އެމްޑީޕީގެ ޕްރައިމަރީ: ދެ ރައީސުންގެ ހަގީގީ ފައިޓް!

އެމްޑީޕީގެ 60،000 މެމްބަރުންނަށް ސާފު ޖަވާބެއް ލިބުނީ އެވެ؛ ޕާޓީގެ ރިޔާސީ ޕްރައިމަރީގައި، ރައީސް އިބްރާހިމް މުހައްމަދު ސޯލިހާ ދެކޮޅަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވާދަކުރައްވާނެ އެވެ. ރަސްމީކޮށް އެކަން އަދި އިއުލާނެއް ނުކުރައްވަ އެވެ. އެކަމަކު ގާތް ބޭފުޅުންނާ އެކު ޕްރައިމަރީގެ ބައްދަލުވުންތައް ނަޝީދު ފައްޓަވައިފި އެވެ.

ނަޝީދު މި ދޭތެެރެއިން ޕްރައިމަރީގައި ވާދަކުރެއްވުމާ ދުރަށް ވާހަކަފުޅު ގެންދެވީ ސެޕްޓެމްބަރު މަހު ބޭއްވި އެމްޑީޕީގެ ކޮންގްރެސްއަށް ފަހު އެވެ. ބަރުލާމާނީ ނިޒާމު ގެންނެވުމަށް އެމަނިކުފާނު ކުރެއްވި މަސައްކަތަށް ޕާޓީގެ އެންމެ އިސް ގުނަން، ކޮންގްރެސްގެ ތާއީދު ނުލިބުނީ އެވެ. މި ނާކާމިޔާބީއާ އެކު އެމަނިކުފާނު ފަހަތަށް ޖެހިވަޑައިގަންނަވާނެ ކަމަށް ބެލެވުނީ އޭގެ ފަހުން ޕްރައިމަރީގެ ވާހަކަ ނުދެއްކެވުމުންނެވެ. ސަޕޯޓަރުން ސުވާލުކުރުމުން ވެސް ޕްރައިމަރީގައި ވާދަކުރައްވާނެ ކަމަށް ސާފު ޖަވާބެއް ނުދެއްވި އެވެ.

އެމްޑީޕީގެ ބައެއް ބޭފުޅުން ވިދާޅުވި ގޮތުގައި، ޕާޓީ ތެރޭގައި ހޫނުވެފައި އޮތް ކޯޅުމުގެ ތެރެއިން މިއީ، ދެ ރައީސުންގެ އަސްލު ފައިޓެވެ.

"މި ކޯޅުމެއް ޕްރައިމަރީއަށް ފަހު ވެސް ނުނިމޭނެ، ހަގީގީ ފައިޓާ ހަމައަށް މި އާދެވުނީ،" އެއް މެމްބަރަކު ވިދާޅުވި އެވެ.

މި ހިތްހަމަނުޖެހުމުގެ ފެށުމަކީ ބަރުލަމާނީ ނިޒާމެވެ. ދައުރުގެ މެދުތެރެއިން ބޮޑުވަޒީރަކަށް ވެވަޑައިގަތުމަށް ނަޝީދު ބޭނުންފުޅުވެ އެކަމަށް ރައީސް އިބްރާހިމް މުހައްމަދު ސޯލިހްގެ އަރިހުން އެދިވަޑައިގަތެވެ. އެކަމަކު، އެމަނިކުފާނުގެ ވިސްނުންފުޅާ އެއްގޮތަށް ވެރިކަން ހިންގުމުގެ ނިޒާމު ބަދަލުކުރަން ރައީސް އިބްރާހިމް މުހައްމަދު ސޯލިހް ޖާގަ ނުދެއްވީ އެވެ.

އެކަން ކުރެއްވެން އޮތީ، ގާނޫނުއަސާސީ އިސްލާހުކޮށް، ރައްޔިތުންގެ ވޯޓަކުންނެވެ. އެ މަގަށް، މަސައްކަތްކުރަން އެމްޑީޕީގެ މެމްބަރުން ހިމެނޭ ގޮތަށް ސަރުކާރު ކޯލިޝަންގެ ޕާޓީތަކުން ވެސް ދެކޮޅު ހެދީ އެވެ.

