އިންޑިއާ އައުޓް ބެނާތައް ދެމި ގޭގެ ވެރިފަރާތްތައް ފުލުސް އޮފީހަށް ހާޒިރުވާން އަންގައިފި އެވެ.
އިދިކޮޅު ޕީޕީއެމް އާއި ޕީއެންސީ ކޯލިޝަނުން އިސްވެ ކުރިއަށް ގެންދާ އިންޑިއާ އައުޓް ހަރަކާތުގެ ތެރެއިން ދެމި ބެނާތައް ފުލުހުން ވަނީ ކޯޓު އަމުރަކާ އެކު، ނައްޓާލައިފަ އެވެ. އެގޮތުން ކުރީގެ ރައީސް އަބްދުﷲ ޔާމީންގެ ގެކޮޅާއި ޕީޕީއެމް އޮފީސް ހިންގާ އިމާރާތުގައި ހުރި ބެނާތައް ފުލުހުން ނެއްޓި އެވެ.
އިދިކޮޅު ކޯލިޝަނުން ބުނީ ޕީޕީއެމްގެ އޮފީސް ހިންގާ ހ. ހުރަފާ ގޭގެ ވެރިފަރާތާއި ގ. ހޭޅި ކިޔާ ގެއެއްގެ ވެރިފަރާތް ވެސް މިއަދު ފުލުސް އޮފީހަށް ހާޒިރުވާން އަންގާފައިވާ ކަމަށެވެ. އެ މީހުން ހާޒިރުކުރަނީ އިންޑިއާ އައުޓް ބެނާ ދެމި މައްސަލާގައި ކަމަށް އެ ކޯލިޝަނުން ބުންޏެވެ.
ޔާމީންގެ ގެކޮޅުގައި ހަރުކުރި ބެނާ ނެއްޓުމުން އިންޑިއާ އައުޓްގެ ސްޕެލިންގް ބަދަލުކޮށްގެންނާއި އިންޑިއާގެ ދިދަ ސިފަވާ ކުރެހުންތައް ހިމަނައިގެން އިތުރު ބެނާތަކެއް ހަރުކުރި އެވެ. އެކަމަކު ފަހުން ނެރުނު ކޯޓު އަމުރެއްގެ ދަށުން އެ ތަކެތި ވެސް ނެއްޓި އެވެ.
އިންޑިއާ އައުޓް ކެމްޕެއިން ހުއްޓުވަން ރައީސް އިބްރާހިމް މުހައްމަދު ސޯލިހް ވަނީ ރިޔާސީ ގަރާރެއް ވެސް ނެރުއްވައިފަ އެވެ.