ރައްޔިތުންގެ މަޖިލީހުގެ މަސައްކަތްތައް މިހާރު ހުއްޓިފައި އޮތް އޮތުން ނިމުމަކަށް ގެނެވޭނީ، މަޖިލީހުގެ މެޖޯރިޓީ އޮންނަ އެމްޑީޕީން އިސްވެ ހުށަހަޅާފައިވާ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ގެ އިތުބާރުނެތް ކަމުގެ ކޮންމެވެސް އެއް މައްސަލައެއް އަނބުރާ ގެންގޮސްގެން ކަމަށް އިދިކޮޅު ޕާޓީތަކުން މިއަދު ބުނެފި އެވެ.
އިދިކޮޅު ބައެއް ޕާޓީތައް ގުޅިގެން މިއަދު ބޭއްވި ނޫސްވެރިންގެ ބައްދަލުވުމުގައި މެދުހެންވޭރު ދާއިރާގެ މެމްބަރު އަލީ އާޒިމް ވިދާޅުވީ މަޖިލީހުގެ ރައީސާއި ނައިބު ރައީސްގެ މައްސަލަ އެެއްފަހަރާ ހުށަހަޅައިގެން ކުރިއަށް ގެންދެވޭނެ ގޮތެއް ގާނޫނުއަސާސީ އާއި މަޖިލީހުގެ ގަވައިދުގައި ވެސް ނެތް ކަމަށެވެ.
"މިހާރު ވެސް އެކަން ކުރެވޭނެ ގޮތަކީ ކޮންމެވެސް އެއް ބޭފުޅަކު ޗެއާކުރުމުގެ ފުރުސަތު [މަޖިލީހުގެ ޖަލްސާތަކުގެ ރިޔާސަތު ބެލެހެއްޓުމުގެ ފުރުސަތު] ދެއްވާފައި ދެން ކުރިއަށް ގެންދިއުން،" އެމްޑީޕީން ވަކިވެ ދަ ޑިމޮކްރެޓްސްގެ ނަމުގައި އާ ސިޔާސީ ޕާޓީއެއް އުފެއްދުމަށް މަސައްކަތް ކުރައްވާ 13 މެމްބަރުންގެ ތެރޭގައި ހިމެނިވަޑައިގަންނަވާ އާޒިމް ވިދާޅުވި އެވެ.
އެ ބައްދަލުވުމުގައި ކެންދޫ ދާއިރާގެ ޖުމްހޫރީ ޕާޓީގެ މެމްބަރު އަލީ ހުސެއިން ވެސް ވިދާޅުވީ، މަޖިލީހުގެ ރައީސާއި ނައިބު ރައީސްގެ މައްސަލަ އެއްފަހަރާ ހުށަހެޅި މަޖިލިސް "ޑެޑްލޮކަށް" ދާނެ ކަން އެމްޑީޕީ އަށް އެނގިތިބެ ކަމަށެވެ.
އެހެންކަމުން، މަޖިލީހުގެ މަސައްކަތްތައް އަލުން ހިންގަން ބޭނުންވާ ނަމަ، އެއިގެ ތެރެއިން އެއް މައްސަލަ އަނބުރާ ގެންދަންޖެހޭ ކަން އޭނާ ފާހަގަކުރެއްވި އެވެ.
"...މިސާލަކަށް ސްޕީކާގެ އިތުބާރު ނެތްކަމުގެ މައްސަލަ ބާއްވާފައި ނައިބު ރައީސްގެ އިތުބާރު ނެތް ކަމުގެ މައްސަލަ [އަނބުރާ ނަގަންވީ]، އެހެންނޫނީ ނައިބު ރައީސްގެ އިތުބާރު ނެތްކަމުގެ މައްސަލަ ބާއްވާފައި މަޖިލީހުގެ ރައީސްގެ އިތުބާރު ނެތްކަމުގެ މައްސަލަ [އަނބުރާ ގެންދަންވީ]،" އަލީ ހުސެއިން ވިދާޅުވި އެވެ.
އެމްޑީޕީގައި ތިއްބެވި 13 މެންބަރަކު އެ ޕާޓީން ވަކިވުމާ ގުޅިގެން މަޖިލީހުގެ ދާއިމީ ކޮމިޓީތައް އެކުލަވާލުމުގައި އެއްބަސްވުމަކަށް ނާދެވި، ކޮމިޓީތަކުގެ މަސައްކަތްތައް ހުއްޓިފައި އޮންނަތާ ތިން ހަފްތާއެއްހާ ދުވަސް ވަނީ ވެފަ އެވެ.
އެކަމުގައި މައިގަނޑު ދެބަސްވުމެއް އުފެދިގެން އުޅެނީ އާންމު ކޮމިޓީ އެކުލަވާލުމުގަ އެވެ. އެ އާއެކު މަޖިލީހުގެ ނައިބު ރައީސްގެ މަގާމުން ގަލޮޅު އުތުރު ދާއިރާގެ މެމްބަރު އީވާ އަބްދުﷲ ވަކިކުރަން އެމްޑީޕީން ހުށަހަޅާފައިވާ މައްސަލަ ވެސް އޮތީ ހުއްޓިފަ އެވެ. އެއީ އީވާގެ އިތުބާރު ނެތް މައްސަލަ ކުރިއަށް ގެންދެވޭނީ މަޖިލީހުގެ އާންމު ކޮމިޓީން އެކަމަށްޓަކައި ވަގުތު ކަނޑައެޅުމުންނެވެ.
އީވާ ވަކިކުރުމުގެ މައްސަލާގައި ދޭންޖެހޭ 14 ދުވަހުގެ ނޯޓިސް މިއަދަށް ހަމަވެފައިވީ ނަމަވެސް، އާންމު ކޮމިޓީން ވަގުތު ކަނޑަނާޅާތީ އެ މައްސަލަ މިއަދުގެ ޖަލްސާ އަށް އެޖެންޑާއެއް ނުކުރެ އެވެ. އެކަމާ އެމްޑީޕީ މެމްބަރުން އަޑުގަދަކޮށް، މަޖިލީހުގެ މިއަދުގެ ޖަލްސާ ވަނީ ހުއްޓުވައިފަ އެވެ.
ދާއިމީ ކޮމިޓީތައް އެކުލަވާނުލެވިގެން އުޅެނީ، އެމްޑީޕީން އެކަމުގައި އެއްވެސް ވަރަކަށް ދޫދޭން ބޭނުންނުވާތީ ކަމަށް ވެސް މިއަދުގެ ބައްދަލުވުމުގައި އިދިކޮޅު ޕާޓީތަކުން ތުހުމަތުކުރި އެވެ.