އަމްރު: ސަރުކާރާ ދެކޮޅަށް ނުކުންނެވީ ކަންކަން އިސްލާހުކުރަން ކުރެއްވި މަސައްކަތަށް ކުރިއެރުމެއް ނުލިބުމުން ކަމަށް ވިދާޅުވި. -- ފޮޓޯ: ފަޔާޒު މޫސާ | މިހާރު
12 އެޕްރީލް 2023 - 10:52
37 comments
ސަރުކާރުގެ ބޮޑެތި ގޯސްތައް ދައްކަވައި، އޭނާ އެހެން ގޮތެއް އިހްތިޔާރުކުރަން ޖެހުނީ އިސްލާހުގެ މަގަށް ކަންކަން ގެންނަން ކުރެއްވި މަސައްކަތަށް އެއްބާރުލުމެއް ނުލިބުމުން ކަމަށް އެސްޓީއޯގެ ކުރީގެ އެމްޑީ ހުސެއިން އަމްރު ވިދާޅުވެއްޖެ އެވެ.
ސަރުކާރު ހިއްސާވާ ކުންފުނީގެ އިސް މަގާމެއްގައި ހުންނަވައި، ސަރުކާރާ ދެކޮޅަށް ނުކުންނެވި ސަބަބު ފުރަތަަމަ ފަހަރަށް ވިދާޅުވެ ނެރުއްވި ނޫސްބަޔާނުގައި ސިޔާސަތުތަަކަށް ވަރަށް ބޮޑަށް ފާޑުވިދާޅުވެފައިވެ އެވެ.
ރިޔާސީ ޕްރައިމަރީ ނާކާމިޔާބުވެވަޑައިގަތުމާ އެކު ޕާޓީގެ ރައީސް މުހައްމަދު ނަޝީދު އުފައްދަވައިގެން އުޅުއްވާ ފިކުރެއްގެ ދިރުމުގައި ހުންނެވި އަމްރު ވިދާޅުވީ އެމްޑީޕީއަށް ރައްޔިތުންގެ އިތުބާރެއް މިހާރު ނެތް ކަމަށެވެ. މިއީ ކުރިއަށް އޮތް ރިޔާސީ އިންތިހާބު އެމްޑީޕީއަށް ގެއްލޭނެ ފުރުސަތު ބޮޑު ކަމެއް ކަމަށް ވިދާޅުވި އެވެ.
އަމްރު ގެންދަވަނީ ކުރިއަށް އޮތް ރިޔާސީ އިންތިހާބަށް ޖުމްހޫރީ ޕާޓީއާ އެކު މަސައްކަތް ކުރައްވަމުންނެވެ. އޭނާ މަގާމުން ވަކިކުރެއްވީ، ޖޭޕީއާ އެކު ފިކުރެއްގެ ދިރުމުން މެނިފެސްޓޯއެއް ހެދުމާ ހަމައަށް ވާހަކަތައް ދެކެވުނު ފަހުންނެވެ.
އެމްޑީޕީގެ ރިޔާސީ ޕްރައިމަރީގެ ކެމްޕޭންގައި އަމްރު، ނަޝީދާ އެކު.
"އެމްޑީޕީއަށް ވަފާތެރި އެތައް ބައެއް ޕާޓީއާ މިއަދު ފެއަށް ޖެހިފައި ވަނީ ޕާޓީގެ ސިޔާސަތުތައް އޮޅިގެންނެއް ނޫނެވެ. ނުވަތަ ގަބޫލުނުކުރާތީއެއް ނޫނެވެ. އަޅުގަނޑު ވެސް ނުހަނު އިހްލާސްތެރިކަމާ އެކު ހެޔޮ ނިޔަތުގައި މަސައްކަތްކުރީ އެ ސިޔާސަތުތައް ކުރިއަރުވައި ތަންފީޒުކުރާށެވެ،" އަމްރުގެ ދިގު ބަޔާނުގައި ވިދާޅުވި އެވެ.
