ސްޓެލްކޯގެ ކަރަންޓު ބިލެއް ފޯނުން ބަލަނީ: މި ރޯދަމަހު ވެސް ވަނީ ކަރަންޓާއި ފެން ބިލުން ޑިސްކައުންޓު ދީފައި. -- ފޮޓޯ: ނިޝާން އަލީ/ މިހާރު
03 އެޕްރީލް 2025 - 12:53
ކަރަންޓު ބިލުގައި ރޯދަމަހުގެ ޑިސްކައުންޓް ހިމެނުމުން ވެސް ބިލްތައް ބޮޑުވީ ހޫނު މޫސުމާ ދިމާވެ، ކަރަންޓު ބޭނުންކުރި މިންވަރު ނުވަތަ ޔޫސޭޖް އިތުރުވުމުން ކަމަށް ސްޓެލްކޯ އިން ބުނެފި އެވެ.
މި ރޯދަ މަހު ސަރުކާރުން "ހަދިޔާއެއްގެ ގޮތުގައި" ކަރަންޓުގެ އިތުރުން ފެން ބިލުން 10 ޕަސެންޓުގެ ޑިސްކައުންޓެއް ދިނެވެ. ނަމަވެސް މަސް ނިމި ސްޓެލްކޯއިން ފޮނުވި ބިލުތައް ބޮޑުކަމަށް ބުނެ ބައެއް މީހުން އަންނަނީ ސޯޝަލް މީޑިއާގައި ޝަކުވާ ކުރަމުންނެވެ.
ބައެއް ބިލްތައް ދެގުނަ ބޮޑުވެފައިވާކަމަށް ވެސް ބައެއް މީހުން ބުނެެ އެވެ. އަނެއްބައި މީހުންގެ ޝަކުވާއަކަށްވީ ޑިސްކައުންޓަށް ލިބުނު ވަރު ކުޑަވުމެވެ.
ސްޓެލްކޯގެ މީޑިއާ އޮފިޝަލް އަހްމަދު މުހައްމަދު މިއަދު "މިހާރު" އަށް ވިދާޅުވީ ކަރަންޓް ބިލްތައް ބޮޑުވީ ރޯދަ މަހާއި ހޫނު ދުވަސްވަރު ދިމާވުމުންކަމަށެވެ.
ސްޓެލްކޯގެ މުވައްޒަފުންތަކެއް މަސައްކަތުގައި.
އޭނާ ވިދާޅުވީ މިދިޔަ އަހަރުގެ ރޯދަ މަހަށްވުރެ މި އަހަރު ޕީކް ކުޑަވި ކަމަށާއި ނަމަވެސް ޖުމްލަކޮށް ކަރަންޓް ބޭނުންކުރި މިންވަރު މައްޗަށް ގޮސްފައިވާ ކަމަށެވެ.
"ދެ ގަޑިއެއް އައި ރޯދަ މަހު ކަރަންޓު ބޭނުންކުރާ މިންވަރު ވަރަށް މައްޗަށްދާ، އެއީ މެންދުރުފަހު [އާންމުކޮށް ބަދިގޭގައި ބޭނުންކުރާ އެއްޗެހި އިތުރު ގަޑިއެއް] ދެން އިނީ އިޝާ ނަމާދު ފަހުން. އެ ގަޑީގަ ޕީކް މައްޗަށް ދޭ ވަރަށް ބޮޑަށް އަޅުގަނޑުމެންނަށް. އަދި ނޭނގޭ ކީއްވެ ކަމެއް އެގަޑީގަ މައްޗަށް ދަނީ،" އޭނާ ވިދާޅުވި އެވެ.
ކަރަންޓުން ޑިސްކައުންޓް ދިނުމުގައި އެކި މީހުންނަށް އެކި މިންވަރަށް ދީފައިވާގޮތް ސާފު ކޮށްދެއްވަމުން އޮފިޝަލް ވިދާޅުވީ ޑިސްކައުންޓް ދިނުމުގައި ބެލީ މިދިޔަ ނުވަމަހުގެ ބިލްތަކުގެ އެވެރެޖަށް ކަމަށެވެ.
"ނުވަ މަހު [މީހުން] އުޅެފައި ނެތް ގޭގެ ހުންނާނެ. އެ ތަންތަނަށް އަޅުގަނޑުމެން މި ދިނީ ހަމަ 10 ޕަސެންޓުގެ ޑިސްކައުންޓެއް. ބައެއް ގެތަކަށް އެބަހުރި 1،400 އިން 1،700 އިން ވެސް ޑިސްކައުންޓު ލިބިފައި،" އޭނާ ވިދާޅުވި އެވެ.
ސްޓެލްކޯ އިން ކުރިން ވެސް ވަނީ ރޯދަ މަހުގެ ބިލް އާންމު މަސްތަކުގެ ބިލަށްވުރެ ބޮޑު ނުވާ ގޮތަށް އެވްރެޖް ބިލެއް ހަދާނެ ކަމަށާއި ހިސާބުކުރުމުގައި ބަލާނީ ނުވަ މަހުގެ އެވްރެޖަށް ކަމަށް ބުނެފަ އެވެ.
ސްޓެލްކޯއިން ވަނީ ބޭނުން ނުކުރާ ކަރަންޓަށް ބިލް ނުކުރާނެ ކަމުގެ ޔަގީންކަން ދީފަ އެވެ.
