ރައީސް އިބްރާހިމް މުހައްމަދު ސޯލިހު، އާރަށުގައި ރޭ ބޭއްވެވި އެމްޑީޕީގެ ގައުމީ މަޖިލީހުގެ ބައްދަލުވުމުގައި މެމްބަރުންނަށް ހަނދާން ކޮށްދެއްވީ ބަދަހި ގުޅުމުގެ މަތީގައި ދެމިތިބެ 2023 ކާމިޔާބުކުރަން މަސައްކަތް ކުރަން ޖެހިފައިވާކަން ކަމަށް ބައެއް މެމްބަރުން މިއަދު ވިދާޅުވެއްޖެ އެވެ.
ރައީސުލްޖުމްހޫރިއްޔާ އަށް ހާއްސަ ކޮށްފައިވާ ރަށުގައި ބޭއްވި ބައްދަލުވުމުގައި ބައިވެރިވެވަޑައިގަތް ބައެއް މެމްބަރުން ވިދާޅުވީ، އެމްޑީޕީގެ އެތެރޭގެ ހިޔާލުތަފާތުވުންތަކުގެ ވާހަކައެއް އަދި ރިޔާސީ އިންތިހާބާ ގުޅޭ ގިނަ ވާހަކަތަކެއް ވެސް ރައީސް ނުދައްކަވާ ކަމަށެވެ. އެމްޑީޕީން 2023 ވެސް ކާމިޔާބުކުރުމުގެ މުހިއްމު ކަން ހަނދާންކޮށްދެއްވި ކަމަށް މެމްބަރުން ވިދާޅުވި އެވެ.
"ރައީސް ވިދާޅުވީ މެމްބަރުންނާ ބައްދަލު ނުވާތާ ގިނަ ދުވަސްތަކެއް ވެފައިވާތީ ބައްދަލުކޮށްލެއްވީ ކަމަށް. އެމްޑީޕީ އަށް 2018 ކާމިޔާބުވުމުގައި މެމްބަރުންގެ މަސައްކަތް ފާހަގަކުރެއްވި. އުނދަގޫ ހާލަތުގައި ވެސް ހުރިހާ އެންމެން އެކުގައި ތިބެވުމަކީ ޕާޓީއަށް ކުރިއެރުން ލިބުނު ސަބަބުކަން ހަނދާންކޮށްދެއްވީ،" ނަން ހާމަނުކުރަން އެދިވަޑައިގެން ގައުމީ މަޖިލީހުގެ މެމްބަރަކު ވިދާޅުވި އެވެ.
އެހެން މެމްބަރަކު ވިދާޅުވި ގޮތުގައި ގައުމީ މަޖިލީހުގެ ހުރިހާ މެމްބަރުންނަށް ނިސްބަތް ކުރައްވައި ރައީސް ދެއްކެވި ކުރު ވާހަކަފުޅުގައި 2023 އެމްޑީޕީ އަށް ކާމިޔާބުކުރަން ގިނަ މަސައްކަތްތަކެއް ކުރަން ޖެހޭ ކަމަށް ސާފުކޮށް ވިދާޅުވި އެވެ. އެދިވަޑައިގަތީ ކުރިއެކޭ އެއްގޮތަށް އެންމެންގެ އެއްބާރުލުމަށް ކަމަށް އޭނާ ވިދާޅުވި އެވެ.
"ދެން ވަކިވަކިން މެމްބަރުން ތިއްބެވި މޭޒުތަކަށް ވަޑައިގެން ވާހަކަ ދެއްކެވި. ޖުމްލަކޮށް ދެއްކެވި ވާހަކަފުޅުގައި ޕާޓީއަށްޓަކައި މެމްބަރުން ކުރާ މަސައްކަތް ފާހަގަކުރެއްވީ،" އޭނާ ވިދާޅުވި އެވެ.
