ފުވައްމުލަކުގެ ތަރައްގީއަށް ރައީސްގެ ގިނަ ވައުދުތަކެއް!

ފުވައްމުލަކުގެ ތަރައްގީ އަށް މުހިއްމު ގިނަ ވައުދުތަކެއް ރައީސް އިބްރާހިމް މުހައްމަދު ސޯލިހު މިރޭ ވެވަޑައިގެންފި އެވެ.

ފުވައްމުލަކު ރައްޔިތުންނަށް ދިން މާހެފުމުގައި ވާހަކަފުޅުދައްކަވަމުން ރައީސް ވިދާޅުވީ އެންމެ ފަހުން ބޭއްވި ރިޔާސީ އިންތިހާބާއި މަޖިލީހުގެ އިންތިހާބު އަދި ކައުންސިލް އިންތިހާބުގެ ކެމްޕެއިން ތެރޭގައި ފުވައްމުލަކުގެ ތަރައްގީއަށް ވަރަށް ގިނަ ކަންތައްތައް ކޮށްދޭނެ ކަމުގެ ވައުދުވެފައިވާނެ ކަމަށެވެ.

އެ ވައުދުތައް ވެފައިވަނީ ރައްޔިތުންނާ ބައްދަލުކޮށް، އެ ކަންކަން ބެލުމަށްފަހު ކަމަށާއި މި ސަރުކާރުން އެ ވައުދުތައް ފުއްދައިދޭނެ ކަމަށް، ފުވައްމުލަކަށް އުފަން ނައިބު ރައީސް ފައިސަލް ނަސީމް ވެސް ބައިވެރިވެވަޑައިގެންނެވި ރަސްމިއްޔާތުގައި ރައީސް ވިދާޅުވި އެވެ.

ސަރުކާރުން ވެފައިވާ ވައުދުގެ ތެރެއިން ގިނަ މަޝްރޫއުތައް ފުވައްމުލަކުގައި މިހާރު ވެސް ހިންގަމުން ދެ އެވެ. ދެން ހުރި މަސައްކަތްތައް ފެށުމުގެ ކަންކަން ދަނީ ކުރިިއަށެވެ.

މި ފަހުން ވެސް ފުވައްމުލަކު ސިޓީ ކައުންސިލާއި މަޖިލީހުގެ މެމްބަރުންނާ އެކު ރައީސް ބޭއްވެވި ބައްދަލުވުމުގައި އެ ބޭފުޅުން ވަނީ ގިނަ ކަންތައްތަކެއް ހުށަހަޅުއްވައިފަ އެވެ. އޭގެ ތެރެއިން ގިނަ ކަންތައްތައް ކުރަން ނިންމާފައިވާ ކަމަށް ރައީސް މިރޭ ވިދާޅުވި އެވެ.

އޭގެ ތެރޭގައި އެއާޕޯޓު ބޮޑުކުރުމާއި ހައުސިން ޔުނިޓު އެޅުމާއި މަގު ހެދުމުގެ މަޝްރޫއާ ގުޅޭ ކަންކަން ހިމެނެ އެވެ.

އެ މަނިކުފާނު ވިދާޅުވީ އެއާޕޯޓު ބޮޑުކުރެވޭނީ ކިހާ ވަރަކަށްތޯ ބެލުމަށް ޓެކްނިކަލް ސާވޭއެއް ހަދަން ޕްލޭނިން މިނިސްޓްރީގައި އެދިފައިވާނެ ކަމަށެވެ. އެއަށްފަހު، އެއާޕޯޓު ބޮޑުކުރެވޭނެ އެންމެ ބޮޑު މިނަކަށް ބޮޑުކުރާނެ ކަމުގެ ރައީސް ޔަގީންކަން ދެއްވާފައިވެ އެވެ.

