އަރަބިއްޔާ ސްކޫލުގެ ޕްރިންސިޕަލް މުހައްމަދު ޝުޖާއު މިއަދު މަގާމުން ވަކިކުރުމާ ގުޅިގެން އެ ސްކޫލު ހިންގުން ވަގުތީ ގޮތުން އިސްކަންދަރު ސްކޫލުގެ ޕްރިންސިޕަލް ހުސައިން ސައީދާ އެޑިއުކޭޝަން މިނިސްޓްރީން ހަވާލު ކޮށްފި އެވެ.
އެ މިނިސްޓްރީން މިރޭ ބުނީ، އެ އިދާރީ ބަދަލު ގެނައީ އަރަބިއްޔާ ސްކޫލުގެ ކިޔެވުން އިތުރަށް ހަރުދަނާކޮށް، ކުދިންނަށް އެންމެ ފަހި ގޮތަށް ކަންކަން ރާވާއި އިންތިޒާމު ކުރުމަށް ކަމަށެވެ.
"ދަރިވަރުންނަށް ފޯރުކޮށްދެވޭ ތައުލީމުގެ ފެންވަރު ރަނގަޅުކޮށް، ސަރުކާރު ސްކޫލުތަކުގެ ހިންގުން ހަރުދަނާކުރުމަށް ގެންނަންޖެހޭ ބަދަލުތައް ގެނައުމަކީ މި މިނިސްޓްރީ އިން އަބަދުވެސް ކުރަމުން އަންނަ މަސައްކަތެއް،" އެޑިއުކޭޝަން މިނިސްޓްރީގެ މީޑިއާ އޮފިޝަލަކު ވިދާޅުވި އެވެ.
އަރަބިއްޔާ ސްކޫލު ހިންގުމާ ވަގުތީ ގޮތުން ހަވާލުވި، ހުސައިން ސައީދަކީ ތައުލީމީ ދާއިރާގައި މިހާރު ހުންނެވި އެންމެ ތަޖުރިބާކާރު އެއް ޕްރިންސިޕަލެވެ. އޭނާ ވަނީ މާލޭގެ ބައެއް އެހެން ސްކޫލުތަކަށް މީގެ ކުރިން ގެނައި އިދާރީ ބަދަލުތަކާ ގުޅިގެން ވެސް އެ ތަންތަނުގެ ވަގުތީ ޕްރިންސިޕަލްކަން ކުރައްވައިފަ އެވެ.
އައްޑޫ ފޭދު އަށް އުފަން ހުސައިން ސައީދު، ތައުލީމީ ދާއިރާގައި 24 އަހަރު ހޭދަކުރައްވާފައިވާއިރު، ޕްރިންސިޕަލްކަން ކުރައްވާތާ މިހާރު 19 އަހަރު ވެއްޖެ އެވެ. އޭނާ ޕްރައިމަރީ އާއި ސެކަންޑަރީ ޓީޗިން އިން ޑިގްރީ ހާސިލު ކުރެއްވީ މިސްރުގެ އަޒްހަރު ޔުނިވާސިޓީންނެވެ. އެޑިއުކޭޝަނަލް މެނޭޖުމަންޓުގެ ދާއިރާ އިން މާސްޓާސް ހެއްދެވީ އިންޑިއާގެ މައިސޫރު ޔުނިވާސިޓީންނެވެ.
އަރަބިއްޔާގެ ހިންގުން އެހެން ސްކޫލެއްގެ ޕްރިންސިޕަލަކާ މި ހަވާލުކުރީ، އަރަބިއްޔާ ހިންގުމުގައި ހަތަރު އަހަރު ވަންދެން ހުންނެވި ޝުޖާއު އެ މަގާމުން ވަކިކޮށް، ނޭޝަނަލް އިންސްޓިޓިއުޓް އޮފް އެޑިއުކޭޝަން (އެންއައިއީ) އަށް ބަދަލުކުރުމަށް ފަހު އެވެ.
