ރާއްޖޭގައި އިންޑިއާ ސިފައިން ތިބުމާ ދެކޮޅަށް ހިންގަމުން އަންނަ ކެމްޕެއިނަށް ފާޑުވިދާޅުވެ، "އިންޑިއާ އައުޓް" ކަމަށް ނުބުނެވޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
ރާއްޖޭގައި އިންޑިއާ ސިފައިން ތިބުމާ ދެކޮޅަށް "އިންޑިއާ އައުޓް"ގެ ނަމުގައި ހިންގަމުން އަންނަ ކެމްޕެއިން މިހާރު ވަނީ ޖަލު ހުކުމުގައި ހުންނެވި ކުރީގެ ރައީސް އަބްދުﷲ ޔާމީން މިނިވަންވުމާ އެކު، އިދިކޮޅު ޕީޕީއެމް/ ޕީއެންސީ ކޯލިޝަނުން ވަރުގަދަކޮށްފަ އެވެ.
"ރާއްޖޭގައި އޮތް އިންޑިއާގެ ދައުރު، އަދި އިންޑިއާ ކަނޑުގައި އޮތް ރާއްޖޭގެ ދައުރަކީ ދިވެހިންނަށް އޮޅޭނެ ދައުރެއް ނޫން،" މިއީ ހަރުކަށި ފިކުރުގެ މީހުން އަޑީގައި ތިބެގެން ހިންގަމުން އަންނަ ހަރަކާތެއް ކަމަށް ކުރިން ތުހުމަތު ކުރެއްވި ނަޝީދު މިއަދު ހެނދުނު ކުރެއްވި ޓްވީޓެއްގައި ވިދާޅުވި އެވެ.
މި ޓްވީޓްގައި ނަޝީދު ވިދާޅުވީ "އިންޑިއާ އައުޓް ކަމަށް ނުބުނެވޭނެ" ކަމަށެވެ.
މި ކެމްޕެއިނަށް ފާޑުވިދާޅުވެ ކުރިން ނަޝީދު ވިދާޅުވީ ޓެރަރިސްޓް ޖަމާއަތްތަކުން ގައުމުތައް ހިފުމުގެ ކުރިން އަބަދުވެސް މަސައްކަތްކުރާނީ ބައިނަލްއަގްވާމީ ގޮތުން އެ ގައުމެއް އެކަހެރި ކުރަން ކަމަށެވެ. އިންޑިއާ އައުޓް ކެމްޕެއިނަކީ އޭގެ ހަރަކާތެއް ކަމަށާއި އެކަން ކުރަނީ މަދު ބަޔަކު ކަމަށް ނަޝީދު ވިދާޅުވި އެވެ.
ނަޝީދު ވިދާޅުވެފައި ވަނީ ރާއްޖެ އާއި އިންޑިއާއާ ދެމެދު އޮންނަ ގުޅުމާ މެދު ކަންބޮޑުވެގެން ގިނަ ދިިވެހިން އުޅޭ ކަމަށް ގަބޫލުފުޅު ނުކުރައްވާ ކަމަށެވެ. ނަޝީދު ކުރިން ވިދާޅުވެފައި ވަނީ ގައުމުގެ ސަލާމަތަށްޓަކައި ބޭރު ސިފައިން ތިބުމަކީ އެހެން ގައުމުތަކުގައި ވެސް ކުރާ ކަމެއް ކަމަށެވެ. ސަރުކާރުން މަސައްކަތް ކުރަނީ އިންޑިއާ ކަނޑުގެ ސަލާމަތަށްޓަކައި ކަމަށް އެ މަނިކުފާނު ވިދާޅުވި އެވެ.
އިންޑިއާ އިން ރާއްޖެއަށް ހަދިޔާކުރި ހެލިކޮޕްޓަރާ އެކު އިންޑިއާ ސިފައިން ތިބުމާއި އަސްކަރީ ގޮތުން އިންޑިއާއިން ރާއްޖެއާ ގުޅުން ބަދަހިކުރަން ފެށުމުން "އިންޑިއާ އައުޓް" ކެމްޕެއިން އިދިކޮޅުން ވަރުގަދަކޮށް ރަށްރަށަށް ގޮސް އެކަމާ ދެކޮޅު ޕެޓިޝަނަކަށް ސޮއި ހޯދުމުގެ މަސައްކަތް ވެސް ކުރިއަށް އެބަދެ އެވެ. އަދި ކުރީގެ ރައީސް ޔާމީން ވަނީ އިއްޔެ މި ކެމްޕޭނުގައި ބައެއް ރަށްރަށަށް ވަޑައިގެން އިންޑިއާއާ ދެކޮޅަށް ވާހަކަ ދައްކަވައިފަ އެވެ.
އެ ޕެޓިޝަންގައި ވަނީ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާގެ ސަރުކާރާ އެކު ސިއްރު އަސްކަރީ އެއްބަސްވުންތަކެއް ގާއިމްކޮށް، ރާއްޖޭގައި އިންޑިއާގެ އަސްކަރީ ބޭނުންތަކަށް ތަންތަން ގާނޫނުއަސާސާސީއާ ހިލާފަށް ދޫކޮށްފައިވާ ކަމަށް ބުނެފަ އެވެ. މިކަމުގެ ސަބަބުން ރާއްޖޭގެ ޑިމޮކްރަސީގެ ނިޒާމާއި މުއައްސަސާތަކުން ރައްޔިތުންގެ ބާރުވެރިކަން ގެއްލިދާނެ ކަމަށާއި ކަނޑުގެ ވަސީލަތްތަކުގެ މައްޗަށް ދިވެހިންގެ ސިޔާދަތީ ބާރުކެނޑި މިނިވަން ކަމަށް ބުރޫ އަރާފާނެ ކަމަށް ވެސް އިދިކޮޅުން ބުނެ އެވެ.
އިދިކޮޅުން މިގޮތަށް ބުނި ނަމަވެސް ސަރުކާރުން ބުނާ ގޮތުގައި މި ކެމްޕޭނަކީ ދިވެހި ސަރުކާރާއި އިންޑިއާ ސަރުކާރާ ދެމެދު އޮންނަ ގާތް ގުޅުމާ ބެހޭ ގޮތުން ދޮގު މައުލޫމާތު ފަތުރައި ސަރުކާރުގެ އަގުވައްޓާލަން ކުރާ މަސައްކަތެކެވެ. މިއީ ރާއްޖެއާ އެ ގައުމާ ދެމެދު އޮތް ޒަމާންވީ ގުޅުން ހީނަރުކޮށް، ބަދުނާމުކުރުމަށް މަދު ބަޔަކު އަޑީގައި ތިބިގެން ހިންގާ ބޮޑު ޖަރީމާއެއް ކަމަށް ވެސް ސަރުކާރުން ބުނެ އެވެ. އަދި ދާދި ފަހުން ރައީސް އިބްރާހިމް މުހައްމަދު ސޯލިހް ވަނީ އިންޑިއާ ކަނޑުގައި މަސްބޯޓުތަކަށް ވުރެ ޑްރަގް ބޯޓުތައް ގިނަވާން ދޫކޮށްނުލެވޭނެ ކަމަށް ވިދާޅުވެ "އިންޑިއާ އައުޓް" ކެމްޕޭނަކީ މަސްތުވާތަކެތީގެ ވިޔަފާރީގައި އުޅޭ މީހުން އަޑީގައި ތިބި ކެމްޕެއިނެއް ކަމަށް ނުސީދާކޮށް ތުހުމަތުކުރައްވައިފަ އެވެ.