"އެހެން ގޮތެއް ހިޔާރުކުރަން ޖެހުނީ ގިނަ ފަހަރެއްގެ މަތިން އިސްލާހުގެ މަގަށް ކަންކަން ގެންނަން ކުރި މަސައްކަތަށް އިޖާބައެއް ތަރުހީބެއް އެއްބާރުލުމެއް ނުލިބުމުންނެވެ."
"އެމްޑީޕީގެ ސިޔާސަތުތައް ދޫކޮށްލުމުން އަމާޒެއް ނެތް"
އެމްޑީޕީގެ ސިޔާސަތު ކޮމިޓީގެ މުގައްރިރުކަން ކުރެއްވި އަމްރު ވިދާޅުވީ ރައީސް އިބްރާހިމް މުހައްމަދު ސޯލިހްއާ 2018 ގައި ހަވާލުކުރީ އެމްޑީޕީގެ ސިޔާސަތުތަކަށް އެކަށައަޅާފައި އޮތް މެނިފެސްޓޯ ކަަމަށެވެ. ފަހުން ޕާޓީތައް އިއްތިހާދުވެ، ޖޮއިންޓް މެނިފެސްޓޯ އެކުލަވާލި އިރު ވެސް ބެލީ އެމްޑީޕީގެ މެނިފެސްޓޯގެ ސިޔާސަތުތައް ދަމަހައްޓައި ޖަޒީރާ މެނިފެސްޓޯގެ އަސާސްތައް ނުގެއްލޭނެ ގޮތަށް ޕާޓީތަކުން އެއްބަސްވާ މެނިފެސްޓޯއެއް ނެރެން ކަމަށެވެ.
އެގޮތަށް އެއްބަސްވެވި އުފެދުނު ކެބިނެޓާ ސަރުކާރުގެ ފުރަތަމަ 100 ދުވަހުގެ ހިންގާނެ ސިޔާސަތުތަކާއި ފުރަތަމަ އަހަރު ހިންގާނެ ސިޔާސަތުތައް ވެސް ތަފްސީލްކޮށް ހަވާލުކުރިކަން އަމްރު ފާހަގަކުރެއްވި އެވެ.
އަމްރު ވިދާޅުވި ގޮތުގައި އެސްޓީއޯގެ އެމްޑީގެ މަގާމާ އޭނާ ހަވާލުވެވަޑައިގަތީ މަސްވެރިކަމާއި ދަނޑުވެރިކަން ކުރިއަރުވައި ރާއްޖެ އެތެރެކުރާ މުދަލުގެ އަގު ހެޔޮކުރުމަށާއި ކުދި ވިޔަފާރިތަކަށް ޖާގަދީ ޓެކްނޮލޮޖީގެ ރޮނގުން ރާއްޖެ ކުރިއެރުވުމަށާއި ކާނާގެ ޔަގީންކަން ހޯދުމަށާއި ސިއްހީ ދާއިރާ ކުރިއެރުވުމަށް ކަމަށާއި އެ ކަންކަން ކުރެއްވި ކަމަށް ވިދާޅުވި އެވެ.
އޭނާ ބޭނުންވީ، އަމްރު ވިދާޅުވި ގޮތުގައި، ރާއްޖޭގެ އިގްތިސާދު ވަރަށް ހަލުވި ދުވެއްޔެއްގައި ކުރިއަރައި ރައްޔިތުންނަށް ތަނަވަސް ދިރިއުޅުމެއް 5 އަހަރުގެ ތެރޭގައި ފެނުމަށެވެ.
"ނަމަވެސް ސަރުކާރުން އެމްޑީޕީގެ ސިޔާސަތުތައް ދޫކޮށްލައި ވަކި ސިޔާސަތެއް އަމާޒެއް ނެތި ކަންކަން ކުރަމުން ގެންދިއުމުގެ ސަބަބުން މާލީ އިގްތިސާދީ އަދި އިޖުތިމާއީ މައްސަލަތައް ވަނީ މި 4 އަހަރު ކުރިމަތިވެފަ އެވެ،" އަމްރު ވިދާޅުވި އެވެ.