އެމްޑީޕީގެ ގައުމީ މަޖިލީހުގެ މެމްބަރުންނާ ރައީސް ބައްދަލުކުރެއްވި އިރު، ޕާޓީގެ ތެރޭގައި އެ މަނިކުފާނާއި ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ ފެކްޝަނެއް އޮވެ އެވެ. އެކި ކަންކަމުގައި ހިޔާލު ތަފާތުވެ، ޕާޓީތެރެ ވަރަށް ހޫނުވާ ފަހަރު ވެސް އާދެ އެވެ.
އެމްޑީޕީގެ ގައުމީ މަޖިލީހުގެ ރޭގެ ބައްދަލުވުމުގައި ދެ ރައީސުންގެ ފެކްޝަނުގެ މެމްބަރުން ވެސް ބައިވެރިވެވަޑައިގަތެވެ.
އެމްޑީޕީގެ ހިޔާލުތަފާތުވުންތަކުން އަރައިގަނެވިފައިވާ މަންޒަރު ނިމިގެންދިޔަ އެމްޑީޕީގެ ކޮންގްރެސްގައި ދެއްކި އެވެ. އެކަމަކު، ރައީސްކަން ކުރައްވާ ގޮތުން ހިތްހަމަޖެހިވަޑައިނުގެން ހުންނެވި ކަމަށް ނަޝީދު އަނެއްކާވެސް ވަނީ ގައުމީ މަޖިލީހުގެ މެމްބަރުންގެ ގާތު ވިދާޅުވެފަ އެވެ.
ގައުމީ މަޖިލީހުގެ މެމްބަރުންނަށް ރައީސް ފޮނުއްވި ދައުވަތަށް އިންކާރުކުރައްވައި ނަޝީދު ވިދާޅުވެފައި ވަނީ ރައީސްގެ ދައުވަތަކަށް އެ މަނިކުފާނު ވަޑައިނުގަންނަވާނެ ކަމަށެވެ. މާލޭގައި ހުންނެވި ނަމަވެސް އަމަލު ކުރައްވާނީ އެގޮތަށް ކަމަށް ނަޝީދު ވިދާޅުވި އެވެ.
"ރައީސުލްޖުމްހޫރިއްޔާ ވެސް އަޅުގަނޑާ ވާހަކަ ދައްކަވައި އެކީ ކަންކަން ކުރައްވާކަށް ބޭނުންފުޅެއް ނުވޭ. ވީމާ އަޅުގަނޑުވެސް ދެން ބޭނުމެއް ނޫން،" ނަޝީދުގެ މެސެޖުގައިވެ އެވެ.
އެމްޑީޕީގެ ޕްރައިމަރީގައި ވާދަކުރައްވާނެ ކަން ނަޝީދު އިއުލާން ކުރައްވާފައިވާ އިރު އެމްޑީޕީގެ ރިޔާސީ ކެންޑިޑޭޓު ހޮވަން ބާއްވާ ޕްރައިމަރީގައި ވާދަކުރައްވާނީ ދެ ބޭފުޅުން ކަމަށް ބެލެވެ އެވެ. ބަރުލަމާނީ އަކީ ރާއްޖެއަށް އެންމެ ރަނގަޅު ނިޒާމް ކަމަށާއި އަދިވެސް ބޭނުންވަނީ އެ މަގަށް ވެރިކަން ބަދަލުކުރަން ކަމަށް ނަޝީދު ވިދާޅުވެފައި ވެ އެވެ. ނަމަވެސް ރިޔާސީ ކެންޑިޑޭޓު ހޮވާ ޕްރައިމަރީގައި ވާދަނުކުރައްވާނެ ކަމަކަށް ވިދާޅެއް ނުވެ އެވެ.
އެމްޑީޕީގެ އިސް ބައެއް ބޭފުޅުން ވިދާޅުވެފައިވާ ގޮތުގައި މި އަހަރު ނިމުމުގެ ކުރިން ޕާޓީގެ ޕްރައިމަރީ އޮންނާނެ އެވެ.