ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ކޮއްކޯފުޅު ނާޒިމް ސައްތާރު ހައްޔަރުކުރީ ދީނީ ހަރުކަށި މީހުން ރުއްސަން ކަމަށް މިރޭ ވިދާޅުވެ، ސަރުކާރަށް ނަޝީދުގެ ނުރުހުން އަމާޒު ކުރައްވައިފި އެވެ.
ނަޝީދުގެ ކޮއްކޯފުޅު އަދި ވަކީލް ނާޒިމް އއ. އަތޮޅުގެ ރިސޯޓެއްގައި ހުއްޓާ މިރޭ ހައްޔަރުކުރީ އެއްޖިންސުން ގުޅުން ހިންގިކަމުގެ ތުހުމަތުގަ އެވެ. އޭނާ ކަމަށް ތުހުމަތު ކުރެވޭ މީހަކު އެއް ޖިންސުން ގުޅުން ހިންގާ މަންޒަރު ފެންނަ ވީޑިއޯއެއް ކުރިން ވަނީ އާންމުންވެފަ އެވެ.
އެ ރިސޯޓު ކައިރި އަށް ފުލުހުން ދިއުމުން، ފުލުހުންގެ ބެލުމުގެ ދަށަށް އަމިއްލަ އަށް ނާޒިމް ދިއުމާއެކު، ބޭބޭފުޅު ނަޝީދު ކުރެއްވި ޓްވީޓެއްގައި ވަނީ ރައީސް އިބްރާހިމް މުހައްމަދު ސޯލިހުގެ ސަރުކާރުން އެ މަނިކުފާނުގެ ކޮއްކޮ ނާޒިމް ހައްޔަރުކުރީ ޖިނާއީ އިޖުރައާތުތަކާ ހިލާފަށް ކަމަށެވެ. އަދި އޭނާ ހައްޔަރުކުރީ ސަރުކާރުގައި ތިބި ދީނީ ހަރުކަށި މީހުންގެ ރުހުން ހޯދަން ކަމަށް ވެސް ނަޝީދުގެ ޓްވީޓްގައިވެ އެވެ.
ނަޝީދު އެގޮތަށް ވިދާޅުވިއިރު، އަދާލަތު ޕާޓީގެ ރައީސް އަދި ހޯމް މިނިސްޓަރު އިމްރާން އަބްދުﷲ މިރޭ ވަނީ އެފަދަ ކަންކަމުގައި ފުލުހުން ފަސްނުޖެހޭނެ ކަމަށް ވިދާޅުވެފަ އެވެ.
ބަންގްލަދޭޝްގެ އަލަމްގީރާއެކު އެއްޖިންސުން ގުޅުން ހިންގާ ކަމަށް ތުހުމަތު ކުރެވޭ އެތައް ބައެއް ވީޑިއޯ މިދިޔަ މަހުގެ ފަހުކޮޅު އާންމުވިއިރު، އެންމެ ފުރަތަމަ އާންމުވީ ނާޒިމްގެ ވީޑިއޯ އެވެ. އޭރުއްސުރެ ފެށިގެން އޭނާގެ ޕާސްޕޯޓް ވެސް އޮތީ ހިފަހައްޓައިފަ އެވެ.
ނާޒިމްގެ އިތުރުން އެ މައްސަލައިގައި ތުހުމަތު ކުރެވޭ މަޖިލީހުގެ ނޮޅިވަރަމް ދާއިރާގެ ކުރީގެ މެމްބަރު މުހައްމަދު ނަޝީދު (ކާނަލް) އާއި ފުލުހެއް ކަމަށްވާ އުމުރުން 35 އަހަރުގެ އަބްދުއްރަހުމާން ރަފީއު ވެސް ވަނީ ހައްޔަރުކޮށްފަ އެވެ. އެ މައްސަލާގައި ދެން ހިމެނޭ މީހުންގެ ވީޑިއޯތައް ކަށަވަރު ކުރުމުގެ މަސައްކަތް ކުރަމުންދާ ކަމަށް ފުލުހުން ބުނެ އެވެ.
އަލަމްގީރާއެކު، ނާޒިމާއި ކާނަލްގެ އިތުރުން ސަރުކާރުގެ ބައެއް މަގާމުތަކުގައި ތިބި މީހުންނާއި ބައެއް ވިޔަފާރިވެރިން އަދި ބައެއް އާންމުން ވެސް އެއްޖިންސުން ގުޅުން ހިންގާ ކަމަށް ވީޑިއޯތަކުން ތުހުމަތު ކުރެވެ އެވެ.
މި މައްސަލައިގެ ތަހުގީގަށް އަލަމްގީރު ވަނީ މި މަހުގެ 12 ގައި ހައްޔަރުކޮށްފަ އެވެ.