މަޖިލީހުގެ ޖަލްސާއެއްގެ ރިޔާސަތު މަޖިލީހުގެ ރައީސް މުހައްމަދު ނަޝީދު ބަލަހައްޓަވަނީ. -ފޮޓޯ: މަޖިލީހުގެ އިދާރާ
22 ޖޫން 2023 - 11:58
ރައްޔިތުންގެ މަޖިލީހުގެ ދާއިމީ ކޮމިޓީތައް އަލުން އެކުލަވާލައި ނިމެންދެން މަޖިލީހުގެ މި ހިނގާ ދައުރު ދަންމާލަން އެމްޑީޕީ މެމްބަރުން އެދެމުން ގެންދަވަނިކޮށް، މަޖިލިސް ޗުއްޓީއަށް ހިނގައްޖެ އެވެ.
މަޖިލީހުގެ ޖަލްސާތައް ނުބޭއްވި ދެ ދުވަސް އޮތުމަށް ފަހު، މަޖިލީހުގެ ރިޔާސަތާ މަޖިލީހުގެ ރައީސް މުހައްމަދު ނަޝީދު ހަވާލުވެވަޑައިގެން މިއަދުގެ ޖަލްސާއަށް އެޖެންޑާކޮށްފައި އޮތީ ދާއިމީ ކޮމިޓީތައް އެކުލަވާލުމުގެ މަސައްކަތް އެކަންޏެވެ.
އެކަމަކު އެކަމުގައި ވޯޓަށް އަހައި ގޮތެއް ނިންމުން އޮތީ އެހެން ޖަލްސާއެއްގައި ކަމަށް އެޖެންޑާގައި ކަނޑައަޅާފައިވާއިރު، އެކަން ނަޝީދު ވެސް މިއަދު ވަނީ އިއުލާނުކުރައްވައިފަ އެވެ.
އެކަމާ އެންމެ ފުރަތަމަ ދެކޮޅު ހެއްދެވީ އެމްޑީޕީގެ ޕާލިމަންޓަރީ ގުރޫޕުގެ ލީޑަރު އަދި ހިތަދޫ އުތުރު ދާއިރާގެ މެމްބަރު މުހައްމަދު އަސްލަމެވެ.
އަސްލަމް ވިދާޅުވީ މަޖިލީހުގެ ތަޅުމުގައި އެޖެންޑާކޮށް ބަހުސްކުރެވޭ ކަމެއް ވޯޓަށް އަހައި ނިންމަންޖެހޭ ކަމަށް މަޖިލީހުގެ ގަވާއިދުގައި ސާފުކޮށް ބަޔާންކުރާ ކަމަށެވެ. އަދި މިއަދުގެ ޖަލްސާއަކީ މި ދައުރުގެ ފަހު ޖަލްސާ ކަމަށް ނަޝީދު އިއުލާނުކުރައްވާފައި ވާއިރު، މަޖިލީހުގެ ދާއިމީ ކޮމިޓީތައް އެކުލަވާލުން އަންނަ އޯގަސްޓު މަހުގެ 16 ވަނަ ދުވަހު ފެށޭ އަނެއް ދައުރަށް ފަސްވެގެން ދިއުމަކީ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވި އެވެ.
"އަޅުގަނޑު ހުށަހަޅަނީ އިތުރު ޖަލްސާއެއް ބާއްވައިގެން ނަމަވެސް އެޖެންޑާގައި ހުރި މުހިންމު މަސައްކަތްތަކުގައި ގޮތެއް ނިމެންދެން ދައުރު އިތުރުކުރަން،" މަޖިލީހުގެ މެޖޯރިޓީ ލީޑަރު ވިދާޅުވި އެވެ.
އޭގެ ފަހުން އެ ބަހުސްގައި ވާހަކަ ދެއްކެވި އެމްޑީޕީ ހުރިހާ މެމްބަރުން ކަހަލަ ގޮތަކަށް އަސްލަމްގެ ހުށަހެޅުމަށް ތާއީދުކުރައްވައި، ކޮމިޓީތައް އެކުލަވާލައި ނިމެންދެން ދައުރު ނިންމާނުލަން ރިޔާސަތުގައި އިންނެވި ނަޝީދުގެ އަރިހުން ތަކުރާރުކޮށް އެދިވަޑައިގަންނަވަމުން ގެންދެވި އެވެ.
ރިޔާސަތުން ނަޝީދު ވަނީ އެކަމާ އިއުތިރާޒުކުރައްވައި، މަޖިލީހުގެ އެޖެންޑާއަށް އިހުތިރާމް ކުރުމަށް މެމްބަރުން އަރިހުން އެދިވަޑައިގެންފަ އެވެ.
