ރާއްޖޭގެ ދެކުނު ރަށެއްގައި ހަ އަހަރުގެ އަންހެން ކުއްޖަކަށް ޖިންސީ ގޯނާކުރި ކަމުގެ ތުހުމަތުގައި އުމުރުން ދުވަސްވީ އަންހެނަކު ހައްޔަރުކޮށް ޝަރީއަތް ނިމެންދެން ބަންދުކޮށްފި އެވެ.
ފުލުހުން ބުނީ ސައުތު ޕޮލިސް ރީޖަން ކަމަށްވާ، ގއ، ގދ، އައްޑޫ އަދި ފުވައްމުލައް ހިމެނޭ ސަރަހައްދުން ހަ އަހަރުގެ އަންހެން ކުއްޖަކަށް ޖިންސީ ގޯނާކޮށްފައިވާ މައްސަލައެއް މިމަހުގެ 24 ގައި ފުލުހުންނަށް ރިޕޯޓްކޮށްފައިވާ ކަމަށެވެ.
އެ މައްސަލައާ ގުޅިގެން ކޯޓު އަމުރެއްގެ ދަށުން 59 އަހަރުގެ އަންހެނަކު ހައްޔަރުކޮށްފައިވާ ކަމަށާއި އެމީހާގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން މިިދިޔަ ހުކުރު ދުވަހު އޭނާ ޝަރީއަތް ނިމެންދެން ބަންދުކޮށްފައިވާ ކަމަށް ވެސް ފުލުހުން ބުންޏެވެ.
ފުލުހުންނާއި ޖެންޑާ މިނިސްޓްރީ ގުޅިގެން އެ މައްސަލަ ބަލަމުން އަންނަ ކަމަށާއި އެ މައްސަަލައާ ގުޅިގެން އިތުރު މީހަކު ހައްޔަރުނުކުރާ ކަމަށް ވެސް ފުލުހުން ބުންޏެވެ.
ފުލުހުން އެގޮތަށް ބުންޏަސް އެ މީހާ ފްރޭމް ކުރީކަމަށާއި އެ ކުއްޖާއަށް ބެހުނީ އެހެން މީހެއް ކަމަށް ބުނެ އެކަމުގެ ތުހުމަތުގައި އައްޑޫ ގެއެއްގެ ދޮށުގައި ގިނަ ބަޔަކު އެއްވެ މިއަދު އަޑުގަދަކޮށްފައިވެ އެވެ.