ފުވައްމުލަކުގައި 200 ހައުސިން ޔުނިޓް އެޅުމަށް މީގެ ކުރިން އިއުލާނުކޮށްފައިވެ އެވެ. ނަމަވެސް، ކައުންސިލްގެ އެދުމުގެ މަތިން އިތުރު 200 ހައުސިން ޔުނިޓާ އެކު، 400 ހައުސިން ޔުނިޓް އަޅަން ވަނީ ނިންމައިފަ އެވެ.

"އަޅުގަނޑަށް އިނގޭ މިއީ މި ރަށުގެ ބޯހިޔާވަހިކަން ބޭނުންވެފައިވާ ރައްޔިތުންނަށް އެންމެ ރަނގަޅު އަދަދު ނޫންކަން. އެހެންވީމަ، ސަރުކާރުގެ ހައުސިން ޔުނިޓް ޕްލޭން ކުރިއަށްދާއިރު އަދިވެސް މި 400 ޔުނިޓްގެ އިތުރަށް މި ރަށަށް ބޭނުންވާ ހައުސިން ޔުނިޓްތައް އިތުރުކޮށްދޭނެ ކަމުގެ ޔަގީންކަން ރައްޔިތުންނަށާއި ކައުންސިލާއި މެމްބަރުންނަށް އަރުވަން،" ރައީސް ވިދާޅުވި އެވެ.

އެ ރަށުގައި މިހާރު ވެސް 18 ކިލޯ މީޓަރުގެ މަގު ހެދުމުގެ މަޝްރޫއު ކުރިއަށްދާއިރު، އެ މަޝްރޫއު ދެ ވަނަ ފިޔަވައްސަކަށް ގޮސް އިތުރު 10 ކިލޯ މީޓަރުގެ މަގު ހެދުމަށް އިތުރުކޮށްފައިވެ އެވެ.

އެ މަޝްރޫއު ވެސް، ރައީސް ވިދާޅުވީ، މެދުނުކެނޑުމެއްނެތި ކުރިއަށްދާނެ ކަމަށެވެ.

ރަށް އުފެދިފައި އޮންނަ ގޮތުން ފުވައްމުލަކަކީ ލަފާފުރުމުގެ މައްސަލަ ބޮޑު ރަށެކެވެ. ރައީސް ވިދާޅުވީ އެ ދަތިތައް ހައްލުކުރުމަށް ބަނދަރު ބޮޑުކުރުމުގެ ސާވޭ ހެދުމަށް، ކުރިން ވެސް ފުވައްމުލަކު ބަނދަރު ހެދި ނިރާސް ކުންފުންޏާ ހަވާލުކުރަން ނިންމާފައިވާ ކަމަށެވެ. އެ ދިރާސާއަށް ފަހު ބަނދަރު ބޮޑުކުރެވެން އޮތް ވަރަކަށް ބަނދަރު ބޮޑުކުރާނެ ކަމަށް އެ މަނިކުފާނު ވިދާޅުވި އެވެ.

ފުވައްމުލަކުގެ ގިރާ ސަރަހައްދު ހިމާޔަތްކުރުމުގެ މަޝްރޫއަށް ވެސް ފައިސާ ހަމަޖެހިފައިވާ ކަމަށާއި އެ މަސައްކަތް ވަރަށް އަވަހަށް ފެށިގެންދާނެ ކަމަށް ރައީސް ވިދާޅުވި އެވެ. އޭގެ އިތުރުން ސްޕޯޓްސް ކޮމްޕްލެކްސްއަކާ އެކު ސްވިމިން ޕޫލެއް ހެދުމުގެ މަސައްކަތް ކުރާއިރު، ސިންތެޓިކް ޓްރެކެއް ހެދުމަށް ވެސް ބިޑްކޮށްފައިވެ އެވެ.

"މި ރަށުގެ ތަރައްގީއަށްޓަކައި ކުރަމުން ގެންދާ ވަރަށް ބައިވަރު މަސައްކަތްތައް އެބަހުރި،" އިތުރު ތަފްސީލަކަށް ވަޑައިނުގެން، ރައީސް ވިދާޅުވި އެވެ.