ކޮވިޑު-19 އިން ރައްކާތެރިވުމަށް ކަނޑައަޅާފައިވާ ގައިޑްލައިނާ އެއްގޮތަށް މާލޭގައި މަގުމަތީ ބާޒާރު ބޭއްވުމުގެ ހުއްދަ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިރޭ ދީފި އެވެ.
މާލެ ސިޓީ ކައުންސިލުން ނެރުނު ނޫސްބަޔާނެއްގައި ބުނީ ނައިޓްމާކެޓުގައި ބައިވެރިވި ގިނަ ބައެއްގެ އެދުމުގެ މަތިން އެޗްޕީއޭގައި އެދުމުން، އާއްމު ފިހާރަތަކުގައި ވިޔަފާރިކުރާ އުސޫލުން ނައިޓް މާކެޓް ބޭއްވުމުގެ ހުއްދަ ދިނުމަށް އެ އެޖެންސީން އަންގާފައިވާ ކަމަށެވެ.
"ވީމާ، އެޗްޕީއޭއިން ކަނޑައަޅާފައިވާ މިންގަނޑާ އެއްގޮތަށް ނައިޓްމާކެޓް ބާއްވަން އެއްބަސްވާ ފަރާތްތަކަށް މި ހުއްދަ ދިނުމަށް މި ކައުންސިލުން ވަނީ ނިންމައިފަ އެވެ." ބަޔާނުގައި ބުންޏެވެ.
ކޮވިޑު ފެތުރުން ކޮންޓްރޯލް ކުރުމަށް ފިހާރައަށް އެއްފަހަރާ އެންމެ ގިނައިން ވަދެވޭ މީހުންގެ އަދަދު ކަނޑައަޅައި، އަތް ސެނެޓައިޒް ކުރެވޭނެ ގޮތް ހަމަޖެއްސުމަށް އެޗްޕީއޭގެ އެސްއޯޕީގައި ކަނޑައަޅާފައިވެ އެވެ.
ރަސްފަންނުގައި ބާއްވަމުން ދިޔަ މަގުމަތީ ބާޒާރު ވަގުތުން ހުއްޓާލުމަށް އެޗްޕީއޭއިން އިއްޔެ ސިޓީ ކައުންސިލަށް އެންގީ ކޮވިޑަށް ޕޮޒިޓިވްވަމުންދާ މީހުންގެ އަދަދު އިތުރުވަމުންދާތީ ރައްކާތެރިކަމުގެ ފިޔަވަޅެއްގެ ގޮތުންނެވެ.
މަގުމަތީ ބާޒާރު ފެށީ މިދިޔަ ހަފްތާގެ ހޯމަ ދުވަހުން ފެށިގެން 10 ދުވަހުގެ މުއްދަތަށެވެ.
ނަމަވެސް އަދިވެސް ނައިޓް މާކެޓް ކުރިއަށްދާއިރު، ކޮވިޑުން ރައްކާތެރިވުމުގެ އެއްވެސް ފިޔަވަޅަކަށް އެ ތަނުގައި ނުބަލަ އެވެ. މާސްކް އެޅުމެއް ނެތި، ގައިދުރުކަން ބެހެއްޓުމަށް ވެސް އެއްވެސް ވަރަކަށް ސަމާލުކަމެއް ނުދެ އެވެ.