އެމްޑީޕީގެ ކޮންގްރެސް އަށް އެ މަނިކުފާނު ހުށަހަޅުއްވާ ގަރާރާ އެއްގޮތަށް ވެރިކަން ހިންގުން ބަރުލަމާނީ ނިޒާމަކަށް ބަދަލުކުރަން އެ ޕާޓީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލްގެ ތާއީދު ވަރަށް ބޭނުންވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު މިއަދު ވިދާޅުވެއްޖެ އެވެ.
އެމްޑީޕީ އޮފީހުގައި ބޭއްވި ނިއުސް ކޮންފަރެންސެއްގައި ނަޝީދު ވަނީ ބަރުލަމާނީ ނިޒާމު ގެނައުމަށް ގާނޫނުއަސާސީ އަށް ހުށަހަޅުއްވަން ބޭނުންފުޅުވާ އިސްލާހުތައް އާއްމުކުރައްވައިފަ އެވެ. އެ މަނިކުފާނުގެ ޑްރާފްޓުގައިވާ ގޮތުން ވެރިކަން ހިންގަވާނީ ބޮޑުވަޒީރެވެ. ދައުލަތުގެ އެންމެ އިސްފަރާތުގެ ގޮތުގައި ރައީސުލްޖުމްހޫރިއްޔާ ހުންނަވާނީ ރަމްޒީ މަގާމެއްގަ އެވެ.
ބަރުލަމާނީ ނިޒާމު ގެނައުމަށް ނަޝީދު ކުރައްވާ މަސައްކަތްޕުޅާ، ފައްޔާޒުއާ ގުޅުވައި ނޫސްވެރިއަކު ކުރި ސުވާލަކާ ގުޅިގެން ވިދާޅުވީ "ފައްޔާޒްގެ ތާއީދު ވެސް ބޭނުން" ކަމަށެވެ. ދައުލަތް ހިންގުމުގެ ތެރޭގައި ހުރި ގޯސްތަކުން ނިޒާމު އިސްލާހުކޮށް، ބަރުލަމާނީ އަށް ހިންގުން ބަދަލުކުރަން އެންމެން ވެސް އެ މަނިކުފާނާ އެކު ތިއްބަވަން ނަޝީދު އެދިވަޑައިގަތެވެ.
"ކުރެއްވި ސުވާލުގައި ދަންނަވާނީ ފައްޔާޒު އަޅުގަނޑުމެންނަށް ތާއީދުކުރުމަކީ ވަރަށް ވަރަށް ބޮޑަށް އެދޭ ކަމެކޭ،" ނަޝީދު ވިދާޅުވި އެވެ.
އެމްޑީޕީގެ ޗެއާޕާސަންގެ އިންތިހާބުގައި ފައްޔާޒު ނުކުންނެވުމުން ނަޝީދުގެ ކެންޑިޑޭޓުގެ ގޮތުގައި ވާދަކުރެއްވީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ (އިންތި) އެވެ. އެ ކެމްޕެއިނުގައި، ފައްޔާޒު ވިދާޅުވެފައި ވަނީ ރައީސް އިބްރާހިމް މުހައްމަދު ސޯލިހަށް ދެ ވަނަ ދައުރެއް ހޯދައިދެއްވުމަކީ އެ މަނިކުފާނު މަގާމުގައި އިސްކަމެއް ދެއްވައިގެން ކުރައްވާނެ ކަމެއް ކަމަށެވެ. އެ ކެމްޕެއިނުގައި ނަޝީދުގެ ފަޅިން ފައްޔާޒަށް ބޮޑެތި ތުހުމަތުތަކެއް ކޮށްފައިވެ އެވެ.
އެކަމަކު މި ފަހުން ނަޝީދު ވަނީ ފައްޔާޒުއާ ދެކޮޅަށް މަސައްކަތް ކުރެއްވުމަކީ ހެއްދެވުނު ގޯހެއް ކަމަށް ވިދާޅުވެފަ އެވެ. އެކަން ކުރެއްވުނީ ހެންވޭރު ދެކުނު ދާއިރާގެ މެމްބަރު ހުސެއިން ޝަމީމް (އަނދުން ހުސެއިން)އާ ހެދި ކަމަށް ވެސް ވިދާޅުވެފައިވެ އެވެ.
އެ މަނިކުފާނުގެ ވިސްނުންފުޅު ބަދަލުވެ ފައްޔާޒްއާ އެކުގައި ހުންނެވި ކަމަށް ވިދާޅުވި އިރު, އެމްޑީޕީގެ ތެރޭގައި "ބްރޯ ހެދިގެން" އުޅުއްވަނީ ކަމަށް ކުރިން ފައްޔާޒަށް ވަރަށް ބޮޑަށް ނަޝީދު ފާޑުވިދާޅުވެފައިވެ އެވެ. އަދި މިނިސްޓަރު ކަމުން ވަކިކުރެއްވުމުގެ މަސައްކަތުގައި ވެސް އިސްކޮށް އުޅުއްވާފައިވެ އެވެ.
އެކަމަކު، ނަޝީދު ފަހުން ވިދާޅުވީ އެއީ ޕާޓީ ތެރޭގައި ހިނގައިދިޔަ ސިޔާސީ މަސައްކަތެއް ކަމަށެވެ.