ހުޅުމާލޭ ދެވަނަ ފިޔަވަހީގައި އިމާރާތް ކޮށްފައިވާ ހިޔާ ފްލެޓްތަކަކީ ރާއްޖެއާ ނުގުޅޭ ގޮތަކަށް، މާ އަގު ބޮޑުކޮށް ހިންގި މަޝްރޫއެއް ކަމަށާއި ގިނަ އަދަދެއްގެ މީހުން ފްލެޓަށް ކުލި ނުދައްކާ ކަމަށް ވޯލްޑް ބެންކުން ބުނެފި އެވެ.
ވޯލްޑް ބެންކުން މި މަހު ނެރެފައިވާ "މޯލްޑިވްސް ޑިވެލޮޕްމަންޓް އަޕްޑޭޓް" ރިޕޯޓުގައި ބުނާ ގޮތުން މި އަހަރުގެ އޭޕްރިލް މަހާ ހަމައަށް ހިޔާ ފްލެޓުގައި 6،338 އާއިލާ ދިރިއުޅެން ފަށާފައި ވާއިރު އޭގެ ތެރެއިން 2،345 ތަނުން ކުލި ނުދައްކަ އެވެ.
ހުޅުމާލޭ ފުރަތަމަ ފިޔަވަހިން ސަރުކާރުން ދޫކޮށްފައިވާ އެކި ސޯޝަލް ހައުސިން ޔުނިޓުތަކުން ވެސް 800 އަށް ވުރެ ގިނަ މީހުން ކުލި ނުދައްކާ ކަމަށް އެ ރިޕޯޓުގައި ބުނެފައިވެ އެވެ.
ހިޔާ ފްލެޓުގައި ދިރިއުޅޭ މީހުން ކުލި ނުދައްކާ ނަމަ ޖޫރިމަނާ ކުރާނެ ކަމަށް ހައުސިން ޑިވަލޮޕްމަންޓް ކޯޕަރޭޝަން (އެޗްޑީސީ) އިން ވަނީ ބުނެފަ އެވެ. ނަމަވެސް މިހާތަނަށް އެއްވެސް ބަޔަކު ޖޫރިމަނާކޮށްފައިވާ ކަމެއް ނުވަތަ ކުލި ނުދައްކާ މީހުންގެ އެއްވެސް ތަފާސް ހިސާބެއް އެ ކުންފުނިން އާންމެއް ނުކުރެ އެވެ.
ވޯލްޑް ބެންކުގެ ރިޕޯޓުގައިވާ ގޮތުން އެ ފްލެޓްތަކުގައި ދިރިއުޅޭ މީހުންނަށް ކުލި ދައްކަން އިތުރު ފުރުސަތު ދިނަސް އެކަމުގައި އެއްވެސް ކުރިއެރުމެއް ނުލިބެ އެވެ. އަދި އެ މީހުން އަތުން ފްލެޓް އަތުލުމުގެ ބާރު އެޗްޑީސީ އަށް އޮންނަ ކަމަށާއި ނަމަވެސް އެއްވެސް ބައެއްގެ އަތުން ފްލެޓެއް އަތުލަން މަސައްކަތް ކޮށްފައި ނުވާ ކަމަށް ވަނީ ބުނެފަ އެވެ.
ހިޔާ މަޝްރޫއުގެ ޑިޒައިނާއި އެ ތަންފީޒު ކޮށްފައިވާ ގޮތާ ގުޅޭ ގޮތުން ވޯލްޑް ބެންކުން ވަނީ ތިން މައްސަލައެއް ފާހަގަ ކޮށްފަ އެވެ.
އެއް ކަމަކަށް ވޯލްޑް ބެންކުން ބުނީ ހިޔާގެ 25 ބުރީގެ އުސް އިމާރާތްތަކަކީ ދިވެހިން އާންމުކޮށް ދިރިއުޅެމުން އަންނަ ފަދަ ތަންތަން ނޫން ކަމަށެވެ. އަދި ކޮންމެ ޓަވަރެއްގައި ކުޑަ ހަތަރު ލިފްޓު ހުންނަ އިރު ޕީކް ގަޑިތަކުގައި އެތަން ތޮއްޖެހޭ ކަމަށާއި މިކަމުގެ ސަބަބުން ލޮބީ އޭރިއާ ބޮޑު ކުރުމަށް އެޗްޑީސީ އަށް އިތުރު ހަރަދުކުރަން ޖެހުނު ކަމަށް ވޯލްޑް ބެންކުން ބުންޏެވެ.
އޭގެ އިތުރުން ހިޔާ ފްލެޓުގެ ފިނިޝިން މަސައްކަތް ނުނިންމާ ހަވާލުކުރުމުގެ ސަބަބުން އެތަންތަނުގައި ދިރިއުޅޭ މީހުން އަމިއްލަ އަށް ހަދަން ޖެހިފައިވާ ކަމަށާއި އެކަމަށްޓަކައި ބީއެމްއެލް އިން ލޯނުތަކެއް ހަމަޖައްސާފައިވީ ނަމަވެސް ގިނަ މީހުންނަށް އެވަރުގެ ހަރަދެއް ކުރަން ދަތިވާނެކަން ފާހަގަކޮށްފައިވެ އެވެ.
ހިޔާގައި އުޅޭ ގިނަ ބަޔަކު ކުލި ނުދައްކާ ކަން ހާމަވެފައިވާ އިރު އެ ފްލެޓުގެ ވެރިން މީގެ ކުރިން ކޮށްފައިވާ އިހުތިޖާޖުތަކުގައި ވަނީ ކުލި ކުޑަ ކުރުމަށް ގޮވާލައިފަ އެވެ. އަދި ބައެއް ފްލެޓުތަކުގެ ބޭރުގައި މިހާރު ވެސް 5،600ރ. އަށް ކުލި ކުޑަ ކުރުމަށް ގޮވާލާ ބެނާ ހަރުކޮށްފައި ހުއްޓެވެ.