ކޮވިޑް-19ގެ ބަލިމަޑުކަން ޗައިނާގެ ބައެއް ސަރަހައްދުތަކުގައި ހަލުވިމިނުގައި ފެތުރެމުން ދިޔަ ނަމަވެސް، ތިން އަހަރަށް ފަހު އެ ގައުމުގެ ބޯޑަރުތައް، ބައިނަލްއަގުވާމީ ދަތުރުތަކަށް މިއަދުން ފެށިގެން އާންމުކޮށް ހުޅުވާލައިފި އެވެ.
ބޯޑަރުތައް ހުޅުވައިލުމާ ގުޅިގެން، ބޭރުން އަންނަ މީހުން ކަރަންޓީނުވުމަކާ ނުލައި މިހާރު ޗައިނާގެ ކޮންމެ ސަރަހައްދަކަށް ވެސް އެތެރެ ވެވޭނެ އެވެ. ރޭ ދަންވަރު 12:00 އިން ފެށިގެން ބޯޑަރުތައް ހުޅުވައިލުމުން، ކަރަންޓީވުމާ ނުލައި އެ ގައުމަށް އެތެރެވި ފުރަތަމަ ދަތުރުވެރިން ޗައިނާ އަށް އައީ ދެކުނުގެ ދެ ސަހަރެއް ކަމަށްވާ ގުއަންގްޒޫ އާއި ޝެންޒެން އަށެވެ.
ސިންގަޕޫރުންނާއި ކެނެޑާގެ ޓޮރޮންޓޯ އިން ޗައިނާ އަށް ރޭ ދަންވަރު އައި ދެ ފްލައިޓުން ދަތުރުކުރި ހުރިހާ ދަތުރުވެރިން ވެސް ޗައިނާ އަށް އެތެރެވީ، ކޮވިޑަށް ޓެސްޓު ކުރަން ނުޖެހި އަދި ކަރަންޓީނުވުމެއް ނެތި އެވެ. ކޮވިޑުން ރައްކާތެރިވުމުގެ ގޮތުން އަޅާފައިވާ ފިޔަވަޅުތަކުގެ ތެރެއިން މިހާތަނަށް އުވާނުލައި އޮތް ފިޔަވަޅަކީ، ޗައިނާ އަށް އެތެރެވުމުގައި ކަރަންޓީންވާންޖެހޭ ގޮތަށް އޮތް އޮތުމެވެ.
ރޭ ދަންވަރުން ފެށިގެން، އެ ފިޔަވަޅުވެސް އުވައިލުމާ ގުޅިގެން، ބޭރު ގައުމުތަކުން ޗައިނާ އަށް ދަތުރުކުރާ ދަތުރުވެރިންނަށް ވަރަށް ބޮޑު ލުޔެއް ލިބި ވައިގެ މަގުން ކުރާ ދަތުރުތަކަށް ވަނީ ބާރުބޮޑުވެފަ އެވެ.
ކޮވިޑުން ރައްކާތެރިވުމުގެ ގޮތުން އަޅާފައިވާ ފިޔަވަޅުތައް، ޗައިނާ ސަރުކާރުން ދޫކޮށްލަން ފެށީ، އެ ފިޔަވަޅުތަކުގެ ސަބަބުން އަތްމަތި ދަތިވެ ދިރިއުޅުން ދަތިވެފައިވާ ކަމަށް ބުނެ އާންމުން މަގުތަކަށް ނުކުމެ މުޒާހަރާ ކުރަން ފެށުމުންނެވެ. ފިޔަވަޅުތައް ދޫކޮށްލުމާ ގުޅިގެން، ޗައިނާގެ އެކި ސަހަރުތަކުގައި ކޮވިޑް ފެތުރޭ މިންވަރު ވަރަށް ބޮޑަށް އިތުރުވެފަ އެވެ.
ކޮވިޑުން ރައްކާތެރިވުމުގެ ގޮތުން އެޅި ފިޔަވަޅުތަކުގެ ތެރެއިން، އެ ގައުމަށް އެތެރެވާ މީހުން، ޗައިނާ ސަރުކާރުން ކަނޑައަޅާ ވަކި ތަނެއްގައި ކަރަންޓީނުވާންޖެހޭ ގޮތަށް ހަމަޖެއްސީ މާޗް 2020ގަ އެވެ. އެ އުސޫލުގެ ދަށުން، އެ ތާރީޚުގެ ފަހުން ޗައިނާއަށް އެތެރެވާ ކޮންމެ މީހަކު ތިން ހަފުތާގެ މުއްދަތަށް ކަރަންޓީނުގައި ހުރުމަށް ފަހުގައި ނޫނީ، ޗައިނާ އަށް އެތެރެ ނުވެވެ އެވެ.
ނަމަވެސް ކޮވިޑުން ރައްކާތެރިވުމަށް އެޅި ފިޔަވަޅުތަކަށް ދޭން ފެށި ލުއިތަކުގެ ތެރެއިން، ކަރަންޓީނުގައި ހުންނަން ޖެހޭ މުއްދަތު، ދާދި ފަހަކުން ވަނީ ފަސް ދުވަހަށް މަދުކޮށްފަ އެވެ. ޗައިނާގެ ނޭޝަނަލް ހެލްތު ކޮމިޝަނުން މިދިޔަ ޑިސެމްބަރު މަހުގެ 26 ވަނަ ދުވަހު އާންމުކުރި އިއުލާނެއްގައި ބުނެފައިވާ ގޮތުން، ޖެނުއަރީ 8 ވަނަ ދުވަހުން ފެށިގެން، ޗައިނާ އިން ބަލަމުން އަންނާނީ ކޮވިޑަކީ "ބީ" ދަރަޖައިގެ ބައްޔެއްގެ ގޮތުގަ އެވެ.
