ޕީޕީއެމް އާއި ޕީއެންސީން އެހެން ސިޔާސީ ޕާޓީތަކާ އެކު ގުޅިގެން މަސައްކަތް ކުރަން ފަށާފައި ވަނީ ރިޔާސީ އިންތިހާބަށް ނޫން ކަމަށާއި ރާއްޖޭގެ މަސްލަހަތު އިސްކޮށް އިމުގެ މައްސަލާގައި ހައްލެއް ހޯދަން ކަމަށް އެ ޕާޓީތަކުން މިއަދު ބުނެފި އެވެ.
މި ވެރިކަން ފެށުނު ފަހުން ފުރަތަމަ ފަހަރަށް، ސިޔާސީ ހުރިހާ ޕާޓީތައް ގުޅިގެން ހެދި ކޯލިޝަނުން މިއަދު ވަނީ، އެކުގައި މަސައްކަތް ކުރަމުން އަންނަ ކަން ހާމަކުރަން ޕްރެސް ކޮންފަރެންސެއް ބާއްވައިފަ އެވެ.
ރައްޔިތުންގެ މަޖިލީހުގައި ބޭއްވި ޕްރެސް ކޮންފަރެންސްގައި ޕީޕީއެމް/ޕީއެންސީގެ މެންބަރުންގެ އިތުރުން ޖުމްހޫރީ ޕާޓީ އަދި ކެންދޫ ދާއިރާގެ މެންބަރު އަލީ ހުސެއިން އާއި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ފެކްޝަންގެ ފަރާތުން މެދު ހެންވޭރު ދާއިރާގެ މެންބަރު އަލީ އާޒިމް އާއި އެމްއެންޕީގެ ނައިބު ރައީސް އަދި ވިލިމާލެ ދާއިރާގެ މެންބަރު އަހުމަދު އުޝާމް ބައިވެރިވެވަޑައިގަތެވެ.
ރިޔާސީ ކެންޑިޑޭޓުން ނެރެން ނިންމާފައިވާ ޕާޓީތަކުގެ ގުޅުން ރިޔާސީ އިންތިހާބާ ހަމައަށް ވެސް ދެމިއޮންނާނެތޯ "މިހާރު"ން ސުވާލުކުރުމުން މައިނޯރިޓީ ލީޑަރު އަދި އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް ސަލީމް) ވިދާޅުވީ މިހާރު މި ކުރަމުން އަންނަނީ ގައުމީ މަސައްކަތެއް ކަމަށެވެ.
"ރިޔާސީ އިންތިހާބަކީ އަދި މުޅިން ވަކި އެއްޗެއް. އެހާ ހިސާބަށް ދިޔައީމަ އެނގޭނެ. މި އުޅެނީ ގައުމީ މަސްލަހަތު ހިމާޔަތް ކުރަން،" ސަލީމް ވިދާޅުވި އެވެ.
ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް އުމަރު ވިދާޅުވީ ކަނޑުގެ ސަރަހައްދުން ބައެއް ގެއްލުނު މައްސަލައަކީ ސީރިޔަސް މައްސަލައެއް ކަމަށާއި އެހެންކަމުން މިއީ މި ނިޔަތުގައި އެއްކޮށް މަސައްކަތް ކުރާނެ ކޯލިޝަނެއް ކަމަށެވެ.
"އަޅުގަނޑު މި ޕޯޑިއަމްގައި ސިޔާސީ ވާހަކަ ދައްކާ ނެތިން. އެކަމަކު ދަންނަވާލަން ބޭނުން ވަނީ އިބްރާހިމް މުހައްމަދު ސޯލިހު އެކަނިވާ މަންޒަރު ތިބޭފުޅުންނަށް ފެނިވަޑައިގަންނަވާނެ." އޭނާ ވިދާޅުވި އެވެ.
އިދިކޮޅު ފަރާތްތަކުން މިއަދު ވަނީ އެޓާނީ ޖެނަރަލް އިބްރާހިމް ރިއްފަތު އިތުބާރު ނެތް މައްސަލަ މަޖިލީހަށް ހުށަހަޅާފަ އެވެ. އަދި ކުރިޔަށް އޮތް ތަނުގައި ރައީސް އިބްރާހިމް މުހައްމަދު ސޯލިހާއި ފޮރިން މިނިސްޓަރު އަބްދުﷲ ޝާހިދުގެ މައްސަލަ ވެސް ހުށަހަޅުއްވަން ވަނީ ނިންމާފަ އެވެ.