"...މެމްބަރުން މަޖިލީހުގެ އެޖެންޑާއަށް ހުރުމަތްތެރިކޮށް ހިއްތަވަންޖެހޭނެ. އެޖެންޑާ އާ ހިލާފަށް ވާހަކަ ވެސް ދައްކަވައިގެން ނުވާނެ، އަދި ކަންކަން ހުށަހަޅުއްވަން އުޅުއްވައިގެން ވެސް ނުވާނެ،" ނަޝީދު އިންޒާރު ދެއްވި އެވެ.
އޭގެ ފަހުން އެ މައްސަލައިގެ ބަހުސަށް ކަނޑައަޅާފައިވާ ޖުމްލަ ދެ ގަޑިއިރުގެ ވަގުތު ހަމަވުމާއެކު ރިޔާސަތުން ނަޝީދު ވަނީ މަޖިލިސް ޗުއްޓީއަށް ދިޔަކަން އިއުލާނުކުރައްވައި ޖަލްސާ ނިންމަވާލައްވައިފަ އެވެ.
މަޖިލީހުގެ ހިނގަމުންދާ ދައުރެއް އިތުރުކުރުމާ ބެހޭ ގޮތުން ސީދާ ވަކި އެއްޗެއް މަޖިލީހުގެ ގަވާއިދުގައި ބަޔާންކޮށްފައެއް ނުވެ އެވެ. މީގެ ކުރިން އަމަލުކޮށްފައިވާ ގޮތަށް ބަލާއިރު، މަޖިލީހުގެ މަސައްކަތެއް ނުނިމޭތީ، ދައުރު އިތުރުކުރަން ރިޔާސަތުން ހުށަހަޅައި، އެކަން ވަނީ ވޯޓަށް އަހައި ތަޅުމުން ފާސްކޮށްފަ އެވެ.
އެކަމަކު އެގޮތަށް އަމަލުކުރަން ރިޔާސަތަށް ލާޒިމުވާ ހާލަތެއް ގަވާއިދަކު ނެތެވެ.
ދައުރު އިތުރުނުކޮށް މަޖިލިސް ޗުއްޓީއަށް ދިޔުމުން، ދައުރުން ބޭރުގައި ޖަލްސާ ބާއްވަން ހުށަހެޅުމުގެ އިހުތިޔާރު އެމްޑީޕީއަށް އޮންނާނެ އެވެ. މަޖިލީހުގެ ގަވާއިދުގައި ބުނާ ގޮތުން، މަޖިލީހުގެ ތިން ބައި ކުޅަ އެއްބައި މެމްބަރުން ސޮއިކޮށް ހުށަހަޅައިފިނަމަ، ގިނަވެގެން 14 ދުވަހުގެ ތެރޭގައި ޖަލްސާއެއް މަޖިލީހުގެ ރައީސް ބާއްވަވަންވާނެ އެވެ. އެ މާއްދާގެ ދަށުން ގިނަ ޖަލްސާތަކެއް ބާއްވަން އެދުމަށް ވެސް ހުރަހެއް ނާޅަ އެވެ.
މަޖިލީހުގެ ދާއިމީ ކޮމިޓީތައް އަލުން އެކުލަވާލަންޖެހުނީ އެމްޑީޕީގައި ތިއްބެވި 13 މެމްބަރުން އެ ޕާޓީން ވަކިވެވަޑައިގެންނެވުމާ ގުޅިގެންނެވެ. އަދި އިއްޔެ ނަޝީދުގެ އިތުރުން ހިތަދޫ މެދު ދާއިރާގެ މެންބަރު އަހުމަދު ރަޝީދު (ޗެކްމާކް ރަޝީދު) ވެސް ވަނީ އެމްޑީޕީން ވަކިވެވަޑައިގެންފަ އެވެ.
މަޖިލީހުގެ 54 މެންބަރުންގެ ސޮޔާ އެކު ނަޝީދުގެ އިތުބާރު ނެތް މައްސަލައެއް ހުށަހަޅާފައި ވަނީ މި މަހު 7 ގަ އެވެ. އޭގެ ފަހުން ބޭއްވި އެއްވެސް ޖަލްސާއެއްގައި ބައިވެރިވެވަޑައިގަތުމަށް ނަޝީދު ވަނީ އުޒުރުވެރިވެވަޑައިގެންފަ އެވެ.
ނަމަވެސް މިއަދު ޖަލްސާއެއް އެޖެންޑާކުރެއްވުމަށް ފަހު ނަޝީދު ވަނީ ރިޔާސަތާ ހަވާލުވެވަޑައިގެންފަ އެވެ.
