމަށް މި މައްސަލާގައި ތުހުމަތު ކުރެ އެވެ.