ޑްރަގް ވިޔަފާރިކުރާ ކަމުގެ ތުހުމަތު ކުރެވޭ މީހަކު އޮޕަރޭޝަނެއް ކުރަން ރާއްޖެއިން ބޭރަށް ދާންޖެހޭތީ ޕީޖީ އޮފީހުން އެދިގެން އޭނާ ބަންދުން ދޫކޮށްލައިފި އެވެ.
މިދިޔަ އަހަރުގެ ޖޫން މަހު ފުލުހުން ހުޅުމާލޭގައި ހިންގި ހާއްސަ އޮޕަރޭޝަނެއްގައި 6.8 ކިލޯގެ ކެނަބިސްއާ އެކު ހައްޔަރު ކުރީ ގއ. ކޮލަމާފުށި، ކަރަންކާވިލާގެ އަފްސަލް ރަޝީދު، އާއި ގދ. ވާދޫ، އަސްރަފީގެ، މުހައްމަދު ޝަރީފް އެވެ.
ކެނަބިސް ޓްރެފިކް ކުރުމުގެ ދައުވާ އެ މީހުންގެ މައްޗަށް ދައުލަތުން ކޮށްފައިވާއިރު އެ މައްސަލަ ބަލައި ނިމެންދެން އެ މީހުން ތިބީ ބަންދުކޮށްފަ އެވެ.
ނަމަވެސް އިއްޔެ ކްރިމިނަލް ކޯޓުން ވަނީ ބަންދު މުރާޖައާކޮށް މި ދެ މީހުންގެ ތެރެއިން މުހައްމަދު ޝަރީފު ދޫކޮށްލަން ނިންމައިފަ އެވެ.
ޕީޖީ އޮފީހުން އެދިގެން އޭނާ ދޫކޮށްލީ އޭނާގެ ކޮނޑު ހުޅުގެ އޮޕަރޭޝަނެއް ކުރަން ރާއްޖެއިން ބޭރަށް ދާން ޖެހޭތީ، ކަރެކްޝަންސްގެ ބަންދުގައި ހުރުމުން ބޭރަށް ފުރުމުގެ އިންތިޒާމު ހަމަނުޖެހި ގިނަ ދުވަސްވާތީ ކަމަށް ބުނެ އެވެ.
ޝަރީފަކީ މަސްތުވާތަކެތީގެ މައްސަލަތަކާ ގުޅޭ ކުށުގެ ރިކޯޑު އޮންނަ، ފުޅާ ދާއިރާއެއްގައި މަސްތުވާތަކެތީގެ ވިޔަފާރިކުރާ ކަމުގެ ތުހުމަތުގައި މީގެ ކުރިން ވެސް ހައްޔަރުކޮށްފައިވާ މީހެއް ކަމަށް ކުރިން ވެސް ފުލުހުން ބުނެފައިވެ އެވެ.
މި މައްސަލަ އަވަހަށް ނިންމަން ގިނަ އަދަދެއްގެ ހެކިން ހާޒިރުކޮށްގެން އިއްޔެ ކްރިމިނަލް ކޯޓުގައި އަޑުއެހުމެއް ތާވަލު ކުރި އެވެ. މަގްބޫލް ސަބަބެއް ނެތި ހާޒިރު ނުވާ ހެކިންގެ ހެކި ބަސް ދެން ނުނަގާ ގޮތަށް ނިންމައިގެން، މައްސަލާގައި ހިމެނޭ ހުރިހާ އެންމެންނަށް ހާޒިރު ވެވޭނެކަން ޔަގީންކޮށްގެން މި އަޑުއެހުން ޝެޑިއުލް ކުރި ކަމަށް ކޯޓުން ބުނި ނަމަވެސް، އަފްސަލްގެ ވަކީލު އިއްޔެ ހާޒިރުނުވުމުން އެ އަޑުއެހުން ވަނީ ކެންސަލްކޮށްފަ އެވެ.