އެމަނިކުފާނު އަލުން ރިޔާސަތާ ހަވާލުވެވަޑައިގަތް ސަބަބު ބަޔާން ކުރައްވަމުން ވިދާޅުވީ މަޖިލިސް ހުއްޓިފައި އޮތުމުން ރައްޔިތުން ކަންބޮޑުވާ ކަމަށާއި އެ މައްސަލަ ހައްލުކުރުމަށް ރިޔާސަތު ބަލަހައްޓަވަމުން އައި ވިލުފުށީ ދާއިރާގެ މެންބަރު ހަސަން އަފީފް ރައީސް އިބްރާހިމް މުހައްމަދު ސޯލިހާ ބައްދަލުކުރެއްވި ނަމަވެސް ހައްލެއް ނުލިބުނު ކަމަށެވެ.
"އަޅުގަނޑުގެ އުޒުރުތަކަށް ވުރެ މާ މަތީ މަސްލަހަތެއް ހިފަހައްޓަން ޖެހޭ އެއީ ރައްޔިތުންގެ މަސްލަހަތު މުޅި ރާއްޖޭގެ މަސްލަހަތު. މަޖިލިސް ހުއްޓިފައި އޮތުމަކީ ރައްޔިތުންގެ މަސްލަހު ހިފެހެއްޓޭނެ ގޮތެއް ނޫން،" ނަޝީދު ވިދާޅުވި އެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
މާހިރު
24 June 2023
އަޑުގަަދަމީހާ ރުއްގިނަވާނޭބުނަނީ ތެދެއްކަން މިހާރުއެބައެނގެއެވެ. އެހެންނޫންނަމަ އަންނިއަށް މިހާރު ރިޔާސަތުގައި އިދެވެންޖެހޭސަބަބެއް ކޮބައިތޯއެވެ. މެޖޯރިޓީ މެމްބަރުން އިތުބާރުނެތްކަމަށް ބުނުމުންވެސް އެހައްދަވަނީ ބޭނުންއެއްޗެކެވެ. ޕްރައިމަރީން ބަލިވުމުން މާތާއީދުބޮޑު ފިކުރެއްއޮވެގެން އެފިކުރު ދިރުވަންއުޅެގެންވެސް ފިކުރު ދިރޭގޮތެއް ނުވިއެވެ. ޕާޓީގެ ރައީސްކަމުގައި ހުންނަވައިގެން ހަދަން އުޅުނު ޕާޓީވެސްނުހެދި ޕާޓީންވެސް ވަކިވާންޖެހުނީއެވެ.
މަބުނީ
22 June 2023
ދައުރު ދަންމަން ބޭނުންވަނީ އަސްލަމަށް މަޖްލިސް ރައީސްކަން ނުލިބިގެން.
ޥަސް
22 June 2023
މިއަދުމީ ރައްޔިތުންގެ މަސްލަޙަތު ހިމާޔަތް ކުރެވުނު ދުވަސްކަމަށް ޤަބޫލު ކޮށްލަންވީތޯ؟
ފޮނިހުސޭނު
22 June 2023
އެއީ އަދި ޗުއްޓީގަވެސް މުސާރަޔާ އިނާޔަތްތައް ހޯދަން ކުރިކަމެއް. އިތުރައް މަޖިލިސް ޖަލްސާތައް ކުރިޔަށް ގެންގޮސްސިއްޔާ ބޭރުކުރާނެކަން އެގޭޭތީ ޗުއްޓީއަށްދިޔައީ... ޑިމޮކްރެސީ އަހަރެމެންނަށް ދަސްކޮއްދީފި.
އެޗް އެމް
22 June 2023
ރައްޔަތުންގެ މަސްލަހަތައްޓަކައި ރަސްމީކޮށް ގަވާއިދާއިއެއްގިތަށް މަޖިލިސް ތަޅުލީ. މިވަގުތު ރައްޔަތުންގެ މަސްލަހަތަކަށްވީ ނުރަަަމީކޮށް މަޖިލިސް ބަންދުވެފައި އޮތުން. އެހެންވީމަ މިކަމުގައު ރައްޔަތުން ކަންބޮޑުވާންޖެހޭ އެންމެ ކަމެއްވެސް ހަމަހިލާ މިހާރު އޮވެގެން ނުވާނެ. އަހަރެން އެދެނީ އެންމެ ބޭފުޅުންވެސް ރައްޔަތުންނާ ގުޅޭ މިކަހަލަކަންކަމުގަ ހައްލު ނުހޯދިއްޖެނަމަ، އެމުއައްސަސާއެއް ވަގުތުން ބަންދުކޮށްލުން. ދަ ޑޫމްކްރޮސީ.
