ތިލަމާލެ ބްރިޖު އެޅުމަށް ބޭނުންކުރާ ޕްލެޓްފޯމެއްގެ ނަގިލި ކަނޑައިގެން ގޮސް ވިލިމާލެ ފަރަށް މިއަދު އަރައިފި އެވެ.
ފުލުހުން ބުނީ ބްރިޖު އެޅުމަށް ބޭނުންކުރާ ޕްލެޓްފޯމެއް ފަރަށް އަރާފައިވާ ކަމަށް މިއަދު މެންދުރު ފަހު ވިލިމާލެ ޕޮލިސް ސްޓޭޝަނަށް ރިޕޯޓްކޮށްފައިވާ ކަމަށެވެ. އަދި އެ ހާދިސާގެ މައުލޫމާތު ލިބުމާ އެކު ފުލުހުން އެތަނުގައި ހަރަކާތްތެރިވަމުން އަންނަ ކަމަށެވެ.
ފުލުހުން ބުނި ގޮތުގައި އެ ހާދިސާގައި ތިން މީހަކަށް އަނިޔާވެގެން ވިލިމާލެ ހޮސްޕިޓަލަށް ވަނީ ގެންގޮސްފަ އެވެ.
"އެއްވެސް މީހަކަށް ބޮޑު އަނިޔާއެއް ލިބުނު މައުލޫމާތު ލިބިފައެއް ނުވޭ،" ފުލުހުން ބުންޏެވެ.
ފުލުހުން ބުނި ގޮތުގައި އެ ހާދިސާއާ ގުޅިގެން އިތުރަށް ބަލަންޖެހޭ ކަންކަން އަންނަނީ ބަލަމުންނެވެ.
އެ ޕްލެޓްފޯމް ފަރަށް އެރިއިރު ބްރިޖުގެ މަސައްކަތް ކުރަމުން ދާތީ، މާލެ/ވިލިމާލެ ކަނޑުއޮޅިން ދަތުރުކުރުމަކީ މިހާރު ރައްކާތެރިކަމަށް ނުވާތީ ޓްރާންސްޕޯޓް މިނިސްޓްރީން ވަނީ އެ ސަރަހައްދުން އާންމު އުޅަނދުފަހަރު ދަތުރުކުރުން އިއްޔެއިން ފެށިގެން މަނާކޮށްފަ އެވެ.
މި ސަރުކާރުގެ އުމްރާނީ ތަރައްގީގެ އެންމެ ބިޔަ މަޝްރޫއު ކަމަށްވާ މާލެ، ވިލިމާލެ، ތިލަފުށި އަދި ގުޅިފަޅު ގުޅުވައިލާ ތިލަމާލެ ބްރިޖުގެ ފުރަތަމަ ތަނބުގެ ބިންގާ މި މަހު ވަނީ އަޅައިފަ އެވެ. އެ ބްރިޖުގެ މަސައްކަތަށް މާލޭގެ އިންޑަސްޓްރިއަލް ވިލެޖުން ބޮޑު ސަރަހައްދެއް ވެސް ވަނީ ބަންދުކޮށްފަ އެވެ.
އިންޑިއާގެ އެފްކޮންސް ކުންފުނިން ރާއްޖޭގައި މަސައްކަތް ފަށާފައިވާ ތިލަމާލެ ބްރިޖުގެ ފުރަތަމަ ފިޔަވަހި ކަމަށްވާ، މާލެ އާއި ވިލިމާލެ ގުޅާލުން އަންނަ އަހަރު މެދުތެރެ އަށް ނިމޭނެ ކަމަށް ސަރުކާރުން ބުނެ އެވެ.
