އިދިކޮޅު މުޒާހަރާ އިން 16 މީހުން ހައްޔަރުކޮށްފި

ރާއްޖޭގައި ތިބި އިންޑިއާ ސިފައިން ބޭލުމަށް ގޮވާލައި އިދިކޮޅު ކޯލިޝަނުން މިއަދު ކުރި މުޒާހަރާއިން، ތ. ގުރައިދޫ ދާއިރާގެ މެމްބަރު ޣައްސާން މައުމޫނާއި މާވަށު ދާއިރާގެ މެމްބަރު މުހައްމަދު ސައީދާ އެކު، އެ ޕާޓީގެ 16 މީހަކު ހައްޔަރުކޮށްފި އެވެ.

ޕީޕީއެމް/ޕީއެންސީގެ ތަރުޖަމާނު ހީނާ ވަލީދު ވިދާޅުވީ ލީޑަޝިޕްގެ ބޭފުޅުންނާ އެކު ޕާޓީގެ ގިނަ ބަޔަކު ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. އޭގެ ތެރޭގައި މާލޭގެ ޑެޕިއުޓީ މޭޔަރު އަހުމަދު ނަރީޝާއި ކައުންސިލްގެ މެމްބަރުން ވެސް ހިމެނެ އެވެ.

އޭގެ ފަހުން، އެ ކޯލިޝަނުން ނެރުނު ބަޔާނެއްގައި ބުނީ ކާނިވަލަށް ވަންނަން ދިޔަ ބައެއްގެ މޫނަށާއި ލޮލަށް ޕެޕާ ސްޕްރޭ ޖަހައި، އެއްވުމުގައި ބައިވެރިވުމަށް ދިޔަ އާއްމުންނަށް ހުރަސްއަޅާފައިވާ ކަމަށެވެ. އަދި ޣައްސާނާއި ސައީދު ހައްޔަރުކޮށްފައިވަނީ މަޖިލީހުގެ މެމްބަރުން ހައްޔަރުކުރުމުގައި ގެންގުޅެން ޖެހޭ އުސޫލުތަކާ ހިލާފަށް ކަމަށް ވެސް ބަޔާނުގައި ބުންޏެވެ.

އެ ދެ ބޭފުޅުން ހައްޔަރުކޮށް ދޫނިދުއަށް ގެންގޮސްފައިވާ ކަމަށް ބަޔާނުގައި ބުނެފައިވެ އެވެ.

"ގާނޫނު އަސާސީގެ 27 އަދި 32 ވަނަ މާއްދާއިން ލިބިދީފައިވާ އަސާސީ ހައްގަށް އަރައިގަނެ، އެ ހައްގު ހަނިކޮށް މި ކޯލިޝަންގެ ރެލީ ކުރިއަށް ގެންދެވޭނީ ކާނިވަލުގައި ކަން އެންގުމާ އެކު، ކާނިވަލްގައި ކުރިއަށް ގެންދިއުމަށް ނިންމި ރެލީ ވެސް ހުއްޓުވުމަށް ރާއްޖޭގައި ހުންނަ އިންޑިއާގެ އެމްބަސީން އެންގުމާ އެކު އެކަން ހުއްޓުވުމަށް ސަރުކާރުގެ ފަރާތުން ފުލުހުންގެ މައްޗަށް ޣައިރު ގާނޫނީ އަމުރުކޮށް އަދި މި ޣައިރު ގާނޫނީ އަމުރު ތަންފީޒުކުރުމަށް ފުލުހުން މަސައްކަތް ކުރުމަކީ ހިތާމަހުރި ކަމެކެވެ،" ކޯލިޝަންގެ ބަޔާނުގައިވެ އެވެ.

ޕީޕީއެމުން ވަނީ ޣައިރު ގާނޫނީ އެންގުންތަކަށް ތަބާނުވެ، ގާނޫނު އަސާސީން ކަަވަރުކޮށްދީފައިވާ ހައްގުތަކަށް އަރައިނުގަތުމަށް ފުލުހުންނަށް އިލްތިމާސްކޮށް، ސަރުކާރު ޖަވާބުދާރީ ކުރުވުމަށް ގެންދާ ސުލްހަވެރި ހަރަކާތްތައް ކުރިއަށް ގެންދިއުމަށް މަގު ފަހިކޮށްދިނުމަށް ގޮވާލައިފަ އެވެ.

އިދިކޮޅު ކޯލިޝަނުން މުޒާހަރާ ކޮށްފައިވަނީ، އިންޑިއާ ސިފައިންނާ ދެކޮޅަށް ކުރާ މުޒާހަރާ ރޫޅާލާނެ ކަމުގެ އިންޒާރު ދީފައިވަނިކޮށެވެ.

ފުލުހުން މީގެ ކުރިން ނެރުނު ބަޔާނުގައި ބުނީ މާލޭގެ އެކި ސަރަހައްދުގައި ބާއްވާ އެއްވުމަށް ރަށްރަށުން ގިނަ ބަޔަކު ގެންނަ ކަމަށާ އަދި ދުއްވާތަކެތި ބޭނުންކޮށްގެން މާލޭގެ ބޮޑެތި މަގުތައް ބްލޮކުކޮށް، ރައްޔިތުންނާއި އާންމުންގެ ދަތުރުފަތުރުގެ ހިދުމަތަށް ހުރަސް އަޅަން ރާވާފައިވާ ކަމަށެވެ.

އޭގެ އިތުރުން، މާލޭގައި އުޅޭ ކުށް ކުރާ ގްރޫޕުތައް ހޯދައި އެއްވުމުގައި ބައިވެރި ކުރުމަށް ޕީޕީއެމް/ޕީއެންސީން ރާވާފައިވާ ކަމަށް ފުލުހުން ބުންޏެވެ.

އިދިކޮޅުން ބޮޑު މުޒާހަރާއެއް ކަމަށް ބުނި ނަމަވެސް މިއަދުގެ މުޒާހަރާގައި އެހާ ގިނަ އަދަދެއްގެ މީހުން ބައިވެރިވެފައެއް ނުވެ އެވެ.