އިސްލާމީ މަރުކަޒުގެ މުންނާރު ކައިރީ އޮތް މަސްފެންގަނޑު ސްޓެލްކޯގެ ފަރާތުން ކޮށް ނިންމައި އިސްލާމިކް މިނިސްޓްރީއާ މިއަދު ހަވާލު ކޮށްފި އެވެ.
އިސްލާމީ މަރުކަޒުގެ މުންނާރު ކައިރީގައި އޮންނަ މަސްފެންގަނޑަކީ މީގެ 40 އަހަރު ކުރިން އެ މިސްކިތް ހުޅުވުއިރު ވެސް ހަދާފައިވާ ތަނެކެވެ. އެކަމަކު، އެ މަސްފެންގަނޑު މަރާމާތު ނުކޮށް ގިނަ ދުވަސްތަކެއް ވުމުން ބޭނުމެއް ނުކުރެ އެވެ.
އެހެންވެ، އިސްލާމީ މަރުކަޒު ހުޅުވިތާ 40 އަހަރު ފުރުން ފާހަގަކުރުމާ ދިމާކޮށް، މަސްފެންގަނޑު މަރާމާތު ކޮށްދޭނެ ބަޔަކު ހޯދަން އިސްލާމިކް މިނިސްޓްރީން މިދިޔަ މަހު ފުރުސަތު ހުޅުވައިލުމުން ސްޓެލްކޯ އިން ބޭނުންވީ އެ ކުންފުނީގެ ސީއެސްއާރު ޕްރޮޖެކްޓެއްގެ ގޮތުގައި އެކަން ކޮށްދޭށެވެ.
އެ ތަން ނިންމައި މިނިސްޓްރީއާ ހަވާލު ކުރީ މިއަދު އެކަމަށްޓަކައި އެ ސަރަހައްދުގައި ބޭއްވި ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި ސްޓެލްކޯގެ މެނޭޖިން ޑިރެކްޓަރު ހުސައިން ފަހުމީ އާއި އެ ކުންފުނިން މަސައްކަތުގައި އުޅުނު މުވައްޒަފުންނާއި އިސްލާމިކް މިނިސްޓަރު ޑރ. ޝަހީމް އަލީ ސައީދާއި އެ މިނިސްޓްރީގެ ބޭފުޅުން ވެސް ބައިވެރިވެވަޑައިގަތެވެ.
މުންނާރު ކައިރީ އޮންނަ މަސްފެންގަނޑު މީގެ ކުރިން އޮންނަނީ ވަރަށް ހަޑި ކޮށެވެ. ނަމަވެސް މިހާރު ވަނީ އެތަން އެއްކޮށް ސާފުކޮށް ކުލަ ބަދަލުކޮށް މަސް ވެސް ލައިފަ އެވެ.
އިސްލާމީ މަރުކަޒާއި އެ ތަނުގެ ތެރޭގައި ހަދާފައިވާ ބޮޑު މިސްކިތް ހުޅުވީ މީގެ 40 އަހަރު ކުރިން ނޮވެމްބަރު 11، 1984 ގަ އެވެ.