ފަޒީލް އަށް ގޯތި ހައްގު ނޫނަސް ވަށާފާރު ހުރީ ރާނާފައި!

އެޗްޑީސީގެ މެނޭޖިން ޑިރެކްޓަރު ފަޒުލް ރަޝީދުގެ ބޭބެ މުހައްމަދު ފަޒީލް ރަޝީދަކީ ބިންވެރިޔާ ސްކީމުން ގޯތި ލިބިފައި އޮތް މީހެއް ނޫންކަން ހައުސިން މިނިސްޓްރީން އެޗްޑީސީ އަށް އަންގާފައި އޮއްވައި ވެސް އެ ގޯތީގެ ވަށާފާރު ރާނަން ފަށާފައިހުރިކަން ހާމަވެއްޖެ އެވެ.

އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ފަޒީލަކީ ހުޅުމާލެ އިން ގޯތި ލިބޭ މީހުންގެ ލިސްޓުގައި ކުރިން ހިމެނިފައި ނެތް އަދި ގޯއްޗަށް ޝަރުތު ހަމަވާ މީހެއް ނޫން ކަމަށް އޮތީ ކަނޑައަޅައިފަ އެވެ. އެކަމަކު އޭނާ އަށް ގޯތި ލިބިފައިވާ ކަމަށް ބުނާ ރަޖިސްޓްރީއާ އެކު، އެ ބިމުގެ ވަށާފާރު ރޭނުމުގެ ހުއްދައަކަށް އެޗްޑީސީގައި އޭނާ އެދުނީ އެވެ.

ފަޒީލް އެ ހުއްދަ އަށް އެދުނީ ޖޫން 30، 2024 ގަ އެވެ. އެހެންވެ، އެޗްޑީސީން އަމަލުކުރާ އުސޫލުން އެ ގޯތީގެ ރެޖިސްޓްރީ ވެރިފައި ކުރުމަށް ހައުސިން މިނިސްޓްރީ އަށް ފޮނުވި އެވެ. އިތުރު މީހަކު ވެސް ގޯތީގެ ވަށާފާރު ރޭނުމުގެ ހުއްދައަށް އެދިފައި އޮތުމުން އެ ވެސް ހައުސިން މިނިސްޓްރީ މެދުވެރިކޮށް އެކަން ސާފުކުރަން ފޮނުވި އެވެ.

ފަޒީލްގެ އިތުރުން ދެން ހުއްދައަށް އެދިފައި އޮތީ އަބްދުލްމަޖީދު މާހިރު ކިޔާ މީހެކެވެ. ބިންވެރިޔާ ސްކީމުން ގޯތި ލިބެނީ މާލޭ މީހުންނަށް ކަމަށް ވިޔަސް އެއީ ހއ. ދިއްދޫގައި ރަޖިސްޓަރީ އޮތް މީހެކެވެ.

ހައުސިން މިނިސްޓްރީން މި އަހަރުގެ އޯގަސްޓް 15 ގައި އެޗްޑީސީގެ ސިޓީއަށް ދިން ޖަވާބުގައި އޮތީ އެއީ ބިންވެރިޔާ ލިސްޓުގައި ހިމެނޭ ބައެއް ނޫން ކަމަށާއި އެ ދެ ގޯއްޗަކީ އެއްވެސް މީހަކަށް ދީފައި އޮތް ދެ ގޯތި ނޫން ކަމަށެވެ.

ހައުސިން މިނިސްޓްރީން އެ ޖަވާބު ދިންތާ ފަސް މަސް ފަހުން އިއްޔެ އެ ލިޔުންތައް ސޯޝަލް މީޑިއާގައި އާންމުވެ، ޝަކުވާ ބޮޑުވުމުން ފުލުހުން ވަނީ އެ މައްސަލަ ތަހުގީގު ކުރަން ފަށައިފަ އެވެ. ތަހުގީގާ ގުޅިގެން އެޗްޑީސީގެ މެނޭޖިން ޑިރެކްޓަރު ފަޒުލް އާއި ބޯޑު އެއްކޮށް މިއަދު ވަނީ ސަސްޕެންޑް ވެސް ކޮށްފަ އެވެ. ބޯޑުން ސަސްޕެންޑް ނުކުރަނީ މިދިޔަ މަހުގެ ހަ ވަނަ ދުވަހު އެޗްޑީސީގެ ޗެއާމަނަކަށް ހަމަޖެއްސި އަހުމަދު ނާސިފް (ޑީޑީ) އެކަންޏެވެ.

