އެމްޑީޕީގެ ބޮޑު ތާއީދެއް ފަހަކަށް އައިސް އޮންނަ ހދ. ކުޅުދުއްފުށިން، އިދިކޮޅު ޕީއެންސީގެ ރިޔާސީ ކެންޑިޑޭޓް، ޑރ. މުހައްމަދު މުއިއްޒަށް މަރުހަބާ ކިޔުމަށް ދިގު ސަފެއް މިއަދު ދަމާލައިފި އެވެ.
އަންނަ މަހުގެ 9 ގައި ބާއްވާ ރިޔާސީ އިންތިހާބުގެ ކެމްޕެއިނަށް، ރާއްޖޭގެ އެންމެ އުތުރަށް މިއަދު ހެނދުނު ފެއްޓެވި ދަތުރުގެ ފުރަތަމަ ދުވަހު ހދ. އަތޮޅުގެ ތިން ރަށަކަށް މުއިއްޒާއި އޭނާގެ ރަނިންމޭޓް ހުސައިން މުހައްމަދު ލަތީފާއި ޕީޕީއެމް/ޕީއެންސީގެ ލީޑަޝިޕްގެ ބޭފުޅުން ވަޑައިގަތެވެ.
އެންމެ ފުރަތަމަ ހަނިމާދުއަށެވެ. ދެ ވަނަ ރަށަކަށް ނޮޅިވަރަމް އަދި ދުވަހުގެ ފަހު މަންޒިލެއްގެ ގޮތުން، މާލޭގެ މޭޔަރުކަން ކުރައްވާ މުއިއްޒާއި އޭނާގެ ކެމްޕެއިން ޓީމު އައީ ތިލަދުންމަތީގެ މައި ހަބު ކަމަށް ގިނަ ބަޔަކު އިއްތިފާގުވާ ކުޅުދުއްފުއްޓަށެވެ.
މުއިއްޒާއި ހުސައިން މުހައްމަދު ލަތީފަށް މަރުހަބާ ކިޔަން ކުޅުދުއްފުށީގެ ބަނދަރު ސަރަހައްދުގައި ޕީޕީއެމްގެ ސަޕޯޓަރުންގެ ދިގު ކިއޫއެއް ދަމާލައި އެ މީހުން ތާއީދު އޮތް ކަން އަންގައިދިނެވެ.
ކުޅުދުއްފުށިން ވާހަ ކަދެއްކި މީހަކު ބުނީ، މިއީ ކުރީގެ ދެ ރައީސުން ކަމަށްވާ މުހައްމަދު ނަޝީދާއި އަބްދުﷲ ޔާމީނަށް ތާއިދުކުރާ ބަޔަކު އުޅޭ ތަނެއް ކަމަށެވެ. ނަމަވެސް، އެމްޑީޕީ ދެ ބައިވުމާ އެކު، އެ ޕާޓީގެ އަސްލު މަންޒަރު ގެއްލި، ޕީޕީއެމަށް ތާއިދުކުރާ ގިނަ ބަޔަކު ފަހުން އަނެއްކާވެސް ފެންނަން ފެށީ ކަމަށް ބުންޏެވެ.
މުއިއްޒަށް މިއަދު ހަވީރު މި ރަށުން ކިޔާފައި ވަނީ، އޭނާ ބުނިގޮތުގައި، މެހެމާނަކަށް މި ފަހުން ކީ އެންމެ ފުރިހަމަ މަރުހަބާ އެވެ.
"މި ފަހުން ނެތް މަރުހަބާ ކިޔާކަށް މިހާ ގިނަ ބަޔަކު އެއްފަހަރާ ނުކުމެފައެއް،" އޭނާ ބުންޏެވެ.
މި ރަށުން ވާހަކަ ދެއްކި މީހާ ގަބޫލުކުރާ ގޮތުގައި، އިދިކޮޅު ކެންޑިޑޭޓަށް މަރުހަބާ ކިޔުމަށް ގިނަ ބަޔަކު ނުކުތީ ރައީސް އިބްރާހިމް މުހައްމަދު ސޯލިހުގެ މި ސަރުކާރުގެ ތަރައްގީގެ މަޝްރޫއުތައް ކުރިއަށްގެންދާ ސްޕީޑް ލަސްވުމުން، އެކަމާ ހިތްހަމަނުޖެހިގެންނެވެ.
މަޝްރޫއުތަކަށް އެކަށީގެންވާ ސަމާލުކަން ނުދޭ ކަމަށް ބުނެ، މި ރަށު ކައުންސިލްގެ ހުރިހާ މެމްބަރުން ވެސް ވަނީ ނަޝީދު އިސްވެ މި ފަހުން އުފެއްދި ޑިމޮކްރެޓްސް އަށް ސޮއިކުރައްވައިފަ އެވެ. އަދި މިހާރު ހިނގަމުން އަންނަ ރައްޔިތުންގެ މަޖިލިހުގެ ދެ މެމްބަރުން ވެސް ތަމްސީލު ކުރައްވަނީ އެމްޑީޕީ އެވެ.
ނަމަވެސް ކުޅުދުއްފުށިން މިއަދު މުއިއްޒަށާއި ޕީޕީއެމް ކޯލިޝަނަށް ދައްކައިދިނީ އެހެން މަންޒަރެކެވެ. އިދިކޮޅުގެ ބާރު އަދި ސަޕޯޓަރުންގެ އަޑު ވެސް މަޑު ނޫން ކަމެވެ.