ޕީޕީއެމްގެ ރިޔާސީ ކެންޑިޑޭޓް، ކުރީގެ ރައީސް އަބްދުﷲ ޔާމީން ކެމްޕެއިން މެނޭޖަރަކަށް މުހައްމަދު އަމީން (ކެޕްޓަން އަމީން) އަދި ނައިބަކަށް އަބްދުﷲ ނާޒިމް ހަމަޖައްސައިފި އެވެ.
މިރޭ ޕީޕީއެމް އޮފީހުގައި ބޭއްވި ޖަލްސާއެއްގައި އެ ދެ ބޭފުޅުންނަށް މަގާމްގެ ލިޔުން ހަވާލުކޮށްދެއްވީ ޕީޕީއެމް، ޕީއެންސީ ކޯލިޝަން ހިންގުމާ ހަވާލުވެހުންނެވި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) އެވެ.
ކެމްފެއިިން މެނޭޖަރަކަށް ހަމަޖެއްސެވި އަމީން އަކީ މޯލްޑިވިއަންގެ ކުރީގެ ފްލައިޓް އޮޕަރޭޝަންސް ޑިރެކްޓަރުގެ މަގާމް ފުރުއްވާފައިވާ ބޭފުޅެކެވެ. ނާޒިމަކީ ޕީޕީއެމްގެ ވެރިކަމުގައި ހެލްތު މިނިސްޓަރު ކަން ކުރެއްވި ބޭފުޅެކެވެ.
މަނީލޯންޑަރިން އާއި ރިޝްވަތުގެ ކުށް ސާބިތުވެ 11 އަހަރަށް ޖަލަށް ލާފައި އިދިކޮޅު ޕީޕީއެމްގެ ރިޔާސީ ކެންޑިޑޭޓް ރައީސް އަބްދުﷲ ޔާމީންގެ ކެމްޕެއިން ފަށަން ތައްޔާރުވަމުން އަންނަ ކަމަށް އެ ޕާޓީން ވަނީ ބުނެފި އެވެ.
ސެޕްޓެމްބަރު 9 ގައި ބާއްވާ ރިޔާސީ އިންތިހާބުގައި ޔާމީނަށް ކުރިމަތިލެވޭނެ ގާނޫނީ ހައިސިއްޔަތެއް މި ވަގުތަކު ނެތެވެ. ވ. އާރަށް ކުއްޔަށް ދިނުމުގައި ރިޝްވަތު ހިފައި މަނީ ލޯންޑަ ކުރި ކަމުގެ ތުހުމަތުގައި ޖަލު ހުކުމެއް ތަންފީޒު ކުރަމުންދާތީ އެ މަނިކުފާނު ވާދަކުރެއްވުމުގެ ގާނޫނީ ފުރުސަތު އަދި ވަނީ ބަންދުވެފަ އެވެ. އެ ދޮރު ފަހިވާނެކަން ކަށަވަރު ވާނީ ހައި ކޯޓުގައި މިހާރު އިސްތިއުނާފު ކޮށްފައިވާ އާރަށުގެ މައްސަލައިގެ ހުކުމް އަންނަ ގޮތަކުންނެވެ.
މިދިޔަ އަހަރުގެ ޑިސެމްބަރު މަހުން ފެށިގެން ޔާމީން ދިގު މުއްދަތުގެ ޖަލު ހުކުމެއް ތަންފީޒު ކުރައްވަމުން ގެންދެވިޔަސް ޕީޕީއެމް/ޕީއެންސީ ކޯލިޝަނުން ނިންމާފައި ވަނީ އެ ކޯލިޝަންގެ ރިޔާސީ ކެންޑިޑޭޓަކީ ޔާމީން ކަމަށެވެ.
