ވައިރަލް ރޯގާ އާއި އެޗް1އެން1 ގެ ކޭސްތައް ވަރަށް ބޮޑަށް އިތުރުވެ، އައިޖީއެމްއެޗަށް ދައްކާ މީހުން އިތުރުވެ ޖާގަ ފުރުމާ ގުޅިގެން ހުމުގެ ކްލިނިކެއް ތާޖުއްދީން ސްކޫލުގައި ވެސް ހުޅުވައިފި އެވެ.
އައިޖީއެމްއެޗްގެ މީޑިއާ ކޯޑިނޭޓަރު މިރޭ ވިދާޅުވީ އެ ސްކޫލްގައި ކްލިނިކް ހުޅުވައި ބަލި މީހުންނަށް ހިދުމަތް ދޭން ފެށީ އިރު އޮއްސި 6:00 ގައި ކަމަށާއި 24 ގަޑި އިރު އެތަނުން ހިދުމަތް ދޭނެ ކަމަށެވެ.
އޭނާ ވިދާޅުވީ އެތަނުގައި ބަލި މީހުން ބެއްލެވުމަށް ހަ ޑޮކްޓަރުންނާއި ހިދުމަތަށް ބޭނުންވާ ހުރިހާ ވަސީލަތްތަކެއް ގާއިމުކޮށްފައިވާ ކަމަށެވެ. އެގޮތުން ހުރިހާ ޓެސްޓްތަކެއް ތާޖުއްދީން ކްލިނިކުން މިހާރު ހެދޭނެ އެވެ.
"ބަލި މީހަކު އެޑްމިޓް ކުރަން ޖެހިއްޖެ ހާލަތެއްގައި މި ތަނުގައި ވެސް އެޑްމިޓް ކުރެވޭ ގޮތަށް ބެޑް ވެސް ބަހައްޓާފައި މިހާރު ހުރީ،" އޮފިޝަލް ވިދާޅުވި އެވެ. "އެހެން ނަމަވެސް މި ވަގުތު މިތަނުން ބަލި މީހުން ބެލުމަށް ފަހު، އެޑްމިޓް ކުރަން ޖެހޭ ޕޭޝަންޓެއް ނަމަ އައިޖީއެމްއެޗަށް ފޮނުވާނީ."
އޭނާ އަދި ވިދާޅުވީ ތާޖުއްދީން ސްކޫލްގެ ހުމުގެ ކުލިނިކް ހުޅުވި އިރު، ވަރަށް ބާރު ބޮޑު ކަމަށެވެ.
"އެހެން ނަމަވެސް މިހާރު ވަރަށް ބޮޑަށް ލުއިވެއްޖެ،" އޮފިޝަލް ވިދާޅުވި އެވެ. "ފަރުވާ އަށް އަންނަ މީހުންނަށް މިހާރު އެއްވެސް ދައްޗެއް ނެތި ހިދުމަތް ދެވޭނެ."
މި ކްލިނިކް މިއަދު ހުޅުއްވައިދެއްވައި، އެތަން ބައްލަވާލެއްވުމަށް ހެލްތު މިނިސްޓަރު މުހަންމަދު ނާޒިމް ވެސް ވަޑައިގަތެވެ.