އެމްޑީޕީގެ ތެރޭގައި އުފެދިފައިވާ ބޮޑެތި ހިޔާލުތަފާތުވުންތަކަށް ކޮންމެވެސް ވަރެއްގެ ހައްލެއް ލިބުނު ކަމުގެ މަންޒަރު، މިދިޔަ އޮގަސްޓް މަހު ބޭއްވި ކޮންގްރެސް ނިމުނުއިރު އެ ޕާޓީގެ ލީޑަރުން ދެއްކެވިޔަސް ރައީސް އިބްރާހިމް މުހައްމަދު ސޯލިހްގެ ބައްދަލުވުމަށް މާލޭގައި ހުންނެވި ނަމަވެސް ވަޑައިނުގަންނަވާނެ ކަމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް އިބްރާހިމް މުހައްމަދު ސޯލިހްއާ މެދު ހިތްހަމަޖެހިވަޑައިނުގެން ހުންނެވިކަން ނަޝީދު އަނެއްކާވެސް ހާމަކުރެއްވީ އެމްޑީޕީގެ ގައުމީ މަޖިލިސް މެމްބަރުންގެ ގްރޫޕްގަ އެވެ.
އެމްޑީޕީގެ ގައުމީ މަޖިލީހުގެ މެމްބަރުންނާ، އާރަށުގައި މިރޭ ބައްދަލުކުރެއްވަން ރައީސް ވަނީ ދައުވަތު ފޮނުއްވައިފަ އެވެ. މިއީ، އެމްޑީޕީގެ ކޮންގްރެސްއަށް ފަހު ގައުމީ މަޖިލީހުގެ މެމްބަރުންނާ އެމްޑީޕީގެ އިސް ލީޑަރު، ރައީސް އިބްރާހިމް މުހައްމަދު ސޯލިހް ބާއްވަވާ ފުރަތަމަ ބައްދަލުވުމެވެ.
އެމެރިކާގައި މިހާރު ހުންނެވި ނަޝީދު ވިދާޅުވީ އެ ދައުވަތަށް އެމަނިކުފާނު ވަޑައިނުގަންނަވާނެ ކަމަށެވެ. މާލޭގައި ހުންނެވި ނަމަވެސް އެމަނިކުފާނު އަމަލުކުރައްވާނީ އެގޮތަށް ކަމަށް ވިދާޅުވި އެވެ.
"ރައީސުލްޖުމްހޫރިއްޔާ ވެސް އަޅުގަނޑާ ވާހަކަ ދައްކަވައި އެކީ ކަންކަން ކުރައްވާކަށް ބޭނުންފުޅެއް ނުވޭ. ވީމާ އަޅުގަނޑުވެސް ދެން ބޭނުމެއް ނޫން،" ނަޝީދުގެ މެސެޖުގައިވެ އެވެ.
މީގެކުރިން ނަޝީދު ވަނީ ރައީސް އިބްރާހިމް މުހައްމަދު ސޯލިހްއާ އެކު ސިޔާސީ މަސައްކަތް ނުކުރައްވާނެ ކަމަށް ވެސް ވިދާޅުވެފަ އެވެ. އެކަމަކު ސިޔާސީ ކަންކަމުގައި ހިޔާލުތަފާތުވުންތައް އެމްޑީޕީގެ ތެރޭގައި އޮންނާނެ ކަމަށް ވިދާޅުވެ، އެމްޑީޕީގެ ކޮންގްރެސް ނިމުނުއިރު ދެއްކެވީ މައްސަލަތަކުގައި ހައްލަކަށް އާދެވިފައިވާ ތަނެވެ.
ބަރުލަމާނީ ނިޒާމަކަށް ބަދަލުވާން ކޮންގްރެސްއަށް ނަޝީދު ހުށަހެޅުއްވި ގަރާރަށް ތާއީދެއް ނުލިބުނެވެ. އެ ގަރާރު އަނބުރާ ގެންދެވީ އެމަނިކުފާނު ވިދާޅުވެފައިވާ ގޮތުގައި، އިތުރަށް ވާހަކަ ދައްކައި މަޝްވަރާ އިން ހައްލެއް ހޯދަން އެއްބަސްވެވުމުންނެވެ.
ރައީސް އިބްރާހިމް މުހައްމަދު ސޯލިހް އާއި ނަޝީދުއާ ދެމެދު ގުޅުން ގޯސްވީ ވެރިކަން ހިންގުން ބަރުލަމާނީ ނިޒާމަކަށް ބަދަލުކޮށް، ބޮޑުވަޒީރަކަށް ވެވަޑައިގަތުމުގެ ޖާގަ ދެއްވަން އެދިވަޑައިގަތް ހިސާބުންނެވެ. އެކަމަކު މިއީ އެމަނިކުފާނަށް ކުރެއްވޭނެ ކަމެއް ނޫން ކަމަށާއި ރައްޔިތުންގެ އަތްމަތީގައި އޮތް ކަމެއް ކަމަށް ރައީސް ވަނީ ވިދާޅުވެފަ އެވެ.
އޭގެ ފަހުން އެމަނިކުފާނު ވަނީ ދެ ވަނަ ދައުރަކަށް ކުރިމަތިލައްވާނެ ކަން އިއުލާންކުރައްވައިފަ އެވެ.
ނަޝީދު ވެސް ވިދާޅުވަމުން ގެންދެވީ އެމްޑީޕީގެ ޕްރައިމަރީގައި އެމަނިކުފާނު ވާދަކުރައްވާނެ ކަަމަަށެވެ. އެއާއެކު ވެސް ބަރުލަމާނީ ނިޒާމުގެ މަސައްކަތް ދޫކޮށްނުލައްވަ އެވެ.
މި ފަހުން ވިދާޅުވީ ރާއްޖޭގެ ރައީސްކަން ކުރައްވައިގެން އަނެއްކާވެސް ލިބޭނީ "ބޮނޑިއެއް" ކަމަށާއި އެ މަނިކުފާނު އަދިވެސް ބޭނުންފުޅުވަނީ ވެރިކަން ހިންގުން ބަރުލަމާނީ ނިޒާމަކަށް ބަދަލުކުރުމުގެ މަސައްކަތް ކާމިޔާބު ކުރައްވަން ކަމަށެވެ.
"ނިޒާމު ބަދަލުކުރުމުގެ މަސައްކަތް އަޅުގަނޑު ކުރާނެ. އަޅުގަނޑު ދެކޭނީ އަޅުގަނޑަށް ކާމިޔާބުވާނެ ކަމަށް. އަޅުގަނޑު ދެކޭނީ ރިޔާސީ އިންތިހާބަށް ވުރެން މުހިއްމު ވެގެން އަންނަން ވާނީ ޕާލަމެންޓްރީ އިންތިހާބު ކަމަށް،" ނަޝީދު އައްޑޫގައި މިދިޔަ މަހު ވިދާޅުވެފައިވެ އެވެ.
ނަޝީދުގެ މި މަސައްކަތް ކުރެއްވިޔަސް އަންނަ އަހަރުގެ ރިޔާސީ އިންތިހާބާ ހަމައަށް ބަރުލަމާނީއާ ގުޅޭ ނިންމުމެއް ޕާޓީން ނިންމަން ހަމަޖެހިފައި ނެތް ކަމަށް ޗެއާޕާސަން ފައްޔާޒް އިސްމާއިލް ވަނީ ވިދާޅުވެފަ އެވެ.