އަރަބިއްޔާ ސްކޫލުގެ ހައްގުތައް ހޯދުމަށް ސޯޝަލް މީޑީއާގައި ވަކާލާތުކުރަމުން އަންނަ "ސޭވް އަރަބިއްޔާ" ޕޭޖުގައިވާ ގޮތުން ޝުޖާއު، ޕްރިންސިޕަލުގެ މަގާމުން ވަކިކުރީ ބެލެނިވެރިން ފަށާފައިވާ "ސޭވް އަރަބިއްޔާ" ކެމްޕެއިން ހުއްޓުވަން އޭނާ މަސައްކަތް ނުކުރައްވާތީ އާއި އެ މައްސަލާގައި ބެލެނިވެރިންނާ އެކު އޭނާ ހުންނެވުމުގެ ސަބަބުންނެވެ.
އެކަމަކު އެޑިއުކޭޝަން މިނިސްޓްރީން އެކަން ދޮގުކުރެ އެވެ. މިނިސްޓްރީން ބުނާ ގޮތުގައި ސިވިލް ސާވިސް ގަވާއިދާ އެއްގޮތަށް ޝުޖާއު ބަދަލުކުރީ ސްކޫލު ހިންގުމަށް ގެންނަ އިދާރީ ބަދަލަކާ ހުރެ އެެވެ.
ކުއްލި ގޮތަކަށް ސްކޫލުގެ ޕްރިންސިޕަލް މަގާމުން ވަކިކުރި މައްސަލާގައި އަރަބިއްޔާގެ ބެލެނިވެރިން ދަނީ މިހާރު އެ ސްކޫލު ކައިރީގައި މުޒާހަރާ ވެސް ކުރަމުންނެެވެ.
ޗާންދަނީ މަގުގައި އަރަބިއްޔާ ސްކޫލު ހިންގި އިމާރާތް ބަދަލުކުރީ އެ އިމާރާތުގެ ތަނބުތަކުގައި ރެނދުލައި ވަރަށް ބޮޑަށް ހަލާކުވުމުންނެެވެ. އެހެންވެ، މިދިޔަ އަހަރުގެ ތެރޭގައި ވަގުތީ ގޮތުން އެ ސްކޫލު ބަދަލުކުރީ ކާނިވާ ސަރަހައްދު ކައިރީގައި ކުރިން ފޮރިން މިނިސްޓްރީ ހިންގި އިމާރާތަށެވެ.
އަރަބިއްޔާ ސްކޫލުގެ ބެލެނިވެރިން ކަންބޮޑުވުން ފާޅުކުރަމުންދަނީ ވަގުތީ އިމާރާތާ އެކު ސްކޫލަށް ކުރިމަތިވެފައިވާ ދަތިތަކަށް ހައްލު ހޯދުމަށް ސަރުކާރުން މަސައްކަތް ނުކޮށްދޭތީ އެވެ. އޭގެ ތެރޭގައި މިހާރު ސްކޫލު ހިންގަމުންދާ ތަނުގައި އިތުރު ހަރަކާތްތައް ކުރިއަށް ގެންދާނެ ޖާގަ ނެތް މައްސަަލަ ހިމެނެ އެވެ.
އަރަބިއްޔާ ކުދިންނަށް ދާއިމީ ސްކޫލެއް އިމާރާތް ކުރާނެ ތަނެއްގެ ގޮތުގައި ބާ ޖަމާލުއްދީންގެ ބިން ހަމަޖެއްސުމަށް ނިންމައި އެކަން އިއުލާންކުރުމަށް ފަހު، ފަހުން ސަރުކާރުން ވަނީ އެ ބިމުގައި ޖަމާލުއްދީން ސްކޫލުގެ ބައެއް ވެސް ހަދާނެ ކަމަށް ބުނެފަ އެވެ. އޭގެ ސަބަބުން އަރަބިއްޔާއަށް ލިބޭ ޖާގަ ކުޑަވާތީ ބެލެނިވެރިން ކަންބޮޑުވެ އެވެ.