ރޯދަ މަސް ފެށުމުގެ ކުރިން ސްޓެލްކޯގެ 350 މުވައްޒަފުން ނުކުމެ، ކަރަންޓު ބިލުގެ ރީޑިން ނެގުމުގެ މަސައްކަތް އެއް ދުވަސް ތެރޭގައި ނިިންމި އެވެ. އެއީ ރޯދަ މަހު ޑިސްކައުންޓު ދޭ ބިލް ވަކިން ހެދުމުގެ ގޮތުން ކުރީގެ ބިލްތައް ވަކިކޮށްލުމަށެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ކިމް
04 April 2025
ރޯދަ މަހަކަސް ބޭނުންކުރީ ހަމަ އެެއްވަރަކަށް ކަރަންޓު. ބިލު ވީ ޑަބަލް
މިސްޓަރ ވާން
04 April 2025
ސްޓެލްކޯ ގެ މަކަރު ފަޅާ އަރައިފި. ބޮޑުން ފްލެޓްތަކާ ބިންތަށް ގަންނަމުން ދަނީ. ގަޓްހުރި ދިހީން ނެއް މިހާރަކު .ފެލާލާއިރު ވެސް ތިބެނީ..........
މަގޭބޮޑުބިލު
04 April 2025
މަށަށް ޑިސްކައުންޓަށް ކެނޑި 2000 ޞިލުކުރީ 3200 ޔައުނީ 5200ރ އެރިޔޭ މިވީހާތަނަށް އެންމެ ބޮޑުކޮށްވެސް އަރާފަ އޮތީ 3800 މިވާހަކަ މަށެއް ޤަބޫލެއް ނުކުރަން
ޖޭމްސް ކުކީ
04 April 2025
ގަވާއިދުން ކޮންމެ މަހެއްގެ ކަރަންޓުބިލް ދައްކަމުންދަނިކޮށް ރޯދަމަސް އައުމާއިއެކު މާޗްމަހު ދެ ބިލް ފޮނުވި. ދެބިލަށްވެސް ލާރިދެއްކި. ދެން ފޮނުވީ ރޯދަމަސް ނިންމާފަ ބިލެއް. ކުރީގެ ހުރިހާމަހަކަށްވުރެ ބިލްބޮޑު. ދެން އެޅުވީ ޑިސްކައުންޓްގެ އަނދުނެއް. އެ ދިނުމުންވެސް ކުރީ ހުރިހާމަހަކަށްވުރެ ބޮޑު. ރައްޔިތުންތިބީ އީދަށް ގައުމުން ބޭރުގަ. ކަރަންޓު ބޭނުންކުރިވަރު ދިޔައީ ދަށަށް. ކެތްތެރިކަމަކީ ކޮޅުންލާ އެއްޗެއްކަން ލަންކާއިންވެސް އިހަކަށްދުވަހު ދެއްކި.
ކަރަންޓް ބިލް
04 April 2025
ނުބައި ވެރިކަންތަކުން އަޅަމެން މިންޖުކުރަންވާ ހެޔޮ ވެރިއެއް ދެއްވާ ދޭންވެ.
މެކޭނިކް
04 April 2025
ޓެކްނިކަލީ ބުނަންޔާ 15 ދުވަހުން ބިލް ފޮނުވުމަކީ ޑަބަލް ޗާޖު ކުރުން ނުވަތަ 2 ބިލް ފޮނުވުން. ދެން ކޮން ޑިސްކައުންޓެއްތޯ؟
ޕްރެޝަރ ބަލާ މެޝިނު
04 April 2025
މި ޚަބަރު ކިޔުމަށްފަހު ޕްރެޝަރ ހުރީ 200/110 ގައި (މަތި)
ނޯ މޯ ވޯޓު މުއިއްޒު
04 April 2025
މުއިއްޒު ދެން ނުހޮވޭނެ އެއްް ސަބަބު ކަރަންޓު ބިލަކީ. އެއާ ކުޅެ ރައްޔިތުން ހަން ދަމައިގެން ވާނެ މޮޅެއް ނޯންނާނެ. ވައްސަލާމް
ދިވެހިރާއްޖެ 2.0
04 April 2025
ދީފަ އަތުލާ ފީފާބުރި
އެލޮކޮސް
04 April 2025
ސްޓެލްކޯ ތި މަކަރުވެރި ބިލްބޮޑުކުރާ ޔުނިޓްތަކުގެ ބޭންޑްވިތް އުވާލާށޭ! ތީވައްކަންކުރުން. 101 ޔުނިޓް ބޭނުންކުރިޔަސް އަދި 400 ޔުނިޓްބޭނުންކުރިޔަސް ޔުނިޓްރޭޓް ހުންނަންވާނީ އެއް އަގެއްގައި. ކަދުރުކިލޯއެއް 30ރ. އެހެންވީމަ ދެކިލޯ ގަންނަންޏާމުން އިތުރުވާ ކިލޯ 90ރ. ތީވައްކަންކުރުން ވިޔަފާރިން! ތިޔުނިޓުން ޑިސްކްރިމިނޭޓުކުރުން ހުއްޓާލަންވީ އޭރުން ބިލުކުޑަވީ! ހޫނޭ ފިންޏޭ އަސޭމިރުހޭ ކިޔާކަށް ނުޖެހޭނެ. މިކޮމެންޓް ޖަހާލައްޗޭ ކޮންމެންޓެއް ލިޔުނަސް ބޭކާރު!