ކޮވިޑަށް ޓެސްޓުކުރުމަށް މީހަކު ސާމްޕަލް ނަގަނީ.-- ފޮޓޯ: ފަޔާޒު މޫސާ/ މިހާރު
14 ޖޫން 2022 - 11:34
6 comments
ރާއްޖޭގައި މި ދުވަސްވަރު އަރިދަފުސް ރޯގާ އާއި ޑެންގޫ އަދި ބޭރަށް ހިންގުމާއި ކޮވިޑް ޖެހޭ މީހުން ވެސް އިތުރުވެފައިވާ ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) ގެ ތަފާސްހިސާބުތަކުން ދައްކައިފި އެވެ.
މިދިޔަ އަހަރާ އަޅާބަލާއިރު މި އަހަރުގެ މި ދުވަސްވަރު އާންމު ރޯގާތައް ޖެހޭ މީހުންގެ އަދަދު ވަރަށް ބޮޑަށް އިތުރެވެ. ޑެންގޫ ހުމުގެ ނުރައްކާތެރި ވައްތަރެއް ވެސް ފެތުރެމުންދާ ކަމަށް ޑޮކްޓަރުން ބުނެ އެވެ.
އެޗްޕީއޭ އިން އެންމެ ފަހުން އާންމުކޮށްފައި މައުލުމާތުން ދައްކާ ގޮތުން މެއި މަހުގެ ތެރޭގައި 13،361 މީހަކަށް އަރިދަފުސް ރޯގާ ޖެހިފައިވެ އެވެ. އަދި 185 މީހަކަށް ޑެންގޫ ޖެހިފައިވާއިރު ބޭރަށް ހިންގުމާއި ހޮޑުލުން 1824 މީހަކަށް ޖެހުނެވެ.
އާންމު ބަލިތައް ޖެހޭ މީހުންގެ އަދަދު މި ދުވަސްވަރު އިތުރުވެ ހޮސްޕިޓަލުތަކަށް ވެސް ބާރުބޮޑެވެ. އެކަމަކު ގަދަޔަށް ކެއްސާއިރު ހޮސްޕިޓަލުތަކުގައި ބައެއް މީހުން އުޅެނީ މާސްކް ވެސް ނާޅަ އެވެ.
އާންމު ބަލިތަކުގެ އިތުރުން މިދިޔަ ހަފްތާގެ ތެރޭގައި ކުއްލިއަކަށް ކޮވިޑް ޖެހޭ މީހުންގެ އަދަދު ވަނީ އިތުރުވެފަ އެވެ.
އެޗްޕީއޭ އިން ރޭ އާންމުކުރި ތަފާސްހިސާބުތަކުން ދައްކާ ގޮތުގައި މިދިޔަ ހަފްތާގެ ތެރޭގައި 142 މީހަކަށް ކޮވިޑް ޖެހިފައިވެ އެވެ. އެއީ މާލޭ ސަރަހައްދުން 50 މީހުންނާއި ރަށްރަށުން 40 އަދި ރިސޯޓުތަކުންނާއި ސިނާއީ މަސައްކަތްކުރާ މީހުންނަށް 52 މީހުންނެވެ.
މިދިޔަ މެއި މަހު ރާއްޖޭގެ ޕޮޒިޓިވިޓީ ރޭޓް ހަތަރު ޕަސެންޓްގައި ހުރި ނަމަވެސް މި ވަގުތު ރާއްޖޭގެ ޕޮޒިޓިވިޓީ ރޭޓް ހުރީ 8 ޕަސެންޓްގަ އެވެ. ކޮވިޑްގެ ކޭސްތައް އިތުރުވާން ފެށިއިރު މިއީ ސްކޫލު ބޮޑު ޗުއްޓީ ދުވަސްވަރަށްވާތީ ގިނަ ބަޔަކު ރަށްރަށަށް ދަނީ ދަތުރުކުރަމުންނެވެ.
ސާމްޕަލް ޕޮޒިޓިވިޓީ ރޭޓް ދައްކުވައިދޭ ޗާޓެއް.
