ފެން ހިންދުން ފަސޭހަ ކުރުމަށްޓަކައި ރަސްފަންނާ ދިމާލުން ކޯރެއް ކަނޑާލަން ޖެހުނު!

މާލެ އަށް އިއްޔެ ކުރި ބޯ ވިއްސާރައިގައި މާފަންނުން މަޖީދީ މަގުގައި ބޮޑުވި ފެންގަނޑާ ހެދި މުދަލަށް އެތައް ގެއްލުމެއް ލިބެން ފެށުމުން، ފެންގަނޑު ހިންދުމަށްޓަކައި ރަސްފަންނާ ދިމާލުން ޕޭވްމަންޓް ކައިރިން ކޯރެއް ކަނޑައިފި އެވެ.

ކޯރު ކަނޑާފައި ވަނީ ސޯޝަލް ސެންޓަރު ކައިރިން ރަސްފަންނު ސަރަހައްދަށް ވަންނަ ދިމާލުންނެވެ. ތިރީހަށް ފޫޓުގެ ކޯރެއް މިހާރު ވަނީ ރަސްފަންނު މޫދާ ހިސާބަށް ކަނޑައިފަ އެވެ. ކޯރު ކެނޑުމުގައި އިސްކޮށް ހަރަކާތްތެރިވީ މާފަންނު ސަހަރާ ކައިރީގައި ކޮސްމެޓިކްސް ފިހާރައެއް ހިންގާ ރިލްވާން ލަތީފާއި އެ ސަރަހައްދުގައި ފިހާރަތައް ހިންގާ ބައެއް މީހުން އިސްވެ އެވެ. އަދި މާފަންނު ސަރަހައްދުން ފެން ހިންދުމުގައި އެހީތެރިކަން ފޯރުކޮށްދެމުން ދިޔަ އެމްޑަބްލިއުއެސްސީގެ މުވައްޒަފުން ވެސް އެ ކަމަށް ބައެއް ސާމާނު ފޯރުކޮށްދިން ކަމަށް އެ ތަނުގައި އެ ވަގުތު ހުރި މީހަކު ބުންޏެވެ.

އެ ކޯރު ކެނޑީ އެ ސަރަހައްދުގައި ފެންބޮޑުވެ ގެތަކާއި ފިހާރަތަކަށް ފެން ވަދެ އެތައް ގެއްލުމެއް ލިބުނު އިރު ވެސް ފެން ހިންދުން ލަސްވުމުންނެވެ. އެމްއެންޑީއެފުން މާލޭގެ އެކި ސަރަހައްދުތަކުގައި ފެން ހިންދުމުގެ މަސައްކަތް ކުރިޔަސް މާފަންނުކޮޅުގައި އެންމެ ބޮޑަށް ފެންބޮޑުވި ސަރަހައްދުގައި މިރޭ 12 ޖެހުމާ ހަމައަށް ވެސް ފެން ނުހިނދެ އެވެ.

އެހެންވެ، މާލެ އަށް މިއަދު ހަވީރާއި މިރޭ އެންމެ ބޯކޮށް ވާރޭ ވެހުނު ވަގުތު ކޯރު ކަނޑައިގެން ރަސްފަންނާ ދިމާލަށް ފެން ބޭރުކުރީ އެވެ. އޭރު ވެސް ޕަމްޕް ޖަހައިގެން އެމްއެންޑީއެފުން ފެން ބޭރުކުރަމުން ދިޔަ ނަމަވެސް އާދަޔާ ހިލާފަށް ބޯކޮށް ވާރޭ ވެހުމުން ފެންގަނޑު ހިންދުން ވަރަށް ބޮޑަށް ލަސްވި އެވެ.

މާލެ އަށް އިއްޔެ ވެހުނު ބޯ ވާރޭގައި އެންމެ ބޮޑު ގެއްލުމެއް ވެފައި ވަނީ މާފަންނުގެ ގެތަކަށާއި މަޖީދީ މަގުގައި ހިންގާ ފިހާރަތަކަށެވެ.

ރިލްވާން ލަތީފު މިރޭ ބުނީ މިދިޔަ ހަފުތާގައި ވެސް ވާރޭވެހި ފިހާރަތެރެއަށް ކޮންމެ ވެސް ވަރަކަށް ފެން ވަން ކަމަށެވެ. އެކަމަކު، މިރެއާ ހަމައަށް މެދުނުކެނޑި ވެހުނު ވާރޭގައި ފިހާރައިގެ އެންމެ އެތެރެއަށް ވެސް ފެން ވަދެ، ގުދަނެއްގެ ގޮތުގައި ބޭނުންކުރާ ތަނުގައި ބަހައްޓާފައި ހުރި ކަބަޑުތަކުން ވެސް ބައެއް އެއްޗެހި އުކާލާފަން ޖެހިފައިވާ ކަމަށް އޭނާ ބުންޏެވެ.

ބޯ ވިއްސާރާގައި މާލޭގެ ފިހާރައަކަށް ވަން ފެންގަނޑު ބޭރުކުރަނީ-- ފޮޓޯ: ނިޝާން އަލީ | މިހާރު

"ގާތްގަނޑަކަށް ގަޑިއިރެއްފަހުން އަނެއްކާ ވާރޭވެހެން ފެށީ. އިރުއޮއްސި ހައެއް ނުޖަހަނީސް ފެން ހިއްކޭތޯ އެކްޓިވްވިން. އެކަމަކު، ވެހިކަލްތައް ދުއްވާ ވަރަކަށް ފިހާރައަށް ވެސް ފެން ވަންނަން ފެށީ،" އޭނާ ބުންޏެވެ.

ރިލްވާން ބުނީ އެ ސަރަހައްދުގެ އެހެން ތަންތަނަށް ވުރެ އުސްކޮށް ހަދާފައިވާ ޖެލީ ރެސްޓޯރެންޓުގެ ބަދިގެއަށް ވެސް ފެން ވަދެ އަދި ޖެހިގެން ހުންނަ ރެއިންބޯގެ ބައިސްކަލް ފިހާރައަށް ވެސް ފެން ވަދެ އެކި ވަރުގެ ގެއްލުންތައް ލިބުނު ކަމަށެވެ.

ރަސްފަންނާ ދިމާލުން ކޯރެއް ކަނޑާފައި.-- ފޮޓޯ: ނިޝާން އަލީ/ މިހާރު

"ރޭގަނޑު 8 ޖެހިއިރު ވެސް ވެލި ބަސްތާއެއް ނާދޭ. އަދި ފެން ހިއްކަން މި ގެންގުޅެނީ ކުދި ކުދި ޕަމްޕު،" ރިލްވާން ބުންޏެވެ.

ރިލްވާނާއި އެހެން ވިޔަފާރިވެރިންގެ އެހީތެރިކަމާ އެކު، ކޯރު ކެނޑުމާއެކު ފެންތައް ބޭރުވެ، އެ ސަރަހައްދަށް ވަރަށް ބޮޑު ލުޔެއް ލިބުނެވެ. އެކަމަކު، މިރޭ ދަންވަރު ވެސް މޫސުން ގޯސްވާނެ ކަމަށް މެޓުން ލަފާކޮށްފައިވާތީ އެ މީހުން ތިބީ ގޮތް ހުސްވެފަ އެވެ.