ކުރީގެ ރައީސް އަބްދުﷲ ޔާމީނަށް ކޮށްފައިވާ ފަސް އަހަރުގެ ޖަލު ހުކުމުން އިއްޔެ ސަލާމަތްވުމާއެކު، އެ މަނިކުފާނު ކުރީ ސަފަށް ނުކުމެވަޑައިގެން އިދިކޮޅު ކޯލިޝަންގެ ސިޔާސީ ހަރަކާތްތައް ވަރުގަދަ ކުރައްވަން އަމަލީ މަސައްކަތްޕުޅު ފައްޓަވައިފި އެވެ.
އިދިކޮޅު ޕީޕީއެމް/ޕީއެންސީގެ ތަރުޖަމާނު ހީނާ ވަލީދު "މިހާރު" އަށް މިއަދު ވިދާޅުވީ، ސުޕްރީމް ކޯޓުން ކުރި ހުކުމުން ޔާމީނަށް ލިބިވަޑައިގެންނެވި ކާމިޔާބީއާއެކު، އެ ކޯލިޝަންގެ އިސްބޭފުޅުންނާ އެ މަނިކުފާނު ރޭގައި ޕީޕީއެމްގެ އޮފީހުގައި ބައްދަލުކުރެއްވި ކަމަށެވެ. އަދި ސިޔާސީ ގޮތުން ޕީޕީއެމް/ޕީއެންސީ ވަރުގަދަ ކުރުމަށާއި ޔާމީން މިނިވަންކުރުމަށްޓަކައި އެ ބޭފުޅުން ކުރެއްވި މަސައްކަތްތަކަށް ޝުކުރު އަދާކުރެއްވި ކަމަށް ހީނާ ވިދާޅުވި އެވެ.
މިއީ، ޔާމީން ޖަލަށް ލާން ނޮވެމްބަރު، 28، 2019 ގައި ކްރިމިނަލް ކޯޓުން ހުކުމްކުރި ފަހުން ޕީޕީއެމްގެ އޮފީހަށް ވަޑައިގެންނެވި ފުރަތަމަ ފަހަރެވެ.
ޔާމީން ރޭ ވަނީ ހުކުމަށް ފަހު، ޕީޕީއެމްގެ އޮފީހަށް ފުރަތަމަ ފަހަރަށް ވަޑައިގެން، އިދިކޮޅު ކޯލިޝަންގައި އަމަލީ ގޮތުން ހަރަކާތްތެރިވެވަޑައިގަންނަވާ ރައްޔިތުންގެ މަޖިލީހުގެ މިހާރުގެ މެމްބަރުންނާއި ކުރީގެ މެމްބަރުންނާ ވެސް ބައްދަލުކުރައްވައިފަ އެވެ.
"ސިޔާސީ ހަރަކާތްތައް ކުރިއަށް އޮތްތަނުގައި އިތުރު ކުރަން އެ މަނިކުފާނު އެ ބޭފުޅުންނާއެކު މަޝްވަރާ ކުރެއްވި. އެކި ރަށްރަށަށް ވަޑައިގަންނަވަން ރައީސް ޔާމީން ބޭނުންފުޅުވާ ކަމަށް އެ ބައްދަލުވުމުގައި އެ މަނިކުފާނު ވިދާޅުވި،" ހީނާ ވިދާޅުވި އެވެ.
"އަދި މިނިވަންކަމުގެ ދިފާއުގައި ދިވެހި ރައްޔިތުންގެ ފަށާފައިވާ ހަރަކާތް އިތުރަށް ވަރުގަދަ ކުރުމާ ގުޅޭ ގޮތުން ވެސް ރައީސް ޔާމީން މަޝްވަރާ ކުރެއްވި."
ޔާމީން މިއަދު ވެސް ޕީޕީއެމްގެ އޮފީހަށް ވަޑައިގެން ސިޔާސީ ކަންކަމުގައި އުޅުއްވާފައިވާއިރު، މިރޭ އެ އޮފީހުގައި ބާއްވާ ހަރުގެ ޖަލްސާގައި ވާހަކަފުޅު ދައްކަވާނެ ކަމަށް ހީނާ ވިދާޅުވި އެވެ. މިއީ ޖަލު ހުކުމުން ސަލާމަތްވުމަށް ފަހު، ސަޕޯޓަރުންނާ މުހާތަބު ކުރައްވައި ޔާމީން ވާހަކަފުޅު ދައްކަވާ ފުރަތަމަ ފަހަރެވެ. މީގެ އިތުރުން އަންނަ ހުކުރު ދުވަހުގެ ރޭ ކާނިވާ ސަރަހައްދުގައި ބާއްވާ އިިދިކޮޅު ކޯލިޝަންގެ ޖަލްސާގައި ވެސް ޔާމީން ބައިވެރިވެވަޑައިގަން ވާހަކަފުޅު ދައްކަވާނެ އެވެ.