ކުއްލިއަކަށް ކޮވިޑްގެ ކޭސްތައް މައްޗަށް އަރައިގެން ގޮސްފައިވާތީ އެޗްޕީއޭ އިން ވެސް ވަނީ ރައްކާތެރިވުމުގެ ގޮތުން މާސްކް އެޅުމާ އެކު ކޮވިިޑްގެ އަލާމާތްތައް ފެނިއްޖެ ނަމަ އެކަހެރިވުމަށް އެދިފަ އެވެ. އަދި ކޮންޓެކްޓުންގެ މައުލޫމާތު ހިއްސާކުރުމަށް އެ އެޖެންސީން އެދެ އެވެެ.
ކޮވިޑް ޖެހޭ މީހުންގެ އަދަދު އަނެއްކާ ވެސް އިތުރުވާތީ ސަމާލުވާން އެދިއްޖެ https://t.co/sa1vXGHBQE
— Mihaaru (@Mihaarunews) June 13, 2022
އާންމު ރޯގާތައް މި ދުވަސްވަރު އިތުރުވިއިރު ކުރިން ކޮވިޑް-19 އިން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާތީ އާންމު ބަލިތައް ވަރަށް ބޮޑަށް މަދުވި އެވެ. އެކަމަކު ރާއްޖޭގައި ބަލި އިތުރުވެފައި ވަނީ ކޮވިޑްގެ ކުރީގެ ދިރިއުޅުމާ އެއްގޮތަށް އުޅެން ފެށުމުންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ށަވިޔަނި
14 June 2022
ބަލައިގެން އުޅުން ރަނގަޅު. ބައެއް މީހުން ބުނަނީ މުޒާހަރާތައް ހުއްޓުވަން ދައްކާ ދޮގު ވާހަކަތަކޭ. ހުރިހާކަމެއްގަ ވިސްނުން ދަނީ ގޯސްކޮށް. މީހުން ފަތުރާ ވާހަކައަށް އަހަރެންދެނީ ބީރުކަންފަތެއް.
މިތުރުކަލޯ
14 June 2022
ދަތުރުފަތުރު ގިނަވެ ގައިގޯޅި ވާވަރަކަށް ބަލިފެތުރުން އިތުރުވުމެގެ ފުރުސަތު އޮންނާނޭ، ޖުންޖުލާގެ މޫސުމަކީވެސް ސަބަބެކޭ ބުނާތީ އަހަމޭ، ކުދިންނޭ އިހަށް ނުވިރައްކަލެއް ފަހަކުން ނުވާނެޔޭ،
ބަކުރުބޭ
14 June 2022
ތިދެން މާކުރިންވެސް އެނގޭ ކަމެއް. ދެން ޖޫން 20 ހިސާބުގަ ޕީސީއާރ ހަދަން މަޖުބޫރު ކުރީމަ ރަނގަޅުވާނެ.
ދގދސެފ×
14 June 2022
މާސްކުއަޅައިގެން ރޯގާތައް ފެތުރުން ކޮންމެސްމިންގަނޑަކަށް ކުޑަކުރެވިދާނެކަމަށް ބެލެވޭ.
ދޭސީ
14 June 2022
ސިއްހީ ހިދުމަތްދޭ ތަންތަނަށް ދާއިރު މާސްކު އެޅުން ހުއްޓާލާކަށް އެއްވެސް އިރަކު އެޗްޕީއޭއިން ނުބުނޭ. އެހެނަސް މިހާރު ހަމަ ހޮސްޕިޓަލްތަކަށްވެސް އެންމެން އަންނަނީ މާސްކު ނާޅާ.
އޯނޯ
14 June 2022
ތިޔަ ހިސާބު ތަކަކީ ހޮސްޕިޓަލް އޯ ކްލިނިކްސް ތަކަށް ދެއްކުމުން މިހާރަށް ރެކޯޑް ކުރެވިފަވާ އަދަދު ތަކެއް. އަހަރުމެން ވެސް ވަރު ގަދަ ރޯގާ އަކަށް ފަހު މިހިންދެމިލީ. ޢަދިވެސް ކެއްސުން ނުފިލަ. މަށަށް ޝައްކު ކޮވިޑް ކަން ޖެހުނިީ. ޢެ ހުރިހާ ސިމްޕްޓަމްސް ވެސް ހުރި. ޢެކަމަކު ނުދައްކަން. ގޭގަ އެކަހެރި ވެލައިގެން ތިބީ.