އޭގެތެރޭގައި ޓެކްސްއަށް ގެނައި ބަދަލާ އެކު ތަކެތީގެ އަގު ބޮޑުކުރުމާއި ކުރިން އެންގުމަކާ ނުލައި ޓޫރިސްޓުންގެ އަތުން ނަގާ ޓެކްސް ބޮޑުކުރުމުން އެ ވިޔަފާރިތަކަށް ފޫނުބެއްދޭ ވަރުގެ ގެއްލުމެއް ވި ކަމަށް އަމްރު ވިދާޅުވި އެވެ.
އަމްރު، ރިޔާސީ އިންތިހާބުގައި ތާއީދުކުރައްވާ ޖުމްހޫރީ ޕާޓީގެ ލީޑަރު ގާސިމް އިބްރާހިމްއާ އެކު.
އަމްރު ވިދާޅުވީ ސަރުކާރުގެ ހަރަދާއި އިސްރާފު ބޮޑު ކަމަށާއި ޕްރޮޖެކްޓްތައް ހިނގާ ނުހިނގާ ގޮތް ނުބަލާތީ މަޝްރޫއުތައް ލަސްވެ މަސައްކަތާ ނުބައްދަލު ބޮޑެތި ހަރަދުތައް ކުރަން ޖެހުނު ކަމަށެވެ. މިދިޔަ ހަތަރު އަހަރުގެ ތެރޭގައި ކޮންމެހެން ކުރަން ޖެހޭ އެތައް ކަމެއް ދޫކޮށްލައި ބޮޑު އަގުގައި ދަރަންޏަށް ފައިސާ ނެގި ކަމަށް އަމްރުގެ ބަޔާނުގައި ވެ އެވެ.
"ބަޖެޓުގެ ފައިސާ ދީގެން ހިންގާ ސަރުކާރުގެ ކުންފުނިތައް ނުބެލެހެއްޓުމުގެ ސަބަބުން މިއަދު އެ ކުންފުނިތައް ވަނީ އާއްމު އެތައް ވިޔަފާރިތަކަކަށް ދަރާ ބަނގުރޫޓް ވުމުގެ މަގުމަތީގަ އެވެ،" އަމްރު ވިދާޅުވި އެވެ.
އޭނާ ވިދާޅުވި ގޮތުގައި ނުރަނގަޅު ކަންތައްތައް ރަނގަޅުކުރަން މަސައްކަތް ކުރެއްވި އެވެ. ބައްދަލުވުންތަކުގައި ފާހަގަކޮށް، މެސެޖުންނާއި ސިޓީން ވެސް ލަފާ އެރުވި ކަމަށެވެ. އެކަމަކު ސަރުކާރު ހިންގުމުގެ ވައްޓަފާޅިއަށް ބަދަލެއް ނައި ކަމަށް އަމްރު ވިދާޅުވި އެވެ.
މީގެ ނަތީޖާ އަކީ ކޯލިޝަނަކާ ނުލައި އިންތިހާބު ކާމިޔާބު ނުވާނެ ކަމަށް ގަބޫލުކުރުމާ އެކު ބައި އިލެކްޝަންތަކުގައި މުޅި ސަރުކާރުގެ ބަޖެޓް ހުސްވާ ވަރަށް ކުއްލިއަކަށް އެ ދާއިރާތަކަށް ޕްރޮޖެކްޓް ހިންގުން ކަމަށް އަމްރު ވިދާޅުވި އެވެ.
