ރާއްޖޭގައި އަރަބި ތައުލީމު އުނގަންނައިދިނުމަށް ހާއްސަ، އަރަބިއްޔާ ސްކޫލުގެ ޕްރިންސިޕަލް މުހައްމަދު ޝުޖާއު އަބްދުލްރަހީމް އެ މަގާމުން ވަކިކޮށް، ނެޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އަށް ބަދަލުކޮށްފި އެވެ.
ވަގުތީ އިމާރާތާ އެކު އަރަބިއްޔާ ސްކޫލަށް ކުރިމަތިވެފައިވާ ދަތިތަކުގެ މައްސަލަ ސޯޝަލް މީޑިއާގައި އާންމުކުރަމުން އަންނަ، "ސޭވް އަރަބިއްޔާ" އިން ކުރި ޓްވީޓެއްގައި ބުނިގޮތުގައި، ޝުޖާއު މަގާމުން ވަކިކުރީ ބެލެނިވެރިން ކުރިއަށް ގެންދާ "ސޭވް އަރަބިއްޔާ" ކެމްޕެއިން ހުއްޓުވުމަށް އޭނާ މަސައްކަތް ނުކުރައްވާތީ އާއި އެ މައްސަލާގައި ބެލެނިވެރިންނާ އެކު އޭނާ ހުންނެވުމުންނެެވެ.
އެކަމަކު އެ މައްސަލައާ ގުޅިގެން ސުވާލުކުރުމުން ވެސް ޝުޖާއު ވަކި އެއްޗެއް ވިދާޅެއް ނުވެ އެވެ.
ޝުޖާއު މަގާމުން ވަކި ކުރެއްވިތޯ ސުވާލުކުރުމުން އެޑިއުކޭޝަން މިނިސްޓްރީގެ ޕާމަނަންޓް ސެކްރެޓަރީ އަހުމަދު އަލީ، "މިހާރު" އަށް ވިދާޅުވީ، މަގާމުން އަދި ވަކި ނުކުރާ ކަމަށާއި އެކަމަކު މާދަމާ އިން ފެށިގެން ޝުޖާއު މަސައްކަތަށް ނުކުންނަވާނީ އެންއައިއީ އަށް ކަމަށެވެ.
އަހުމަދު ވިދާޅުވި ގޮތުގައި އެ ނިންމުން ނިންމީ ސިވިލް ސާވިސް ގަވާއިދުގެ ތެރެއިންނެވެ. އެއީ "ސޭވް އަރަބިއްޔާ" ކެމްޕެއިނާ އެއްގޮތަކަށް ވެސް ގުޅުމެއް އޮތް ކަމެއް ނޫން ކަމަށް އޭނާ ވިދާޅުވި އެވެ.
އަހުމަދު ވިދާޅުވީ އެންއައިއީ އަށް ޝުޖާއު ބަދަލުކުރީ އިސްލާހީ ފިޔަވަޅެއްގެ ގޮތުން ނޫން ކަމަށާއި އެއީ ސްކޫލުތަކުގެ އިދާރީ މަގާމުތަކަށް އެ މިނިސްޓްރީން ގެންނަމުންދާ ބަދަލުތަކުގެ ތެރެއިން ގެނައި ބަދަލެއް ކަމަށެވެ.
"މިކަމަކާ [ޕްރިންސިޕަލް ބަދަލުކުރުމާ] މިހާރު އެ ސްކޫލުގެ ބެލެނިވެރިންގެ ކަންބޮޑުވުންތަކާ އެއްވެސް ގުޅުމެއް ނެތް. މިއީ މިނިސްޓްރީން އިދާރީ ގޮތުން ގެނައި ބަދަލެއް،" އަހުމަދު ވިދާޅުވި އެވެ.
އަރަބިއްޔާ ސްކޫލުގެ ޕްރިންސިޕަލްގެ މަގާމަށް ޝުޖާއު ހަމަޖެއްސީ ކުރިން އެމަގާމުގައި ހުންނެވި ނަސްރުﷲ އިސްތިއުފާ ދެއްވުމާ ގުޅިގެން، ޖެނުއަރީ 8، 2018 ގަ އެވެ.
އަރަބިއްޔާ ސްކޫލަށް އެކަށީގެންވާ އިމާރާތެއް ސަރުކާރުން ހޯދައި ނުދެވޭ މައްސަލަ ވަނީ ވަރަށް ބޮޑުވެފަ އެވެ. އެހެންވެ، އެ ކަމާ އެ ސްކޫލުގެ ބެލެނިވެރިން އިހުތިޖާޖު ކުރާތާ ދުވަސްތަކެއް ވެއްޖެ އެވެ. އަރަބިއްޔާގެ ކުދިންނަށް ދާއިމީ ތަނެއްގެ ގޮތުގައި ހަމަޖެއްސީ ޖަމާލުއްދީން ސްކޫލުގެ ކުރީގެ ބިން ކަމަށް ވާއިރު، ޖޭއެސްގެ އެނެކްސްއެއް އެ ބިމަށް އިތުރު ކުރާތީ އަރަބިއްޔާ އަށް ލިބޭ ޖާގަ ކުޑަވުމަކީ ބެލެނިވެރިންގެ ކަންބޮޑުވުމެކެވެ.