އެންމެ ވާދަވެރި ޕްރައިމަރީ

ދެ ރައީސުން ވާދަކޮށް، އެމްޑީޕީން 2023 އަށް ރިޔާސީ ކެންޑިޑޭޓަކު ހޮވާ ޕްރައިމަރީއަކީ އެ ޕާޓީގެ ހަޔާތުގައި މިހާތަނަށް އަންނާނެ ސިޔާސީ އެންމެ ވަރުގަދަ ހަރަކާތެވެ. ގާތް އެކުވެރިންގެ ގޮތުގައި ތިއްބެވި ދެ ރައީސުން މިހާރު ފެންނަނީ ސިޔާސީ "ހަތުރުން"ގެ ގޮތުގަ އެވެ. އެއް މޭޒެއްގައި ވާހަކަ ނުދެއްކޭހާ ގުޅުން ގޯހެވެ. އެމްޑީޕީގެ ސާފު އަޣުލަބިއްޔަތު އޮވެމެ، މަޖިލީހުގައި ވެސް ކުރިއަށް ގެންދިޔައީ ދެ ފެކްޝަނުގެ އަރައިރުމެވެ.

ވަކި ތާރީޚެއް ކަނޑަނޭޅިއަސް އަންނަ އަހަރުގެ ކުރީކޮޅު ބާއްވާނެ ކަމަށް ބެލެވޭ ޕްރައިމަރީއަކީ މިހާތަނަށް ރައީސަކަށް ހުންނެވި ބޭފުޅަކާ ޕާޓީ ތެރެއިން ވާދަކުރައްވާ ފުރަތަމަ ފަހަރެވެ. ރައީސް އިބްރާހިމް މުހައްމަދު ސޯލިހަކީ ރައީސްކަމުގައި ހުންނަވައި ދެ ވަނަ ދައުރަކަށް އެމްޑީޕީގެ ރިޔާސީ ޓިކެޓަށް ވާދަކުރައްވާ ފުރަތަމަ ރައީސެވެ.

އެމްޑީޕީން 2018 އިން ފެށިގެން މިހާތަނަށް ބޭއްވި ހުރިހާ ޕްރައިމަރީތަކުގައި ވެސް ނަޝީދު ވާދަކުރައްވަ އެވެ.

އެންމެ ފުރަތަމަ ވާދަކުރެއްވީ 2007 ގައި ބޭއްވި ޕްރައިމަރީގައި އޭރު ޕާޓީގެ ރައީސް ޑރ. މުހައްމަދު މުނައްވަރާއި ޕާޓީގެ ކުރީގެ ޗެއާޕާސަން ރީކޯ މޫސާ މަނިކާ އެވެ. އޭގެ ފަހުން 2013 އާއި 2018 ގެ ޕްރައިމަރީގައި ވާދަކުރެއްވީ ނަޝީދު އެކަންޏެވެ.

ޕްރައިމަރީއާ ގުޅޭ ބައެއް ހަގީގަތްތައް

- އެމްޑީޕީގައި 2007 އިން ފެށިގެން ބޭއްވި ހުރިހާ ޕްރައިމަރީއެއްގައި ނަޝީދު ވާދަކުރެއްވި.

- 2018 ވަނަ އަހަރުގެ ރިޔާސީ ޕްރައިމަރީއަށް ފަހު, އަދި ރާއްޖޭގެ ސިޔާސީ ޕާޓީއެއްގައި ފުރަތަމަ ފަހަރަށް ރައީސްކަން ކޮށްފައިވާ އަދި މިހާރު ރައީސްކަމުގައި ހުންނެވި ފަރާތަކާ ވާދަކުރާ ރިޔާސީ ޕްރައިމަރީއެއް.

- އެމްޑީޕީގެ ތެރޭގައި ދެ ރައީސުންގެ ކޯޅުމާއި ހިޔާލު ތަފާތުވުންތަކުގެ އިތުރަށް މުޅި ސިޔާސީ ޕާޓީގެ ނިޒާމަށް ވެސް އަލަށް ތަޖުރިބާކޮށްލަން ފެންނާނެ މަންޒަރެއް.

- އެމްޑީޕީގެ އެތެރޭގެ އެހެން ޕްރައިމަރީތަކަށް ފަހު ބަލިވާ ކެންޑިޑޭޓް މޮޅުވާ ކެންޑިޑޭޓުގެ ފަހަތަށް ނާރާ މައްސަލަ ބޮޑު.

- ދެ ފެކްޝަނުގެ ކެމްޕޭނަށް ފަހު މޮޅުވާ ރައީސެއްގެ ފަހަތުގައި ބަލި ގަބޫލުކޮށް މަސައްކަތް ކުރައްވާނެތޯ އުފެދޭ ސުވާލަށް ޖަވާބު ލިބޭނެ.

- ދެ ފެކްޝަނުގެ އާއްމު މެމްބަރުން ނަތީޖާ ބަލައިގަނެ ބަދަހިކަމާ އެކު ކެމްޕޭންގައި އުޅޭނެތޯ ތަޖުރިބާކޮށްލަން ލިބޭ ފުރުސަތެއް.

ވާދަވެރި ކެމްޕޭނަކަށް ވާނެ!

