މާލޭގެ މަގުތަކުގައި ހުރި ބާ އުޅަނދުތައް މާލޭ ސިޓީ ކައުންސިލުން ފުލުހުންނާ ގުޅިގެން އަނެއްކާވެސް ނަގަން ފަށައިފި އެވެ.
މާލޭ ސިޓީ ކައުންސިލުން ބުނީ އެ އުޅަނދުތައް ނަގަނީ މާލޭގެ މަގުތައް ތަރުތީބުކޮށް، ރީތިކުރަން ކުރަމުން އަންނަ މަސައްކަތުގެ ދަށުން ކަމަށެވެ.
ކައުންސިލުން ބުނި ގޮތުގައި މާލޭގެ އެކި މަގުތަކުގައި ބޭނުން ނުކުރާތާ އެތައް އަހަރެއްވީ އުޅަނދުތައް އެބަހުއްޓެވެ. އޭގެ ތެރެއިން ބައެއް ވެހިކަލްތައް ހުރީ ބާވެ، އެކި ބައިތައް ވެސް ނެތިފައި ކަމަށް ކައުންސިލުން ބުންޏެވެ.
މާލެ އާއި ހުޅުމާލޭގެ މަގުތަކުގައި ބޭނުންނުކޮށް ގިނަ ދުވަސްވަންދެން ބަހައްޓާފައި ހުރި ވެހިކަލްތައް ޓޯކޮށް، ނައްތާލުމުގެ މަސައްކަތް މިދިޔަ ފެބުރުއަރީ މަހު، ޓްރާންސްޕޯޓް މިނިސްޓްރީން އިސްނަގައިގެން މާލޭ ސިޓީ ކައުންސިލާއި ވެމްކޯ އަދި ފުލުހުން ގުޅިގެން ވެސް ކުރި އެވެ.
އެފަހަރު މާލެ އާއި ހުޅުމާލޭގެ މަގުތަކުން ބާ އުޅަނދުގެ ގޮތުގައި، 200 ވެހިކަލް ނަގައި ނައްތާލި އެވެ.