"އިންޑިއާ އައުޓް" ބެނާތަކުގެ ސްޕެލިންގް ބަދަލުކޮށް، އަދި އިންޑިއާގެ ނަން ގެނައުމެއް ނެތި މަންޒަރުން އެކަން ސިފަކުރެވޭ ގޮތަށް ބެނާތައް ހެދުމަކީ އިންޑިއާ އައުޓް ބެނާތައް ނަގަން ކުރިން ނެރެފައިވާ އަމުރަށް ގޮންޖެހުން ކަމަށް ކްރިމިނަލް ކޯޓުގެ އަމުރުގައި ބުނެފި އެވެ.
އިންޑިއާއާ ދެކޮޅަށް އިދިކޮޅު ޕީޕީއެމުން ހިންގާ ކެމްޕެއިންގެ ދަށުން ކުރީގެ ރައީސް އަބްދުﷲ ޔާމީންގެ ގެކޮޅުގައި ހުރި އިންޑިއާ އައުޓް ބެނާ ކޯޓު އަމުރެއްގެ ދަށުން މިދިޔަ މަހު ނެގުމާ އެކު، އިންޑިއާ އައުޓްގެ ސްޕެލިން ބަދަލުކޮށްގެންނާއި އިންޑިއާ ދިދަ ސިފަވާ ގޮތަށް ކުރެހުމަށްފަހު "އައުޓް" ލިޔެގެން ބެނާތައް ދަނީ ހަރުކުރަމުންނެވެ.
މިގޮތަށް ޕީޕީއެމްގެ އޮފީހުގައި ހަރުކުރި ބެނާތައް ކްރިމިނަލް ކޯޓުގެ އަމުރެއްގެ ދަށުން ފުލުހުން ރޭ ވަނީ ނައްޓާލައިފަ އެވެ. އެ އަމުރުގައިވަނީ އިންޑިއާގެ ނަން ދޭހަވާ ގޮތަށް އަކުރުތައް ބަދަލު ކުރުމާއި މަންޒަރުން އެކަން ތަސައްވުރު ކުރެވޭ ފަދަ ގޮތަކަށް ބެނާތައް ހަރު ކުރަމުން ދިއުމަކީ ކުރިން ނެރެފައިވާ އަމުރަށް ގޮންޖެހުމަށްފަހު އެ ކެމްޕެއިން މެސެޖްތައް ފާޅު ކުރުން ކަމަށެވެ.
"އިންޑިއާގެ ރަސްމީ ދިދައިގެ ހުރުމަތް ކެނޑޭ ފަދަ އަދި އިންޑިއާގެ ދިދައަށް އިހްތިރާމް ކުޑަވާ ފަދަ ކުރެހުންތަކުގެ ގްރެފިޓީ އާއި ބެނާތައް މާލޭގެ އެކި ތަންތަނުގައި ހަރުކުރަމުން ދަނީ ކޯޓު އަމުރާ ނިންމުމަށް ގޮންޖަހައި، ނުސީދާ އިބާރާތްތަކުންނާއި ކުރެހުންތަކުން މި ކެމްޕެއިންގެ މެސެޖް ފާޅުކުރަމުން ދިއުމުގެ ބޭނުމުގައި ކަމަށް ބެލުމުގެ އިހްތިމާލު އޮތުން." ކޯޓު އަމުރުގައި ބުނެފައިވެ އެވެ.
އަމުރުގައިވަނީ އިންޑިއާގެ ގައުމީ ދިދައާ ވައްތަރު ގޮތަށް ބެނާއެއް ހެދުމަށްފަހު އޭގައި "އައުޓް" ލިޔުމަކީ ހާރިޖީ ގުޅުންތަކަށް އަސަރުކޮށް، އޭގެ އަސަރު ދިވެހިންނަށް ކުރާނެ ކަމެއް ކަމަށް ބެލެވޭ ކަމަށެވެ. އަދި ދެ ގައުމުގެ ރައްޔިތުންގެ މެދުގައި ނުތަނަވަސްކަން އުފެދި، ހަމަނުޖެހުންތަކެއް ހިންގުމުގެ ފުރުސަތު އޮންނާނެ ކަމަށާއި އަދި އެއީ ގާނޫނީ ގޮތުން ކުށެއް ކަމަށް ވެސް އަމުރުގައިވެ އެވެ.
"ވަކި ގައުމަކަށް ނިސްބަތްވާ ގޮތަށް އަމާޒުކުރެވިގެން އިންތިޒާމް ކުރެވިގެން ހަރަކާތެއް ހިންގޭކަމާއި އެކަން ހިނގަމުންދަނީ މީހުން ބިރުގަންނަ ހާލަތެއް އުފެދޭ ގޮތަށް ކަމަށް ބެލެވުން." ގާޒީ ހުސައިން ފާއިޒް ރަޝާދު ނެރުއްވި އަމުރުގައިވެ އެވެ.
އިންޑިއާ އައުޓް ކެމްޕެއިން ހުއްޓުވަން ރައީސް އިބްރާހިމް މުހައްމަދު ސޯލިހް ގަރާރެއް ވެސް ނެރުއްވާފައިވެ އެވެ. އަމުރުގައި އެ ގަރާރަށް ވެސް އިޝާރާތްކޮށްފައިވެ އެވެ.