އޭނާ ވިދާޅުވީ އެ ރަށެއްގެ އެންމެންނަށް ސަރުކާރު ކުންފުނިން ވަޒީފާ ދޭން ޖެހުމަކީ ސަރުކާރަށް ރައްޔިތުން ތާއީދުނުކުރާ ކަމުގެ ހެއްކެއް ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ރަސްދޫ ސައީދު
13 April 2023
ސަރުކާރު އިސްލާހު ނުވިއްޔާ އަމިއްލަޔަށް އިސްލާހްވެބަލަ. ފަކުރެއްގެ ނިމުންތީ އިސްލާހިއްޔާ އެއްނޫން. ނަޝީދުގެ ފިކުރު ރައްޔިތުން ބަލައިނުގަންނަކަން އިހުސާސްވެގެން ޖައްސާ ގޭމެއް. ދެން ރައްޔިތުން ނަޝީދުގެ މަޅިއެއްގަ ނުޖެހޭނެ. ނަޝީދު ތާރަފްކުރި ޑިމޮކްރަސީއަކުން ގައުމަށް އައި އެއްވެސް ހެޔޮ ބަދަލެއް ފެންނާކަށްނެތް. ބަރުދަމާނީއޭ ކިޔައިގެން ރައްޔިތުން ބޯކާން ނޫޅޭ. ރިޔާސީ ނިޒާމް ނުހިންގިގެން އުޅޭއިރު ބަރުދަމަން ނަހަދާ. އެ ނިޒާމް އަދި މާ ބަރުވާނެ.
ގޭދޮށު ލޮޖިކް އެންޑް ކަންމަތީ އިކޮނޮމީ
12 April 2023
ސަރުކާރުގެ ހިންގުމުގައި ހުރި ކުށް މިހާރު ކިއިދާނެ. އެކަމަކު ފައިލް އަތުލަންދެން އޮތީ ކަމުގޮސްފައި. ދެން ކަމުނުގޮސްގެން ހަމަޔަށް އަޅުވަން ފެނުނު ގާބިލު މީހާ ރީއްޗެއްނު؟ 2008 ގައި ރައްޔިތުންނަށް ލިބުނު ރަނުގެ ފުރުސޮތު! ދުސްތޫރު އަސާސަކަށްވެ ގާނޫނީ އޯޑަރއިން ހިނގާ ދައުލަތެއްގެ ފުރުސޮތު ރައްޔިތުންގެ އަތުން ނަގާލި މީހާ؟ ގޮތްކުޑަވެ، ގަދަބާރުން އަޑުގަދަކޮށްގެން ޗާޓުން ބޭރުން ޕާޓީ މާފިޔާ ހަދާގެން ވެރިކަންކުރާ ވިހަ ސަގާފަތް ގެނައި ނާތަހުޒީބު ފެއިލިއަރ؟؟
ބޮޑުމީހާ
12 April 2023
އަމްރު ދެއްކިޔަސް ބޮޑު މަންޒަރަކީ މިހާރު މިހުރީ ބޮޑު ޖޯކެއްކަހަލަ ވެރިއެއް. ދާންވީ މިސްރާބަކީ، މެނިފެސްޓޯއަކީ، ޕްލޭނަކީ ކޮބައިކަން ޚުދު އޭނައަށްވެސް ނޭގި ހުއްޓާ ދައުރެއް ނިމި، 1400 ސިޔާސީ މަގާމު އުފެދި 100 ބިލިއަނުން ގައުމު ދަރައިފި.
ކުރުސީ ސައްތާރު
12 April 2023
އެކޮއެ ސަރުކާރު ކަޑަވެގެން އިސްތިޢުފާދީފަ ނިކުތީކީނޫންދޯ! އެމީހުންނަށް މުހިއްމު ނޫން ބޭކާރު ބޮލެއްވީމަ ބޭރުކުރީ... އެހެންނޫނަސް ތީކީ މާކަޤާބިލު ހިންގުމެއް ހުރިމީހެއްނޫން. ސިޔާސީ ޕާޓީތައް ވުޖޫދައްއައިފަހުން މިކަހަލަ ބޭކާރު ލަޓޯފަޓޯ ބައިގަނޑަށް އެކަށީގެންނުވާ ވަޒީފާތައްލިބެންފެށީ..