ރައީސް އިބްރާހިމް މުހައްމަދު ސޯލިހާއި ނަޝީދުގެ ސިދާ ކުރިމަތިލެއްވުމެއް މިހާތަނަށް ނުފެނުނަސް ޕާޓީގެ އެތެރޭގެ އިންތިހާބުތަކަކީ ދެ ރައީސުންގެ ވާދަވެރި އިންތިހާބުތަކެވެ. އެމްޑީޕީގެ ޕާލަމެންޓްރީ ގްރޫޕްގެ މަގާމްތަކާއި ޕާޓީގެ އިސް މަގާމްތަކުގެ އިތުރުން ދާއިރާ ރައީސުންނާއި ގޮފިތަކަށް ވެސް ދެ ރައީސުންގެ ކެންޑިޑޭޓުން ވާދަކުރި އެވެ.

މި އިންތިހާބުތަކުގެ ނަތީޖާ ބުރަވެފައި އޮތީ، ރައީސް އިބްރާހިމް މުހައްމަދު ސޯލިހްގެ ފަޅިއަށެވެ. މަޖިލީހުގެ އެމްޑީޕީގެ މެމްބަރުންނާއި ދާއިރާތަކުގެ ރައީސުންގެ އަޣުލަބިއްޔަތު އޮތީ ވެސް އެމަނިކުފާނަށެވެ.

އެކަމަކު މި ހުރިހާ އިންތިހާބުތަކާ ޕްރައިމަރީ ތަފާތުވާނެ ސަބަބެއް އެމްޑީޕީގެ އިސް ބޭފުޅުން ދައްކަަވަ އެވެ.

"ކުރިން ރައީސް ސޯލިހްއާ ދެކޮޅަށް ނެރުއްވީ ކެންޑިޑޭޓުން. މިފަހަރު ސީދާ ރައީސް ނަޝީދު އެ ނުކުންނަވަނީ. މިއީ ޕްރައިމަރީ ތަފާތުވާނެ ސަބަބެއް،" އޭނާ ވިދާޅުވި އެވެ.

އޭނާ ދެން އިޝާރާތް ކުރެއްވީ ނަޝީދު ކެމްޕޭން އުކުޅުތަކަށެވެ. ހޮޅިއަށިތަކާއި ޖަގަހަތަކާއި ގޭގެއިން ނަޝީދު ތާއީދު ހޯއްދަވާ ގޮތެވެ. ފާޅުގައި އެމަނިކުފާނު ނުކުމެވަޑައިގެން ކެމްޕޭން ކުރެއްވި ނަމަ ޗެއާޕާސަން އިންތިހާބުގެ ނަތީޖާގެ ފަރަގު ކުޑަކުރެވޭނެ ކަމަށް އޭނާ ދެކެވަޑައިގަންނަވަ އެވެ.

އެމްޑީޕީގެ ޗެއާޕާސަންގެ އިންތިހާބުގައި ރައީސްގެ ކެންޑިޑޭޓް، އިކޮނޮމިކް މިނިސްޓަރު ފައްޔާޒް އިސްމާއިލްއާ ވާދަކުރައްވަން ނަޝީދު ނެރުއްވީ މާފަންނު އުތުރުދާއިރާގެ މެމްބަރު އިމްތިޔާޒް ފަހުމީ (އިންތި) އެވެ.

މި އިންތިހާބުގައި 48،000 މީހުން ވޯޓުލި އިރު ފައްޔާޒް ކާމިޔާބު ކުރެއްވީ 27،000 ވޯޓުންނެވެ.

"މި ނަތީޖާ އިން ފެންނަނީ ޕްރައިމަރީ ވާދަވެރިކޮށްދާނެ ކަމަށް. މި ހިސާބުތަކަށް ބަލަން ޖެހޭ ޕްރައިމަރީގައި،" އޭނާ ވިދާޅުވި އެވެ.

މި ޕްރައިމަރީ ކޮންމެ ބޭފުޅަކު ކާމިޔާބުކުރެއްވިޔަސް އެމްޑީޕީގެ އެތެރޭގެ ކޯޅުން ނިމޭނެ ކަމަށް އެ ޕާޓީގެ ބައެއް ބޭފުޅުން ގަބޫލެއް ނުކުރައްވަ އެވެ. ގޯސްވި ކަންކަން އިތުރަށް ރަނގަޅު ނުކުރެވޭނެ ކަމަށް ދެކެވަޑައިގަންނަވަ އެވެ.

"ވަކި އިތުރު ކަމެއް ނުވާނެ، މިހާރު ހިނގާ ހުރިހާ ކަމެއް ކުރިއަށްދާނެ، އެއްބައިވެވޭވަރަށް ވުރެން މާ ދުރުވެއްޖެ،" ދެ ފެކްޝަނުގެ ކޯޅުމަށް އޭނާ އިޝާރާތްކުރެއްވި އެވެ.