ރިޔާސީ އިންތިހޤބުގައި އޮޅުވާލި ކަމަށް ބުނެ އިދިކޮޅު ކޯލިޝަނުން ދައުލަތުގެ ކަމާބެހޭ އިދާރާތަކަށް މިއަދު މައްސަލަ ހުށަހަޅައިފި އެވެ.
އިދިކޮޅު ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި އެ ޕާޓީގެ ވަކީލުންގެ ޓީމުގައި ހިމެނޭ އަބްދުﷲ ރާގިބް ވިދާޅުވީ 2018 ވަނަ އަހަރުގެ ރިޔާސީ އިންތިޚާބުގައި އޮޅުވާލި ކަމަށް ތުހުމަތު ކުރެވޭ މައްސަލަ ހިއުމަން ރައިޓްސް ކޮމިޝަން (އެޗްއާރުސީއެމް) އާއި ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) ގެ އިތުރުން އިންތިގާލީ އިންސާފުގެ އޮފީހަށް ހުށަހަޅާފައިވާ ކަމަށެވެ. އަދި އެ މައްސަލަތަކުގައި 25 ކަމެއް ފާހަގަކޮށްފައިވާނެ ކަމަށާއި އެކަންކަން ސާބިތުވާނެ ހެކި ލިބިފައިވާ ކަމަށް އޭނާ ވިދާޅުވި އެވެ.
"އަޅުގަނޑުމެން ދިރާސާ ކުރި ކުރުމުން ކިތާބީ ހެކިތަކާއި ޝަފައީ ހެކިތައް އަޅުގަނޑުމެންނަށް މައްސަލަ ސާބިތު ކުރެވޭ މިންވަރަށް ލިބި، އަޅުގަނޑުމެން ހުށަހަޅާފައިވާ މައްސަލަތައް." ރާގިބު ވިދާޅުވި އެވެ.
ރާގިބު ވިދާޅުވީ ފާހަގަ ޖެހޭ އަނގޮޓިއެއް ބޭނުން ކޮށްގެން ވޯޓު ކަރުދާސްތަކުގައި ރޮނގު ދެމުމާއި ސައްހަ ނޫން ވޯޓު ކަރުދާސް ބޭނުން ކުރިކަމުގެ ހެކި ލިބިފައިވާ ކަމަށެވެ. އަދި ވޯޓު ކަރުދާސާ ބެހޭގޮތުން ރަސްމީ އިދާރާތަކަށް ދޮގު މައުލޫމާތު ދިނުމާއި ބިރު ދެއްކުމުގެ އަމަލުތައް ހިންގާފައިވާ ކަމަށާއި އެކަމުގައި ބައިވެރިވި އެންމެންގެ މައްޗަށް ޖިނާއީ ތަހުގީގު ހިންގައި، ޝަރީއަތް ހިންގުމާ ހަމައަށް އިދިކޮޅު ކޯލިޝަނުން އެކަންކަން ގާތުން ބަލަމުންދާނެ ކަމަށް ރާގިބު ވިދާޅުވި އެވެ.
ރިޔާސީ އިންތިޚާބުގައި އޮޅުވާލި ކަމަށް ބުނެ އިދިކޮޅު ކޯލިޝަނުން ކުރިން ވެސް ތުހުމަތުތައް ކުރި އެވެ. އަދި އެ އިންތިޚާބުގެ ނަތީޖާ ބާތިލްކުރަން ކުރީގެ ރައީސް އަބްދުﷲ ޔާމީންގެ ފަރާތްޕުޅުން ސުޕްރީމް ކޯޓަށް ވެސް އޭރު ހުށަހެޅުއްވި އެވެ. އެކަމަކު ސުޕްރީމް ކޯޓުން އޭރު ނިންމީ އިންތިޚާބު ނަތީޖާ ބާތިލް ކުރަންޖެހޭ ފަދަ ކަމެއް ރިޔާސީ އިންތިޚާބުގައި ހިނގާފައިވާ ކަމުގެ ހެއްކެއް ނެތް ކަމަށާއި އެހެންވެ، އިންތިޚާބު ބާތިލް ނުކުރެވޭނެ ކަމަށެވެ.