ޕީޕީއެމްގެ ރައީސް މައުމޫން އަބްދުލް ގައްޔޫމް މިިދިޔަ ބުދަދުވަހު ބާއްވަން އުޅުނު ބައްދަލުވުން ފުލުހުން ހުއްޓުވި މައްސަލަ ނޭޝަނަލް އިންޓަގްރިޓީ ކޮމިޝަން (އެންއައިސީ) އަށް މިއަދު ހުށަހަޅައިފި އެވެ.
"ޕީޕީއެމްގެ ދިރުން، މެމްބަރުންގެ ހިޔާލު"ގެ ނަމުގައި މައުމޫން ބާއްވަން އުޅުއްވި ހަފުލާ ނުބޭއްވޭނެކަން ފުލުހުން އެންގީ މައުމޫން ފައުންޑޭޝަންގެ އޮފީސް ހިންގާ ހ. ފުލިދޫގެ އަށް ފުލުހުންގެ ޓީމެއް ގޮސްގެންނެވެ.
ހަފުލާ ބާއްވަން ހަމަޖެއްސީ ޕީޕީއެމްގެ އޮފީސް ކުރިން ހިންގި އަދި މިހާރު ޕީޕީއެމްގެ މަސައްކަތްތައް މައުމޫން އިސްވެ ހިންގާ ހ. ތެމާގަ އެވެ.
މަައުމޫންގެ ފެކްޝަނުން ޕީޕީއެމްގެ ނައިބު ރައީސްގެ މަގާމަށް އައްޔަން ކޮށްފައިވާ އާމިނަތު ނާދިރާ އެންއައިސީ އަށް ހުށަހެޅުއްވި މައްސަލާގައި ބުނީ، ބައްދަލުވުން ނުބޭއްވޭނެ ސަބަބެއް ފުލުހުން އަންގާފައިނ ނުވާ ކަމަށެވެ. އަދި ގާނޫނުއަސާސީ ބުނާގޮތުން ދައުލަތުގެ ހުއްދަ ކުރިން ހޯދުމަކާ ނުލައި ސުލްހަވެރިކަމާއެކު، އެއްވެ އުޅުމުގެ މިނިވަންކަން ކޮންމެ މީހަކަށް ލިބިގެންވާ ކަން ވެސް ނާދިރާގެ ސިޓީގައި ފާހަގަކުރެއްވި އެވެ. ނަމަވެސް މި ހަރަކާތަށް ފުލުހުން ހުރަސް އެޅުމުންް، ޕީޕީއެމްގެ އާއްމު މެމްބަރުން ޕާޓީގެ ރައީސާ ބައްދަލުކޮށް ހިޔާލު ހޯދުމުގެ ފުރުސަތު ގެއްލިއްޖެ ކަމަށް ނާދިރާ ވިދާޅުވި އެވެ.
މި މައްސަލަ ހުށަހަޅާފައި ވަނީ މައުމޫން ފައުންޑޭޝަންގެ އޮފީހަށް އެ ދުވަހު ވަން ދެ ފުލުހުންނާ ދެކޮޅަށެވެ.
ދެ ފުލުހަކު ފުލިދޫގެ އަށް ދިޔައިރު، މައުމޫން އޮފީހުގައި ނޫޅުއްވާތީ، ފުލުހުން އެކަން އެންގީ އޭރު އެ އޮފީހުގައި ހުންނެވި މައުމޫންގެ ދަރިކަލުން، ފާރިސް މައުމޫނަށެވެ. އަދި އެ މައުލޫމާތު މައުމޫނާ ހިއްސާ ކުރެއްވުމަށް ފާރިސްގެ ކިބައިން ފުލުހުން އެދުނު ކަމަށް ވެސް އޮފިޝަލަކު ވިދާޅުވެފައިވެ އެވެ.
މީގެ ކުރިން، ޕީޕީއެމްގެ އަހަރީ ދުވަސް ފާހަގަކުރަން މައުމޫން ބާއްވަން އުޅުއްވި ޖަލްސާ ވެސް ފުލުހުން ވަނީ ހުއްޓުވައިފަ އެވެ. ރައީސް އަބްދުﷲ ޔާމީނާއި މައުމޫނާ ދެމެދު އުފެދުނު ހިޔާލު ތަފާތުވުންތަކާ ގުޅިގެން ޕާޓީގެ ކައުންސިލް ނުބޭއްވި ވަނިކޮށް، ކޯޓުން ވަނީ ޕާޓީ ހިންގުން ރައީސް ޔާމީނާ ހަވާލުކޮށްފަ އެވެ. އެހެންވެ، ޕާޓީގެ ގައުމީ ޖަލްސާއެއް ބޭއްވެންދެން ޕާޓީ ހިންގާނީ ރައީސް ޔާމީނެވެ.