އެ ތަހުގީގު ފެށިއިރު، މައްސަލަ ބޮޑުވެފައިވާ ގޯތީގެ ވަށާފާރު ހުރީ ރާނަން ފަށައިފަ އެވެ. ގާތްގަނޑަކަށް ހަތަރު ފޫޓެއްހާ އުސްމިނަށް ވަނީ ވަށައިގެން ފާރު ރާނައިފަ އެވެ. އެ މަސައްކަތް ކޮށްފައި ވަނީ ވަރަށް ފަހުންކަން އެނގެ އެވެ. ރޭނުމަށް ބޭނުންވާ ބައެއް ސާމާނު ވެސް ގޯތިތެރޭގައި އެބަހުއްޓެވެ.

އެ ގޯއްޗަކީ އެއްވެސް މީހެއްގެ ތަނެއް ނޫން ކަމަށް ހައުސިން އިން އަންގާފައި ވަނިކޮށް އެތަން ރާނާފައިވަނީ އެޗްޑީސީން ހުއްދަ ދީގެން ކަމެއް ނުވަތަ ހުއްދަ ނުދެނީސް ކަމެއް ނޭނގެ އެވެ. އެކަމާ ގުޅޭ ގޮތުން އެޗްޑީސީގެ ބަހެއް ނުލިބުނެވެ.

އަދި ރޭ ބޭއްވި ނޫސްވެރިންގެ ބައްދަލުވުމުގައި ފަޒުލް ވެސް އެ ސުވާލަށް ޖަވާބެއް ނުދެއްވި އެވެ. ނަމަވެސް، އެ ތަނުގައި ފާރު ރާނާފައި ނުހުންނާނެ ކަމަށް ފަޒުލް ވިދާޅުވެފައިވެ އެވެ.

ބިންވެރިޔާ ސްކީމްގެ ދަށުން ހުޅުމާލެ 2 އިން ދޭން ނިންމި ހުރިހާ ގޯއްޗެއް ހައުސިން މިނިސްޓްރީން ވަނީ އެ ބިންތައް ލިބުނު މީހުންނަށް މިދިޔަ މަހު ހަވާލުކޮށް، އެ ގޯތިތަކުގެ ކަންމުޑި ޖަހައި، އިން ވަކިކޮށްދިނުމުގެ މަސައްކަތް އެޗްޑީސީއާ ހަވާލުކޮށްފަ އެވެ. ގޯތީގެ ވަށާފާރު ފަދަ މަސައްކަތްތައް ކުރެވެނީ އެޗްޑީސީން ހުއްދަ ލިބުމުންނެވެ.

ގޯތިތަކުގެ މައްސަލަގައި ފަޒުލް ރޭ ބޭއްވި ކުއްލި ނިއުސް ކޮންފަރެންސްގައި ނޫސްވެރިން ވަނީ މައްސަލަ ފާހަގަވުމުން ފުލުހުންނަށް ހުށަހެޅިތޯ ސުވާލުކޮށްފަ އެވެ. ފަޒުލް ވިދާޅުވީ އެ މައްސަލަ ފުލުހުންނަށް ހުށަނާޅާ ކަމަށާއި އެކަން ފެންމަތިވުމުން ފުރަތަމަ ވެސް ހައުސިން މިނިސްޓްރީ އަށް ހުށަހަޅައި މިނިސްޓްރީން މައުލޫމާތުތައް ސާފު ކުރަން ބޭނުންވީ ކަމަށެވެ.

ހައުސިން މިނިސްޓްރީން ޖަވާބު ދިނުމުން ވެސް އިތުރު ވެރިފިކޭޝަންތަކެއް ހަދަމުން އަންނަ ކަމަށް ފަޒުލް ތަކުރާރުކޮށް ވިދާޅުވި އެވެ.

ނަމަވެސް މިދިޔަ ފަސް މަސް ތެރޭގައި އެ މައްސަލަ ސިއްރު ކޮށްފައި ބޭއްވީ ކީއްވެތޯ އާއި އެއީ އަމިއްލަ ބޭބެގެ މައްސަލައަކަށް ވުމުންތޯ ނޫސްވެރިން ސުވާލުކުރި އެވެ. އެ ސުވާލުތަކަށް ޖަވާބު ދެެއްވަމުން ފަޒުލް ވިދާޅުވި ގޮތުގައި އޭނާގެ "ކޮންފްލިކްޓް އޮފް އިންޓްރެސްޓެއް އެކުލެވިގެން ނުވެ" އެވެ.