ބޮޑުމީހާ
22 June 2023
މެޖޯރިޓީ އޮއްވާ އެ ދިޔައީ ނަޝީދު ބޭނުން އެއްޗެއް ހަދާފަ. މިހުންނަނީ ކަންކަންކުރެވޭ މީހުން. އިބޫހެން ވާނުވާ ނޭގިއެއް ނޫޅޭނެ
ކާތިބު
22 June 2023
ބާރުއޮތަތީ ޢަބްދުﷲ ގާޒީ ބަންދުކޮށްގެން، ކޯޓުން ދޫކޮށްލަން އެންގުމުންވެސް، ދޫނުކޮށް ގަދަފައި ވިއްދައިގެން ފުއްޕާފަ އުޅުނު. މަންޒަރު ދުށީމުތަ? ކަންކަންވެ ނިމިގެންދިޔައީ ޙައްޤަށް ނަޞްރުލިބިގެން. މިއީ ދިވެހި ރައްޔަތުންގެ މަޖިލިސް. މިއީ ސިޔާސީ ހަރުގެއެއް ނޫން. މިތާ ކަންކަން ކުރަންވާ ގޮތާ އުޅެންވާގޮތާ ކަންކަން އޮންނަންވާގޮތް ދުރާލާ ލިޔެފައޮވޭ. އެއަށް ނަޝީދު ވެސް އީވާ ވެސް އެހެން މެންބަރުން ވެސް ތަބާވެ ޢަމަލުކުރަންޖެހޭނެ. އެހެން ނޫނީ ގެއަށް ދުރުވޭ!
ނާސަރީމަޖްލިސް
22 June 2023
މިތާގަ އުޅެނީ ނާސަރީގަ އުޅޭކުދިންތައް . އާންޓީ ބުނާބަސް އަހައިގެން އުޅެނީ، ބަސްނާހާކުދިން ނަންގޮވާފަ ކުލާހުން ބޭރަށް. ސުކޫލް ޗުއްޓީވީމަ ޗުއްޓީލިބޭ، ޗުައްޓީނޫންނަމަ 3 މަސްދުވަހިގެ ބްރޭކް ލިބޭ. މަހަކު އެތައްމިލިޔަން ހަރަދުކުރޭ. ހަރަދު މިކުރަނީ ރައްޔިތުމީހާ ކަންމަތީ ފިހާރައިން އެއްޗެއްގަތީމަ ނަގާ ޓެކްސްއިން. މިހާރު ރައްޔިތުން މިތިބެނީ ލަަދުން ކުރާނެ ކަމެއް ނޭގިފަ. ކުޑަކުދިން ވީމަ ރޭކާ ނުލާ އަދި މިވާގޮތެއް
ކީހާފަރިހިޅެމަށް
22 June 2023
"އަޅުގަނޑަށް ފެންނަ ގޮތުގައި" ރައްޔިތުން ރައްޔިތުން ޑިމޮކްރެޓިކް ގޮތަކީ އަޅުގަނޑަށް ފެންނަ ކޮންމެގޮތެއް. ޑިމޮކުރަސީ އަކީ "އަޅުގަނޑަށް ފެންނަ ގޮތް". ދެން ވެސް މީސްތަކުންނޭ ހޭއަރާ ބަލަ.
ގަހަރުލާދާ
22 June 2023
މާތްﷲ މުނާފިޤުން ބޭޒާރު ކުރައްވާލެއް ފުރިހަމަކަމާއެވެ. ޖަލްސާ ފަށްޓަމުން ބުނީ ތިމަންނަގެ މަސްލަހަތު އެއްފަރާތްކޮށް ރައްޔިތުންގެ މަސްލަހަތު އިސްކޮށް ރިޔާސަތުގަ އިށީނީއޭ. މިވަގުތ ރައްޔިތުންގެ މަސްލަހަތު އެންމެ ބޮޑަށް އޮތީ ކޮމިޓީތައް އެކުލަވާލަން ކަމަށް ވާތީ އެތައް މެންބަރުންނެއް އެދުމުން ވެސް ދައުރު ދިގުދަންމާނުލާ، އެއީ ރިޔާސަތުން ހުށަހަޅަން ޖެހޭ ކަމެކޭ ކިޔާ ދައުރު މި ނިންމާލީ. މިއަދުގެ ޖަލްސާ ބޭއްވީ ހަމައެކަނި ދައުރު ނިންމާލުމުގެ ބޭނުމުގަ.
މާޔޫސް
22 June 2023
މިކަން ވާނީ ހަމަ މިހެން ރައްޔިތުންގެ މަސްލަހަތު ހިފަހައްޓަވަން ވެގެން މަޖްލީސް ޖަލްސާތައް ނުވާއްވާ 3 ހަފްތާ ދުއްވާލި، މުސާރަނަންގަވަށް ބަރާބަރު. މަޖްލީސް ޗުއްޓީއަށް ދިޔައީމާ ރައްޔިތުންގެ މަސްލަހަތު އޮންނާނީ ދެމެހެއްޓި ނިމިފަ. މަޖްލީހުގެ ގަވާއިދު ހެދި ބަޔަކަށް ސަލާމް