ބިސްކީމިޔާ
12 April 2023
އަމްރު އަކަސް ތެދެއް ބުނިއްޔާ އެނުވާނެ ފުށްބަސްތާ އަކަށް. އަމާޒު ލާހޫރޭ ވެފަ މިއޮތީ.
ޢަނީ
12 April 2023
މިވަގުތު ސަރުކާރާއި އިގްތިސާދު ހަމަ މަގަށް އަޅުވަން ޔާމީން ހަމައެކަނި މި ފެންނަނީ.މިހެން މި ބުނީ ކޯލިޝަންއަށް ވެރިކަން ދީގެން މިއީ އެއްނޫންތޯ ނަތީޖާއަކަށް މިވީ.ކޯލިޝަން އެންމެން ގައުމު ކޮޅާލާ ބަނގުރޫޓު ކޮއްލާފަ އެކަކު އަނެކަކު ވެރިކަމަށް އަރާނެ ގޮތެއްގެ ވާހަކަ އަދިވެސް މިދައްކަނީ!ކޮބައިތޯ ރައްޔިތުންނަށް ލިބުނު ކުރިއެރުން!
ޓިނުބެ
12 April 2023
ދެން އެހެންވިއާ މެލޭސިޔާއިންނާ އެތަން މިތަނުން ފުލެޓް ތިޔަގަތީ ކޮންތާކުން ލުއްސި އެއްޗިނުން
އެކަނބާ
12 April 2023
ސަރުކާރު ގޯސްހެދިހަދާ ވާހަކަ އަލަށް އަޑު މިއެހީ ... އަމްރު ... އާ ވާހަކައެއް ހިއްސާކުރައްވާނެ ކަމަށް އުއްމީދުކުރަން .. ނައިބު ރައީސްކަން ލީބޭ ވަރުގެ ވާހަކައެއް މިހާރު ވިކޭނީ .. ވަރަށް ސަލާމް
ފޮނިއަނގަ
12 April 2023
އަގުހެޔޮވި މުދަލެއް، އަދި ހާއްސަކޮށް ތިޔަބުނާ ދަނޑުވެރިކަމުގެ މުދަލެއް ދައްކަބަލަ ހަމަ އެކަތި ވިޔަސް. ތިޔަ ސިޔާސީ މީހުންނާއި އެމީހުންގެ ވަށައިގެން އެނބުރޭ މީހުންތައް ނޫނީ ތަނަވަސް ޖީބެއް ދައްކަބަލަ! އަނގަ އޮތީމާ ކިއިދާނެ ކޮންމެ އެއްޗެއްވެސް.
ސޯދުު
12 April 2023
އަމްރުގެ ވިސްނުން ރަގަޅު އެކަމް އެކަންކަން ޕްރެކްޓިކަލީ ފީސިބަލް އެއް ނުވާނެ ރާއްޖޭގައެއް. ބަލާ އެގްރި ވިޔަފާރި. ފައިދާވޭތަ. ދެން ދަނޑުވެރިންނަށް ކަމެއްކޮށްދެން ކުރުންރަގަޅު. އެކަމް އެއީ ދަޑުވެރިކަން ކުރިއެރުމެއް ނޫން. ގޮދަންފުށް ބަންދުކުރުން. ކީއްކުރާކަމެއް. ކަމަކަށް ވާކަމެއް ކޮށްބަލަ. މަސްހޫރު ކްލޯތިންލައިން އެއްގެ ފެކްރީއެއް އަޅާބަލަ އުތުރާ ދެކުނު ބޮޑު ރަށެއްގަ. ގައިމު ވަޒީފާ އުފެދޭނެ. ރިކަރަންޓަށް ލުއިވާނެ. މާލެއަށް ލުއިވާނެ.